កំពង់ស្ពឺ ៖ ទំនាស់រឿងផ្លូវធ្វើដំណើររវាងប្រជាពលរដ្ឋ ជាមួយក្រុមហ៊ុនកាយយកខ្សាច់ចំនួន ០២ ស្ថិតខាងលិចស្ពានគុណគ្រូ ក្នុងភូមិកំណប់ ឃុំរលាំងគ្រើល ស្រុកសំរោងទង ខេត្តកំពង់ស្ពឺ ត្រូវបានអាជ្ញាធរស្រុកកោះហៅភាគីពាក់ព័ន្ធទាំងអស់ មកធ្វើការសម្របសម្រួល និងដោះស្រាយគ្នា កាលពីរសៀលថ្ងៃទី១៧ ខែធ្នូ ឆ្នាំ២០១៥នេះ មិនត្រូវរ៉ូវគ្នាសោះ ព្រោះតែក្រុមហ៊ុនមួយចង់ផ្តាច់មុខម្នាក់ឯង ព្រមទាំងនិយាយគំរាមលោកអភិបាលស្រុក បើខ្លាំងស៊ីញេបិទអាជីវកម្មគាត់នឹងឈប់ភ្លាម។
ក្រុមហ៊ុនដែលមានទំនាស់ផលប្រយោជន៍គ្នា រឿងធ្វើអាជីវកម្មកាយខ្សាច់ធ្វើឱ្យមានការប៉ះពាល់ដល់ប្រជាពលរដ្ឋ និងអាជ្ញាធរឈឺក្បាល ក្នុងការដោះស្រាយនោះទី០១-ឈ្មោះ K-capital ដែលគ្រប់គ្រងដោយលោកកូយ ឡេសាននៅខាងមុខ និងទី០២-ក្រុមហ៊ុនសំរិទ្ធរ័ត្ន មុន្នី ។ បញ្ហាទំនាស់នេះ ផ្តើមឡើងដោយសារតែក្រុមហ៊ុនK-capital បានព្យាយាមធ្វើរបាំងដើម្បីបិទផ្លូវមិនឱ្យរថយន្តចូលដឹកខ្សាច់ក្នុងក្រុមហ៊ុនសំរិទ្ធរ័ត្ន មុនីជាច្រើនលើក និងចុងក្រោយនៅថ្ងៃទី១៦ ខែធ្នូកន្លងមកនេះមានការប្រឈមមុខដាក់គ្នាខ្លាំងស្ទើរកើតជាអំពើហិង្សា។
ក្នុងការដោះទំនាស់ផលប្រយោជន៍របស់ក្រុមហ៊ុនយកខ្សាច់ចំនួន ២ជិតស្ពានគុណគ្រូជាមួយប្រជាពលរដ្ឋក្នុងឃុំរលាំងគ្រើលនោះ តំណាងប្រជាពលរដ្ឋតវ៉ា ដើម្បីសុំផ្លូវធ្វើដំណើរចេញចូលធម្មតាប៉ុណ្ណោះមិនមានការប្រឆាំងការធ្វើអាជីវកម្មក្រុមហ៊ុនណាមួយឡើយ ព្រោះផ្លូវនោះពួកគាត់ធ្វើដំណើរច្រើនឆ្នាំមុនការកើតម្ល៉េះ ។ អ្នកភូមិបន្តថា បើសិនជាក្រុមហ៊ុនបិទផ្លូវមិនឱ្យគាត់ដើរដូរកាត់សរសៃឈាមរបស់អ្នកភូមិអញ្ចឹងដោយសារតែរាល់ថ្ងៃពលរដ្ឋជាច្រើនភូមិត្រូវធ្វើដំណើរតាមផ្លូវនោះ នាំកសិផលយកទៅលក់ លើទីផ្សារ ទៅធ្វើការងារ កូនចៅទៅសាលារៀនជារៀងរាល់ថ្ងៃ ប្រសិនបើក្រុមហ៊ុនបិទមែននោះ ត្រូវវៀងតាមផ្លូវផ្សេងមានចម្ងាយឆ្ងាយ។
