ជម្រើស​ជាតិ​ប្រកួត​មិត្តភាព​ជាមួយ​ក្រសួងការពារជាតិ នៅ​ម៉ោង​៤​ល្ងាច​ថ្ងៃ​ព្រហស្បតិ៍​នេះ​

បាល់ទាត់ ៖ ក្រុមបាល់ទាត់​ជម្រើស​ជាតិ​កម្ពុជា នឹង​ត្រូវ​ប្រកួត​មិត្តភាព​កម្ដៅ​សាច់ដុំ​ជា​លើក​ទី​២ ជា​មួយ​ក្លិប​បាល់ទាត់​ក្រសួងការពារជាតិ សមាជិក​ក្នុង​លី​ក​មិត្ត​ហ្វូ​ន​ខេ​ម​បូ​ឌា​ន​លី​ក (Metfone Cambodian League) នៅ​វេលា​ម៉ោង​៣​និង​៣០​នាទី​ល្ងាច​ថ្ងៃ​ព្រហស្បតិ៍ ទី​៧ ខែ​មករា ឆ្នាំ​២០១៦​នេះ​លើ​ទីលាន​ស្មៅ​សិប្បនិមិត្ត​ពហុកីឡាដ្ឋាន​ជាតិ​ក្នុង​រាជធានី​ភ្នំពេញ។

សម្រាប់​ក្រុម​ជម្រើស​ជាតិ​កម្ពុជា បាន​ប្រកួត​ឈ្នះ​ក្រុម​ស្វាយរៀង​អែ​ហ្វ​ស៊ី ម្ដង​ហើយ​កាល​ពី​ពេល​ថ្មីៗ​នៅ​ទីលាន​មជ្ឈមណ្ឌល​បាល់ទាត់​ជាតិ​បាទី ដោយ​លទ្ធផល​១ ទល់​០ ជា​ស្នាដៃ​របស់​កីឡាករ សុក ចាន់​រស្មី។ តាមពិត​ក្រុម​ជម្រើស​ជាតិ​កម្ពុជា ត្រូវ​ប្រកួត​ជាមួយ​ក្រុម Japan All Star (​កីឡាករ​ជនជាតិ​ជប៉ុន​ប្រកប​អាជីព​នៅ​កម្ពុជា​) នោះ​ទេ ប៉ុន្តែ​ដោយសារ​ក្រុម​នេះ​រៀបចំខ្លួន​មិនទាន់​ក៏​ប្ដូរ​មក​ប្រកួត​ជាមួយ​ក្រសួងការពារជាតិ​វិញ។

ក្រុម​ជម្រើស​ជាតិ​កម្ពុជា កំពុងតែ​ត្រៀមខ្លួន​ទៅ​ចូលរួម​ប្រកួត​ក្នុង​ពានរង្វាន់​អន្តរជាតិ 2016 Bangabandhu Gold Cup នៅ​ប្រទេស​បង់​ក្លា​ដេ​ស ដែល​មាន​ក្រុម​ចូលរួម​ចំនួន​៨ ដោយ​បែង​ចែក​ជា​២ ពូ​ល ក្នុង​នោះ​កម្ពុជា នៅ​ពូ​ល B ជាមួយ​ក្រុម U-23 បង់​ក្លា​ដេ​ស​, ជម្រើស​ជាតិ​បា​រ៉ែ​ន (​អាចជា U-23 បា​រ៉ែ​ន​) និង​ជម្រើស​ជាតិ​ម៉ា​ល់​ឌី​វ ចាប់ពី​ថ្ងៃ​ទី​៨ ដល់​២០ ខែ​មករា ឆ្នាំ​២០១៦។

លោក Lee Tae Hoon គ្រូបង្វឹក​ក្រុម​ជម្រើស​ជាតិ​កម្ពុជា​បាន​ដឹកនាំ​កីឡាករ​២២​នាក់​ទៅ​ហ្វឹក​ហាត់​នៅ​ទន្លេបាទី ​តាំងពី​ថ្ងៃ​សៅរ៍ ទី​២ ខែ​មករា កន្លងទៅ ប៉ុន្តែ​លោក​បាន​ប្រមូលផ្ដុំ​កីឡាករ​២៨​នាក់​តាំងពី​ថ្ងៃ​ទី​២៨ ខែ​ធ្នូ ឆ្នាំ​២០១៥​កន្លងទៅ​មក​ម្ល៉េះ។​

ចំណែក​ក្រុម​កំពុងតែ​ត្រួតពិនិត្យ​កីឡាករ​ក្នុង​ក្រុម​ទាំង​កីឡាករ​វ័យក្មេង និង​កីឡាករ​បរទេស ដើម្បី​ត្រៀម​ការពារ​តំណែង​ជើងឯក​ពានរង្វាន់​សម្ដេច​តេ​ជោ Hun Sen Cup ក៏ដូចជា​ត្រៀម​ប្រកួត​ពាន​រង្វាន់​លី​ក​កំពូល​កម្ពុជា​មិត្ត​ហ្វូ​ន​ខេ​ម​បូ​ឌា​ន​លី​ក ២០១៦ (Metfone Cambodian League 2016) ខាងមុខ​៕

 

​

ជម្រើស​ជាតិ​ប្រកួត​មិត្តភាព​ជាមួយ​ក្រសួងការពារជាតិ នៅ​ម៉ោង​៤​ល្ងាច​ថ្ងៃ​ព្រហស្បតិ៍​នេះ​