កំពង់ឆ្នាំង ៖ គល់ឈើប្រភេទធ្នង់ធំៗចំនួន៨គល់ដឹកតាមរថយន្ត១គ្រឿងចេញពីស្រុកកំពង់លែងឆ្លងកាត់ក្រុងកំពង់ឆ្នាំង ត្រូវបានសមត្ថកិច្ចចម្រុះស្ទាក់ចាប់បញ្ជូនយកមករក្សាទុកនៅក្នុងខណ្ឌរដ្ឋបាលព្រៃឈើកំពង់ឆ្នាំង ព្រោះតែគ្មានសុំច្បាប់អនុញ្ញាត។ ករណីបង្ក្រាបបទល្មើសព្រៃឈើខាងលើនេះបានធ្វើឡើងនៅវេលាម៉ោង៥និង១៥នាទីល្ងាចថ្ងៃទី២ ខែមករា ឆ្នាំ២០១៦ នៅចំណុចកំពង់ផែកាណូត ដរ ស្ថិតនៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង។
សមត្ថកិច្ចខណ្ឌរដ្ឋបាលព្រៃឈើកំពង់ឆ្នាំងបានឲ្យដឹងថា រថយន្តដឹកឈើខុសច្បាប់ខាងលើនេះពាក់ស្លាកលេខភ្នំពេញ 3A- 0800 ពណ៌.ស បានដឹកគល់ឈើធ្នង់ធំៗចំនួន៨ដុំ ក្នុងនោះ៣ដុំបានកែច្នៃរួចហើយរបស់ លោក មាន់ អ៊ានលី អភិបាលស្រុកកំពង់លែង ដែលបានដឹកចេញពីសាលាស្រុកកំពង់លែង ឆ្លងតាមសាឡាងដរមកកាន់ទីក្រុងកំពង់ឆ្នាំង ឆ្ពោះទៅផ្ទះលោក នៅស្រុកបរិបូរណ៍។ ប៉ុន្តែនៅពេលមានអ្នកកាសែតរាយការណ៍ លោក ឈួរ ច័ន្ទឌឿន អភិបាលខេត្តកំពង់ឆ្នាំងបានបញ្ជាក់ឲ្យសមត្ថកិច្ចចម្រុះចាប់ឃាត់ទុកសិន ដើម្បីត្រួតពិនិត្យលិខិតស្នាម។
ឮ
សមត្ថកិច្ចរដ្ឋបាលព្រៃឈើបានឲ្យដឹងទៀតថា កន្លងមក លោក មាន់ អ៊ានលី ធ្លាប់បានយកលិខិតប្រជាពលរដ្ឋស្នើសុំដឹកឈើ ធ្វើផ្ទះ ធ្វើជាល្បិចរកលុយ ដោយអនុញ្ញាតឲ្យពួកឈ្មួញដឹកឈើខុសច្បាប់ពីខេត្តកំពង់ធំ ចូលមកលក់ឲ្យដេប៉ូលក់ឈើនៅក្នុងស្រុកកំពង់លែង ហើយពេលសមត្ថកិច្ចចាប់បាន គាត់បានឡើងមកអន្តរាគមន៍សុំពីលោកអភិបាលខេត្ត ឬតុលាការខេត្តវិញថា ជាឈើរបស់ប្រជាពលរដ្ឋនៅក្នុងស្រុកបានសុំដឹកយកមកធ្វើផ្ទះ។
ដោយឡែក លោក មាន់ អ៊ានលី បានបញ្ជាក់ឲ្យដឹងថា គល់ឈើធ្នង់ទាំង៨ដុំខាងលើនេះគឺ៣ដុំបានកែច្នៃធ្វើជាតុរួចហើយ ឯ៥ដុំទៀតជាគល់ឈើចាស់ៗ ដែលនៅសល់ពីការគាស់ធ្វើផ្លូវនៅក្នុងស្រុកកំពង់លែង ហើយពេលនេះគាត់ជិតចូលនិវត្តន៍ហើយ ទើបគាត់ដឹកគល់ឈើទាំងនេះយកទៅទុកនៅផ្ទះ ដើម្បីកែច្នៃប្រើប្រាស់នៅក្នុងគ្រួសារគឺមិនមែនដឹកយកទៅលក់ដូរនោះឡើយ។ រឿងឈើនេះលោកនឹងស្នើសុំទៅលោកអភិបាលខេត្តកំពង់ឆ្នាំង ឲ្យជួយសម្រួលដោះស្រាយយកគល់ឈើទាំងអស់នេះយកទៅកែច្នៃប្រើប្រាស់វិញ។
ដោយឡែកសមត្ថកិច្ចខណ្ឌរដ្ឋបាលព្រៃឈើកំពង់ឆ្នាំងបានឲ្យដឹងថា គល់ឈើ និងរថយន្តនេះត្រូវរក្សាទុកជាបណ្ដោះអាសន្ននៅក្នុងខណ្ឌរដ្ឋបាលព្រៃឈើកំពង់ឆ្នាំង ដើម្បីរាយការណ៍ និងសុំយោបល់ថ្នាក់លើសម្រេច។
មតិប្រជាពលរដ្ឋឲ្យដឹងថា ពួកគាត់ដឹកឈើ១រទេះ ២រទេះ មេព្រៃចាប់ តែចៅហ្វាយស្រុក ឬអ្នកធំដឹកឈើប្រណិតទាំងឡានៗវិញ មេព្រៃមិនដែលចាប់ទេ តែបើចាប់បានដូចករណីនេះវិញថា ចាំសុំយោបល់ថ្នាក់លើសិន តើតម្លាភាពចំពោះផ្លូវច្បាប់នៅត្រង់ណាទៅ..!!៕
គល់ឈើធ្នង់មួយឡានរបស់លោកអភិបាលស្រុកកំពង់លែង ដឹកឆ្លងកាត់ខេត្តគ្មានច្បាប់ ត្រូវសមត្ថកិច្ចខណ្ឌរដ្ឋបាលព្រៃឈើកំពង់ឆ្នាំងចាប់ឃាត់ទុក
0 Comments