តំណាងក្រុមប្រឹក្សាឃុំរលាំងគ្រើលនិយាយថា ក្រុមហ៊ុនK-capital បានដាក់ពាក្យស្នើសុំអាជ្ញាធរសាងសង់ផ្ទះសម្រាប់កម្មស្នាក់នៅ ហើយអាជ្ញាធរបានយល់ព្រម ប៉ុន្តែមិនបានអនុញ្ញាតឱ្យបិទដើររបស់អ្នកភូមិឡើយ។ ហើយផ្លូវដែលកំពុងមានទំនាស់ត្រង់ក្រុមហ៊ុនយកខ្សាច់នេះពិតជាមានតាំងសម័យដើមពិតមែន។
លោកស្រីសំរិទ្ធ មុនីមាននិយាយថា ថ្វីបើក្រុមហ៊ុនរបស់លោកស្រីធ្វើអាជីវកម្ម នៅខាងក្រោយពិតមែន ប៉ុន្តែគ្មានបញ្ហាជាមួយប្រជាពលរដ្ឋនោះទេ ព្រោះលោកស្រីបានជួសជុលផ្លូវឱ្យមានស្អាតដើម្បីពលរដ្ឋធ្វើដំណើរទៅមក ប៉ុន្តែក្រុមហ៊ុនK-capitalមានចិត្តចង្អៀតចង្អល់។ លោកស្រីបន្តថា បើសិនផ្លូវដែលស្ថិតក្នុងដីចំណីស្ទឹងព្រែកត្នោតដែលក្រុមហ៊ុនK-capitalនោះចំណាយលុយអស់ប៉ុន្មានលោកស្រីជួយ ៥០ភាគរយដើម្បីចេញចូលធ្វើអាជីវកម្មទាំងអស់គ្នា និងសម្រាប់ប្រជាពលរដ្ឋធ្វើចរាចរណ៍ ព្រមទាំងធានាជួសជុលទាំងស្រុង។
លោកស្រីនាង ស្រីម៉ុំ តំណាងក្រុមហ៊ុនខ្សាច់ K-capital និយាយថា ក្រុមហ៊ុនរបស់គាត់មិនបានហាមឃាត់ការធ្វើដំណើររបស់ប្រជាពលរដ្ឋទេ ប៉ុន្តែហាមរថយន្តដែលបានចូលទៅដឹកខ្សាច់នៅការដ្ឋានខ្សាច់មួយទៀតនៅខាងក្រោយ ព្រោះផ្លូវចូលទៅផ្លូវក្រុមហ៊ុនលោកស្រីចំណាយលុយអស់ជាង ២ម៉ឺនដុល្លារឯណោះ ។ លោកស្រីបន្តថា ទោះបីក្រុមហ៊ុនសំរិទ្ធ មុនីជួយចេញ ៥០ភាគរយមិនព្រមដាច់ខាត។
លោកជួប វណ្ណៈប្រធានការិយាល័យរៀបចំដែនដីនគររូបណីកម្ម សំណង់ និងសុរិយោដី ស្រុកសំរោងទងនិយាយថា ទំនាស់នេះវាមិនពិបាកក្នុងការដោះស្រាយទេ ប៉ុន្តែភាគីទាំងអស់ត្រូវចេះ
ផ្ដល់យោបល់គ្នា បញ្ហាទី១រវាងប្រជាពលរដ្ឋដោះស្រាយរួចរាល់ពួកគាត់អាចធ្វើដំណើរចេញចូលបាន នៅត្រង់បញ្ហាទី២ រវាងក្រុមហ៊ុនកាយខ្សាច់K-capital ជាមួយក្រុមហ៊ុនសំរិទ្ធ មុនីប៉ុណ្ណោះ ដូច្នេះបើក្រុមហ៊ុនទាំងធ្វើសម្បទានគ្នាទៅវិញទៅមកគឺចប់ហើយមិនពិបាកទេ។
លោកវរសេនីយ៍ត្រីឃុត សុផលអធិការនគរបាល ស្រុកសំរោងទង និយាយថា រឿងទំនាស់នេះក្រុមហ៊ុនទាំង ២ ព្រមទាំងប្រជាពលរដ្ឋមិនចាំបាច់បកស្រាយកាច់កុងវែងឆ្ងាយទេ និយាយឱ្យចំគោលដៅដែលចង់បានរៀងខ្លួនទៅ ហើយកាលពីថ្ងៃទី១៦ ខែធ្នូកន្លងទៅមានការប្រឈមមុខដាក់គ្នាពេលកំលាំងប៉ូលិសចុះអត្តរាគមន៍ខ្លាចក្រែងមានអំពើហិង្សាកើតមានឡើងបែរចោទថា ប៉ូលិសទៅកាងភាគីម្ខាងៗទៅវិញ។
