ភ្នំពេញ ៖ នៅព្រឹកថ្ងៃទី ៧ ខែមករា ឆ្នាំ២០១៦នេះលោក ស៊ុយ សែមរដ្ឋមន្ត្រីក្រសួងរ៉ែ និងថាមពល បានអញ្ជើញចូលរួមក្នុងទិវារំលឹកខួបទី៣៧ នៃទិវាជ័យជំនះ ៧មករា ជាមួយលោក ម៉ៅ ធនិន អភិបាលនៃគណៈអភិបាលខេត្តពោធិ៍សាត់មន្ត្រីរាជការ សមាជិកសមាជិកា ក្រុមប្រឹក្សាខេត្ត ក្រុមការងារចុះជួយខេត្តពោធិ៍សាត់ និងក្រុមការងារថ្នាក់ជាតិចុះមូលដ្ឋានខេត្ត រួមនឹងព្រះសង្ឃ ប្រជាពលរដ្ឋជាង៤ពាន់អង្គនាក់នៅកោះសំពៅក្នុងខេត្តពោធិ៍សាត់។
នាឱកាសនោះ លោក ស៊ុយ សែមក៏បានអាននូវសន្ទរកថា របស់សម្តេចអគ្គសេនាបតីតេជោហ៊ុនសែន ក្នុងឱកាសទិវារំលឹកជ័យជំនះ៧ មករា ខួបលើកទី៣៧ ដោយមានខ្លឹមសារថា ថ្ងៃ៧មករាបានធ្វើឲ្យប្រទេសជាតិរស់ឡើងវិញ និងស្ថិតស្ថេរគង់វង្ស និងរីកចម្រើនរហូតមកដល់សព្វថ្ងៃនេះ។ ទោះបីជារយៈពេល ៣៧ឆ្នាំ បានកន្លងផុតទៅហើយក្តី ក៏ព្រឹត្តិការណ៍ជាប្រវត្តិសាស្ត្រនេះ នៅតែរស់រវើកជានិច្ច ក្នុងដូងចិត្តរបស់ប្រជាជនកម្ពុជាគ្រប់រូបដែលស្នេហាសន្តិភាព សេរីភាព និងយុត្តិធម៌ទាំងអស់លើពិភពលោក។
ពិធីបុណ្យរំលឹកទិវាជ័យជំនះ ៧មករា ជាប្រវត្តិសាស្ត្រថ្ងៃនេះ គឺក្នុងស្មារតីគោរពដឹងគុណដ៏ជ្រាលជ្រៅបំផុត ចំពោះវីរយុទ្ធជន យុទ្ធនារី អ្នកស្នេហាជាតិ ដ៏ច្រើនឥតគណនា ដែលបានប្រយុទ្ធ និងពលីកម្មយ៉ាងអង់អាច ក្លាហានបំផុត ក្នុងការរំដោះប្រទេសកម្ពុជាពី របបប្រល័យពូជសាសន៍។ យើងទាំងអស់គ្នា សូមលំឱនកាយគោរពដួងវិញ្ញាណក្ខន្ធរបស់ប្រជាជនជនរួមជាតិយើងជាងបីលាននាក់ ដែលបានត្រូវសម្លាប់យ៉ាងអយុត្តិធម៌បំផុត ក្រោមរបបប្រល័យពូជសាសន៍ និងសូមឧទ្ទិសបួងសួងសូមឲ្យដួងព្រលឹង របស់លោកអ្នកទាំនោះ បានទៅកាន់សុគតិភព ជារៀងរហូត។
ប្រជាជនកម្ពុជា នាពេលបច្ចុប្បន្នកំពុងរស់នៅប្រកប ដោយសុទិដ្ឋិនិយមជាមួយក្តីសោមនស្សរីករាយក្រៃលែង ចំពោះសមិទ្ធផលដែលបានកើត ឡើងជាបន្តបន្ទាប់ក្រោយថ្ងៃរំដោះ ៧ មករា។ ខឿនឯករាជ្យអធិបតេយ្យ បូរណភាពទឹកដី និងសន្តិភាព ត្រូវបានការពារមោះមុតស្ថិរភាពនយោបាយ សន្តិសុខ និងសណ្ដាប់ធ្នាប់សង្គមមានភាពល្អប្រសើរ ទោះបីជាមានការរំខានពីសកម្មភាពនយោបាយខ្លះៗក្តី៕
លោករដ្ឋមន្ត្រីក្រសួងរ៉ែ និងថាមពលអញ្ជើញ ជាអធិបតីក្នុងទិវារំលឹកខួបលើទី៣៧នៃថ្ងៃរំដោះ៧មករានៅខេត្តពោធិ៍សាត់
0 Comments