កោះកុង ៖ ជនរងគ្រោះដែលរងការប៉ុនប៉ងរំលោភ រស់នៅក្នុងភូមិតាអ៊ុក ឃុំអណ្ដូងទឹក ស្រុកបុទុមសាគរ បានចោទប្រកាន់ទៅលោក ង៉ែត សារ៉ន មេប៉ុស្តិ៍អណ្ដូងទឹក និងមេឃុំថា បានឃុបឃិតដោះលែងជនល្មើស ដែលជាមនុស្សជំនិតរបស់រដ្ឋបាលព្រៃឈើអណ្ដូងទឹក។
បើតាមជនរងគ្រោះដែលមាន អាយុ៣៥ឆ្នាំ ថា ជនសង្ស័យ ឈ្មោះ ភន តូម ជាមនុស្សជំនិត និងជាអ្នកដើរប្រមូលលុយបទល្មើសឲ្យ លោក ជ វ៉ាងលី ប្រចាំនៅឃុំអណ្ដូងទឹក និងឃុំថ្មស បានចូលមកផ្ទះរបស់លោកស្រី នៅវេលាប្រហែលម៉ោង៨យប់នាថ្ងៃទី៣ ខែមករា ឆ្នាំ២០១៦ ហើយសុំខ្ចីស្នប់សប់កង់ម៉ូតូ ហើយលោកស្រីបានឆ្លើយថា អត់មានទេ ហើយរូបគាត់ក៏បានដើរចូលក្នុងបន្ទប់វិញ (ដោយមិនបានបិទទ្វារទេ)។ ពេលនោះឈ្មោះ ភន តូម (ជនសង្ស័យ) បានចូលតាមក្រោយរួចបិទទ្វារ ហើយក៏ចាប់ខ្ចប់មាត់អ្នកស្រី ដោយនិយាយថា កុំស្រែក រួចបំរុងនឹងចាប់រំលោភ តែដោយអ្នកស្រីព្យាយាម រើបម្រាស់ រហូតរួចខ្លួនហើយក៏បានស្រែកហៅប្ដី និងបងប្អូនឲ្យមកជួយ។
បងប្អូនជនរងគ្រោះបាននិយាយថា ពេលមកដល់ គេឃើញ ឈ្មោះ ភន តូប (ជនសង្ស័យ) នៅក្រោមគ្រែសល់តែខោលីអូជាប់នឹងខ្លួន រួមជាមួយជនរងគ្រោះនៅក្នុងបន្ទប់ ហើយក៏បានឲ្យជនរងគ្រោះចេញ និងបិទទ្វារជនសង្ស័យឲ្យនៅក្នុងបន្ទប់។
លោក ព្រំ នឿន អាយុ៣៥ឆ្នាំ (ប្តីជនរងគ្រោះ) បានឲ្យដឹងថា ក្រោយការឃាត់ខ្លួន លោកបានហៅលោក ងៀត យ៉ាវ មេភូមិតាអុក និង លោក ង៉ែត សារ៉ន ដែលជាមេប៉ុស្តិ៍អណ្ដូងទឹកមកចាប់ជនសង្ស័យ តែក្រោយការមកដល់ លោកមេប៉ុស្តិ៍បែរជាពុំព្រមដាក់ខ្នោះជនសង្ស័យនោះទេ ដោយលោកនិយាយថា ប្រសិនបើជនសង្ស័យរត់បាត់លោកជាអ្នកធានាទទួលខុសត្រូវជាប់គុកជំនួស ហើយគិតតែពីឲ្យខាងជនរងគ្រោះសម្រួលគ្នា និងជនសង្ស័យទៅវិញ ទោះបីជាខាងជនរងគ្រោះនិយាយថា មិនព្រមសម្រួលក៏ដោយ។
លោកបានបន្តថា លោក ង៉ែត សារ៉ន ព្យាយាមសម្របសម្រួលតាំងពីម៉ោងជាង៨យប់រហូតដល់ជាង១២រំលងអធ្រាត្រ តែដោយខាងលោកមិនយល់ព្រម លោកមេប៉ុស្តិ៍ក៏បានឲ្យជនសង្ស័យជិះម៉ូតូចេញគេចខ្លួនបាត់។
ក្រោយមកលោក ង៉ែត សារ៉ន មេប៉ុស្តិ៍អណ្ដូងទឹកពុំព្រមធ្វើការរាយការណ៍ទៅ លោក សុខ ផន អធិការស្រុកបុទុមសាគរនោះទេ រហូតដល់ថ្ងៃទី៥ មករា ក្រោយពីជនរងគ្រោះទៅរាយការណ៍ដែលអធិការដ្ឋាននគរបាលស្រុកបុទុមសាគរ ហើយលោកអធិការស្រុកបុទុមសាគរក៏ចុះមកដល់ផ្ទះជនរងគ្រោះ ដើម្បីពិនិត្យរឿងទាំងនេះ។
ជុំវិញបញ្ហាចោទប្រកាន់ខាងលើ លោក ង៉ែត សារ៉ន មេប៉ុស្តិ៍អណ្ដូងទឹកបានឆ្លើយទទួលស្គាល់ថា ពិតជាមានរឿងបែបនេះមែន ហើយលោកក៏កំពុងបានរាយការណ៍ ព្រោះជនសង្ស័យជាបងប្អូនធម៌ជាមួយជនរងគ្រោះ ហើយម្យ៉ាងទៀតក៏ជាមនុស្សជំនិតរបស់ លោក ជ វ៉ាងលី នាយផ្នែករដ្ឋបាលព្រៃឈើអណ្ដូងទឹកផង ទើបលោកមិនបានធ្វើការដាក់ខ្នោះរបៀបនេះ។
ចំណែកឯលោក សុខ ផន អធិការស្រុកបុទុមសាគរវិញ បានឲ្យដឹងថា ករណីនេះលោកកំពុងរៀបចំសំណុំរឿងបញ្ជូនទៅខាងខេត្ត៕
មេឃុំ និងមេប៉ុស្តិ៍អណ្ដូងទឹក រងការចោទប្រកាន់ថា ឃុបឃិតដោះលែងជនល្មើសក្នុងអំពើរំលោភ
0 Comments