ក្លិប​ភ្នំពេញ​ក្រោ​ន តែ​តាំង​គ្រូបង្វឹក​ថ្មី​ជនជាតិ​អេ​ស្ប៉ា​ញ ក្រោយ​គ្រូបង្វឹក​ចាស់​មិនទាន់​ជា​ពី​របួស

ក្លិប​បាល់ទាត់​ភ្នំពេញ​ក្រោ​ន ម្ចាស់​ជើងឯក​ពានរង្វាន់​លី​ក​កំពូល​កម្ពុជា ៦ សម័យកាល​បាន​ប្រកាស​តាម​ទំព័រ​ហ្វេ​ស​ប៊ុ​ក​នៅ​រសៀល​ថ្ងៃ​ព្រហស្បតិ៍ ទី ៧ មករា តែងតាំង​លោក​ORIOL MOHEDANO ជនជាតិ​អេ​ស្ប៉ា​ញ​ធ្វើជា​គ្រូ​បង្គោល​ក្លិប ជំនួស​លោក Sam Schweingruber គ្រូបង្វឹក​ចាស់​ដែល​មិនទាន់​ជាសះស្បើយ​ពីរ​បួស​ដោយ​គ្រោះថ្នាក់​ចរាចរណ៍​កាលពី​ពាក់កណ្ដាល​ខែធ្នូ កន្លងទៅ។

ហ្វេ​ស​ប៊ុ​ក​ភ្នំពេញ​ក្រោ​ន​បាន​សរសេរ​ថា «​ក្លិប​ភ្នំពេញ​ក្រោ​ន​មាន​សេចក្តី​រីករាយ​ក្នុង​ប្រកាស​នៃ​ការតែងតាំង​លោក Oriol Mohedano ជា​គ្រូ​បង្គោល​របស់​ឈុត​ធំ​ក្លិប ដោយសារតែ​ស្ថានភាព​របស់លោក​គ្រូ​បង្គោល Sam Schweingruber មិនទាន់​អាច​ចូលកាន់​ដំណែង​វិញ​នៅឡើយ​ជាមួយនឹង​ពេល​មួយ​វេលា​មួយ​មិន​ច្បាស់លាស់​។ ដូចនេះ​លោក Oriol នឹង​ក្លាយជា​គ្រូ​បង្គោល​សម្រាប់​ក្លឹប​ភ្នំពេញ​ក្រោ​ន ដើម្បី​ត្រៀម​ប្រកួត​លី​ក​កំពូល​កម្ពុជា​រដូវ​កាល ២០១៦ (​ការប្រកួត​ដំបូង​នៅ​ថ្ងៃទី ៧ កុម្ភៈ​) និង​ពានរង្វាន់​សម្តេច ហ៊ុន សែន ផងដែរ​»។

ក្រោយ​ចុះ​កិច្ច​សន្យា​រយៈពេល​១​រដូវ​កាល​លោក Oriol Mohedano​បាន​លើក​ឡើង​ថា «​ខ្ញុំ​បាន​និយាយ​ជាមួយ Sam ប្រហែលជា ៦ ខែ​មក​ហើយ​អំពី​បាល់ទាត់ ក៏ដូចជា​ការ​ធ្វើ​ការ​ជាមួយគ្នា​នៅ​ក្លិប​ភ្នំពេញ​ក្រោ​ន​។ ខ្ញុំ​ឃើញថា​នេះ​ជា​ដំណើរ​វិវិត្ត​នៅក្នុង​ការ​បង្ហាត់​របស់​ខ្ញុំ។ ខ្ញុំ​តែងតែ​ស្វែងរក​ភាព​រីកចម្រើន​សម្រាប់​ខ្លួនឯង និង​ខ្ញុំ​ត្រៀមខ្លួន​រួចជាស្រេច​ក្នុង​ការ​ទទួល​ដំណែង​នេះ​។ ក្លិប​នេះ​មាន​អត្តសញ្ញាណ​ច្បាស់ ជាមួយនឹង​កីឡាករ​ក្មេង ហើយ​ខ្ញុំ​ចង់​អភិវឌ្ឍន៍​ក្មេងៗ​។ ខ្ញុំ​គឺជា​គ្រូ​ដែល​មាន​វ័យក្មេង​មួយ​រូប ហើយ​ខ្ញុំ​ពិតជា​សប្បាយចិត្ត​ចំពោះ​ឱកាស​មួយ​នេះ ក្លិប​ភ្នំពេញ​ក្រោ​ន គឺជា​ក្លិប​ដែល​អស្ចារ្យ​ដែល​ត្រូវ​បាន​អ្នកគាំទ្រ​ទទួលស្គាល់​នៅ​ប្រទេស​កម្ពុជា ហើយ​នេះ​ក៏​ជា​គោលដៅ​របស់ខ្ញុំ​ក្នុង​ការ​បង្កើន​បាល់ទាត់​ឲ្យ​កាន់តែ​មានគុណ​ភាព​ជាង​នេះ​ផង​ដែរ​។ ខ្ញុំ​មិន​ខ្មាស ហើយ​ខ្ញុំ​នឹង​កំណត់​គោលដៅ​ខ្លួនឯង​ឲ្យ​បាន​ខ្ពស់​»​។