លោកប៊ិន ថេតតំណាងមន្ទីររ៉ែ និងថាមពលប្រាប់ថា ប្រសិនបើក្រុមហ៊ុនទាំង ២ជជែកគ្នាមិនត្រូវរ៉ូវជាមួយប្រជាពលរដ្ឋទេ មានស្នើសុំទៅក្រសួងដើម្បីព្យួរអាជីវកម្មទាំងសងខាងបណ្ដោះអាសន្នសិន ។ រាល់ការធ្វើអាជីវកម្មនៅកន្លែងណាក្រុមនោះត្រូវមានការអភិវឌ្ឍន៍ជួនប្រជាពលរដ្ឋ មិនត្រូវប៉ះពាល់ដល់ផលប្រយោជន៍របស់ពួកគាត់ និងសង្គមឡើយ។
សូមបញ្ជាក់ថា ទំនាស់បញ្ហាផ្លូវធ្វើដំណើររវាងពលរដ្ឋជាមួយក្រុមហ៊ុនK-capitalនេះ ផ្តើមចេញរឿងទំនាស់ផលប្រយោជន៍ បញ្ហាត្រង់ក្រុមហ៊ុន K-capital ដែលធ្វើអាជីវកម្មនៅខាងមុខតម្រូវឱ្យក្រុមហ៊ុនសំរិទ្ធ មុនីបង់លុយចំនួន ៣៥០០ដុល្លារក្នុងមួយខែ ឬក្បាលឡានមួយម៉ឺនរៀលក្នុងមួយជើង ប៉ុន្តែក្រុមហ៊ុនសំរិទ្ធ មុនី មិនព្រមទេដោយគាត់សុខចិត្តចេញថ្លៃជួសជុលផ្លូវចំនួន ៥០ភាគរយពេលខួចខាតក្រុមលោកស្រីអ្នកធានាទាំងស្រុងមិនឱ្យពិបាកទេ។
លោកស៊ីម រតនៈ អភិបាល ស្រុកសំរោងទង បាននិយាយថា បញ្ហាទំនាស់នេះអាជ្ញាធរព្យាយាមធ្វើការសម្របសម្រួលយ៉ាងក៏មិនត្រូវគ្នាដែរ ព្រោះក្រុមហ៊ុនមិនយោបល់គ្នាសោះ បញ្ហាដែលពលរដ្ឋចង់បាន គឺផ្លូវធ្វើដំណើរហើយក្រុមហ៊ុនបានយល់ព្រម ប៉ុន្តែមិនទាន់ត្រូវគ្នារវាងក្រុមហ៊ុន និងក្រុមហ៊ុនដូច្នេះ ត្រូវលើកទៅដោះស្រាយពេលក្រោយទៀត ។ លោកបន្តថា បើការដោះស្រាយគ្នារបស់អាជ្ញាធរភាគីទាំងសងខាងមិនត្រូវគ្នាទៀតនោះ បើចង់ឈ្នះចាញ់មានតែទៅតុលាការទេ ឬត្រូវស្នើសុំទៅក្រសួងរ៉ែដើម្បីផ្អាកអាជីវកម្ម។
បុរសម្នាក់ដែលស្លៀកឯកសណ្ឋានជាអង្គភាគីក្រុមហ៊ុន K-capital បានប្រើសំដីយ៉ាងព្រហើន និងរបៀបដាបដាក់លោកចៅហា្វយស្រុកថា បើហ៊ានស៊ីញេលើឯកសារ ដើម្បីបទដ្ឋាន ស្អែកលោកនឹងបិទការដ្ឋានភ្លាមតែម្តង៕
ទំនាស់ក្រុមហ៊ុនយកខ្សាច់ចំនួន២ខាងលិចស្ពានគុណគ្រូជាមួយប្រជាពលរដ្ឋ រឿងផ្លូវធ្វើដំណើរនាំឱ្យអាជ្ញាធរឈឺក្បាល
0 Comments