ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសជាថ្មី ឲ្យអ្នកដែលមានសញ្ជាតិមួយ ឬ សញ្ជាតិ១០ ចូលរួមប្រកូតប្រជែងជាមួយគណបក្សប្រជាជនកម្ពុជា ដែលជាគណបក្សជើងខ្លាំងមួយនៅព្រះរាជាណាចក្រកម្ពុជា សម្រាប់ការបោះឆ្នោតជាបន្តបន្ទាប់ ដូចជាបោះឆ្នោត ឃុំ សង្កាត់ និងការបោះឆ្នោតជ្រើសរើសតំណាងរាស្ត្រអាណត្តិទី៦ នាពេលខាងមុខ។
សម្តេចអគ្គមហាសេនាបតីតេជោ ហ៊ុន សែន ប្រកាសបែបនេះនៅក្នុងអង្គមទ្ទិញរំឭកខួបទី៣៧ថ្ងៃជ័យជំនះ៧មករា។ សម្តេចបានមានប្រសាសន៍ថា ក្រោយពីមានការត្រិះរិះពិចារណាក្នុងចំណោមថ្នាក់ដឹកនាំគណបក្សប្រជាជនកម្ពុជា សម្តេចបានសម្រេចស្វាគមន៍អ្នកដែលមានសញ្ជាតិច្រើនឲ្យចូលរួមប្រកួតប្រជែងក្នុងការបោះឆ្នោត ជាមួយដៃគូដែលមានទម្ងន់ធ្ងន់ដូចគ្នា។
លោកបញ្ជាក់យ៉ាងនេះថា “គណបក្សប្រជាជនកម្ពុជាសម្រេចប្រកាន់ជំហរបើកឱកាសឲ្យបណ្តាប្រធានគណបក្សនយោបាយ ទោះបីមានសញ្ជាតិមួយ ឬ សញ្ជាតិ១០ សូមអញ្ជើញចូលរួមចូលបោះឆ្នោតជាមួយគណបក្សប្រជាជន”។
ជាមួយគ្នានោះ សម្តេចបានប្រកាសថា គណបក្សប្រជាជនកម្ពុជាបន្តអនុវត្តខ្ជាប់ខ្ជួននូវវប្បធម៌សន្ទនារវាងគណបក្សទាំងពីរដែលមានអាសនៈក្នុងរដ្ឋសភា ដោយឈរលើមូលដ្ឋានសេចក្តីថ្លែងការណ៍រួមរវាងគណបក្សទាំងពីរនាថ្ងៃទី៨ ខែឧសភា ឆ្នាំ២០១៥ និងថ្ងៃទី១០ ខែធ្នូ ឆ្នាំ២០១៥ ហើយខិតខំដោះស្រាយនូវរាល់បញ្ហាដោយឈរលើស្មារតីបង្រួបបង្រួមជាតិឯកភាពជាតិ ស្របតាមគោលការណ៍នៃលទ្ធិប្រជាធិបតេយ្យ និងនីតិរដ្ឋ។ ទោះជាយ៉ាងណាសម្តេចអគ្គមហាសេនាបតីតេជោ ហ៊ុន សែន បានអះអាងថា “យើងសូមបញ្ជាក់នៅទីនេះ សាជាថ្មីម្តងទៀតថា យើងត្រូវការនូវការសន្ទនា តែយើងត្រូវការនូវ ការស្មោះត្រង់ ហើយប្រឆាំងដាច់ខាតនូវទង្វើចាប់ដៃជាន់ជើង ដូចដែលអ្នកនយោបាយទុច្ចរិតបានធ្វើកន្លងទៅផងដែរ។ យើងបន្តសន្ទនា ដើម្បីការរួបរួមជាតិ និងការអភិវឌ្ឍន៍ប្រទេសរបស់យើង”។
សូមបញ្ជាក់ថា ការប្រកាសនេះបានធ្វើឡើងបន្ទាប់ពីគណៈកម្មការសិក្សាស្រាវជ្រាវរៀបចំសំណើវិសោធនកម្មច្បាប់ស្តីពីគណបក្សនយោបាយមួយត្រូវបានបង្កើតឡើង ដើម្បីធ្វើវិសោធនកម្មច្បាប់ស្តីពីគណបក្សនយោបាយ និងដាក់បញ្ចូលនូវចំណុចមួយចំនួន តម្រូវឲ្យប្រធានគណបក្សនយោបាយត្រូវមានសញ្ជាតិខ្មែរតែមួយ ហើយសម្តេចក្រឡាហោម ស ខេង ដែលជាប្រធានគណៈកម្មការសិក្សាស្រាវជ្រាវនោះ បានមានប្រសាសន៍ថា ការប្រជុំពិភាក្សាគ្នាលើបញ្ហានេះ ប្រហែលជាសប្តាហ៍ក្រោយ។
គណៈកម្មការសិក្សាស្រាវជ្រាវរៀបចំសំណើវិសោធនកម្មច្បាប់ស្តីពីគណបក្សនយោបាយមានសមាសភាពចំនួន១៣ រូប ក្នុងនោះមានប្រធាន១ រូប និងអនុប្រធាន២ រូប ហើយសមាសភាពគណៈកម្មាការនោះរួមមាន ១-សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាប្រធាន។ ២-លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ជាអនុប្រធាន។ ៣-លោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ជាអនុប្រធាន ព្រមទាំងមន្ត្រីនៃក្រសួងស្ថាប័នជំនាញ និងអ្នកច្បាប់មួយចំនួនទៀតជាសមាជិក។
ទាក់ទងបញ្ហានេះដែរ កាលពីថ្ងៃទី២៩ ខែធ្នូ ឆ្នាំ២០១៥ សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ពីប្រធានគណបក្សមួយចំនួន ដែលមានសញ្ជាតិច្រើន ហើយសម្តេចចង់ឲ្យប្រធានគណបក្សនយោបាយទាំងអស់មានសញ្ជាតិខ្មែរតែមួយ។
លោក យឹម សុវណ្ណ មន្ត្រីអ្នកនាំពាក្យគណបក្សសង្គ្រោះជាតិ បានថ្លែងប្រាប់អ្នកសារព័ត៌មានថា ការសម្រេចប្តូរចិត្តរបស់សម្តេចនាយករដ្ឋមន្ត្រី ហ៊ុន សែន នេះ គឺជាការប្រសើរសម្រាប់ការផ្សះផ្សាជាតិ។ ទោះជាយ៉ាងណា លោកជំរុញឲ្យមេដឹកនាំបក្សកាន់អំណាចមួយនេះបន្តសហការគ្នាដោះស្រាយបញ្ហាជាតិសំខាន់មួយចំនួនទៀត ដែលនៅសេសសល់តាមកិច្ចព្រមព្រៀងនយោបាយកន្លងទៅ៕
ថ្នាក់ដឹកនាំកំពូលគណបក្សប្រជាជនកម្ពុជា ប្រកាសបើកទូលាយឲ្យអ្នកមានសញ្ជាតិច្រើនចូលរួមប្រកូតប្រជែងជាមួយជើងខ្លាំង
0 Comments