លោក​បន្ត​ថា​៖ «​ខ្ញុំ​ដឹង​ថា​បាល់ទាត់​គឺ​ពិតជា​អស្ចារ្យ ដែល​មនុស្ស​ទាំង​អស់​រីករាយ ខ្ញុំ​ចង់​ឲ្យ​ទាំង​កីឡាករ និង​អ្នកគាំទ្រ​សុទ្ធ​តែ​មាន​អារម្មណ៍​ដូចគ្នា​។ ខ្ញុំ​សូម​សន្យា​ថា​យើង​នឹង​ខិតខំ​ប្រឹង​ឲ្យ​អស់​កម្លាំងកាយ​ចិត្ត ហើយ​យើង​ក៏​ត្រូវការ​អ្នកគាំទ្រ​ទាំងអស់​គាំទ្រ​ដើម្បី​ជួយ​ឲ្យ​ក្លិប​ទទួល​បាន​ជ័យជម្នះ​ផង​ដែរ​។ នៅ​ពេល​ដែល​ទំនាក់ទំនង​ល្អ នេះ​ជា​អារម្មណ៍​មួយ​ដ៏​អស្ចារ្យ ក៏ដូចជា​គ្រួសារ ដូចនេះ​ខ្ញុំ​សង្ឃឹម​អ្នកគាំទ្រ​នឹង​ត្រៀមខ្លួន​រួចជាស្រេច យើង​នឹង​ផ្តល់​អ្វី​ដែល​លោកអ្នក​ស្រលាញ់​ចូលចិត្ត ក៏ដូចជា​ល្អ​ផង​ដែរ​»។

ទំព័រ​ហ្វេ​ស​ប៊ុ​ក​របស់​ភ្នំពេញ​ក្រោ​ន បាន​បង្ហាញ​ពី​ជីវប្រវត្តិ​របស់​លោក​គ្រូ​បង្វឹក​ថ្មី​ថា​លោក Oriol Mohedano មាន​ស្រុកកំណើត​នៅឯ​ទីក្រុង Barcelona ប្រទេស អេ​ស្ប៉ា​ញ​។ បច្ចុប្បន្ន​លោក​មាន​វ័យ ២៩ ឆ្នាំ និង​ជា​គ្រូ​ដែល​កាន់​អាជ្ញាប័ណ្ណ UEFA A-License ជាមួយនឹង​បទពិសោធន៍​ជាច្រើន​នៅ​ប្រទេស​ប្រទេស​អេ​ស្ប៉ា​ញ​, ស្វី​ស និង ហ្វាំ​ង​ឡង់​ផង​ដែរ មុននឹង​មកកាន់​ដំណែង​នៅ​អាស៊ី​ជា​លើកដំបូង​ជាមួយនឹង​កុងត្រា​រយៈពេល ១ ឆ្នាំ។

ក្នុងនាម​ជា​កីឡាករ​ដែល​មាន​តួនាទី​ជា​ខ្សែការពារ លោក​បាន​តំណាង​ឲ្យ junior club Penye Cornella មុននឹង​ចូលរួម​ជាមួយ​ក្លឹប Atletic Roda de Bara នៅក្នុង​Catalan First Division នៃ​ប្រទេស​អេស្ប៉ា​ញ (​លី​ក​លំដាប់​ទី ៥ នៃ​ប្រទេស​អេ​ស្ប៉ា​ញ​)​។ ប៉ុន្តែ​ដោយសារ​តែមាន​បញ្ហា​របួស​បាក់ជើង​ត្រូវ​បង្ខំ​ឲ្យ​លោក​បញ្ចប់​អាជីព​ជា​កីឡាករ​នៅ​វ័យ​ត្រឹមតែ ២៣ ឆ្នាំ​។ លោក​ក៏​ចាប់អារម្មណ៍​ក្នុងការ​ហ្វឹកហាត់​កីឡាករ ដោយ​ចាប់ផ្តើម​ពី​អាជ្ញាប័ណ្ណ UEFA C-License គ្រូបង្វឹក​ក្រុម​យុវជន UE Cornella រយៈពេល ៣ ឆ្នាំ មុននឹង​ត្រលប់​ទៅ CA Roda De Bara រយៈពេល ១ ឆ្នាំ ក្រោយមក​ក៏​បន្តទៅ Segunga Division club, Club Gimnastic de Tarragona, (​លី​ក​លំដាប់​ទី ២ នៃ​ប្រទេស​អេ​ស្ប៉ា​ញ​) រយៈពេល ៣ ឆ្នាំ ព្រមទាំង​ជួយ​ឲ្យ​ក្រុម​យុវជន​អាយុ​ក្រោម ១៨ ឆ្នាំ​ឈ្នះ​ជើងឯក Catalan Championship។

លោក​ទទួល​បាន​អាជ្ញា​ប័ណ្ណ UEFA A-License ជាមួយ​ក្រុម Nastic នៅ​ប្រទេស​អេ​ស្ប៉ា​ញ​។ នៅ​ខែ កក្កដា ២០១៤ លោក​បាន​ចូលរួម​ជាមួយ​ក្រុម Servette FC នៅឯ​Geneva ប្រទេស​ស្វី​ស ១ ឆ្នាំ និង​ជា​គ្រូ​ជំនួយ​ក្រុម​យុវជន​អាយុ​ក្រោម ១៨ ឆ្នាំ​ដែល​ឈ្នះ​ពាន​នៅ​ប្រទេស​ស្វី​ស​ផងដែរ​។

បច្ចុប្បន្ន​នេះ​លោក​បាន​ចំណាយពេល​រយៈពេល ៣ ខែ​ក្នុងនាម​ជា​គ្រូ​ជំនួយ​នៅ FC Legirus Inter នៅ​ប្រទេស ហ្វាំ​ង​ឡង់ មុននឹង​ចូលរួម​ជាមួយ​ក្លិប​ភ្នំពេញ​ក្រោ​ន៕

ក្លិប​ភ្នំពេញ​ក្រោ​ន តែ​តាំង​គ្រូបង្វឹក​ថ្មី​ជនជាតិ​អេ​ស្ប៉ា​ញ ក្រោយ​គ្រូបង្វឹក​ចាស់​មិនទាន់​ជា​ពី​របួស