ភ្នំពេញ ៖ ការត្រួតពិនិត្យច្បាប់ចរាចរណ៍នៅថ្ងៃទី៣មករា សមត្ថកិច្ចបានរកឃើញយានយន្តល្មើសតាមដឹងផ្លូវជាង៨ពាន់គ្រឿង ក្នុងនោះមានម៉ូតូ៣.៧១២គ្រឿង និងរថយន្តចំនួន៥.៨៥៦គ្រឿង ព្រមទាំងធ្វើការផាកពិន័យជាទឹកប្រាក់ជាង៩០លានរៀល។
យោងតាមរបាយការណ៍នគរបាលចរាចរណ៍បានឲ្យដឹងថា យានយន្តបានចូលគោលដៅសម្រាប់ត្រួតពិនិត្យនៅទូទាំងប្រទេសនៅថ្ងៃទី៣នេះ មានចំនួនសរុប៣.០៣១២គ្រឿង ខណៈដែលយានយន្តល្មើសដែលត្រូវឃាតទុកមានចំនួន៧៣គ្រឿង។
សូមបញ្ជាក់ថា នៅថ្ងៃទី០១ ខែមករា កម្លាំងនគរបាលចរាចរណ៍ឃាត់យានយន្តល្មើសច្បាប់ចំនួន៧.៥១៩គ្រឿង។ ក្នុងនោះធ្វើការអប់រំចំនួន៤.៥៤៣គ្រឿង ផាកពិន័យ២.៩២៥គ្រឿង និងឃាត់យានយន្តទុកចំនួន១១០គ្រឿង។
នៅថ្ងៃទី២មករានេះ កម្លាំងនគរបាលចរាចរណ៍នៅទូទាំងប្រទេសបានដាក់គោលដៅត្រួតពិនិត្យការអនុវត្តច្បាប់ចរាចរណ៍ថ្មី ដោយសមត្ថកិច្ចបានរកឃើញ ឃើញមធ្យោបាយល្មើសចំនួន៧.៩៦៣គ្រឿង ក្នុងនោះធ្វើការពិន័យចំនួន៣.៧០៣គ្រឿង និងផាកពិន័យ៤.២៦០គ្រឿង និងបានឃាត់ទុក១៤៩គ្រឿង។
លោក ហ៊ឹម យ៉ាន់ ធ្លាប់បានឲ្យដឹងថា ក្នុងការរឹតបន្តឹងការអនុវត្តច្បាប់ចរាចរណ៍ផ្លូវគោកនេះសមត្ថកិច្ចបានរកឃើញយានយន្តល្មើសច្បាប់ចរាចរណ៍មានចំនួន៧ដងលើសថ្ងៃធម្មតាមុនពេលមានការរឹតបន្តឹងច្បាប់ចរាចរណ៍ផ្លូវគោក។ លោកឲ្យដឹងទៀតថា ការពិន័យលើម្ចាស់យានយន្តល្មើសច្បាប់នេះ គឺដើម្បីឲ្យម្ចាស់យានយន្តទាំងនោះរាងចាល និងចេះគោរពច្បាប់ចរាចរណ៍។
លោក ហ៊ឹម យ៉ាន់ អំពាវនាវឲ្យប្រជាពលរដ្ឋទាំងអស់ត្រូវគោរពច្បាប់ចរាចរណ៍ផ្លូវគោកទាំងអស់គ្នា ដើម្បីកាត់បន្ថយគ្រោះថ្នាក់ចរាចរណ៍។ លោកថាការរឹតបន្តឹងនេះនឹងត្រូវបន្តធ្វើទៅ “ដូចភ្លៀងរលឹម”។
លោកក៏បានកោតសរសើរថា ប្រជាពលរដ្ឋកម្ពុជាមានការយល់ដឹង និងគោរពច្បាប់ចរាចរណ៍បានល្អ ក្នុងនោះមានប្រជាពលរដ្ឋប្រមាណ៨០-៩០ភាគរយ បានយល់ពីច្បាប់ និងចូលរួមគោរពច្បាប់ចរាចរណ៍នៅសល់ប្រជាពលរដ្ឋតិចតួចប៉ុណ្ណោះ មិនទាន់បានយល់ដឹង និងមិនចូលរួមគោរពច្បាប់ចរាចរណ៍ផ្លូវគោកថ្មីនេះ៕
ថ្ងៃទី៣ នៃការអនុវត្តច្បាប់ចរាចរណ៍ សមត្ថកិច្ចត្រួតពិនិត្យ និងពិន័យយានយន្តល្មើសបានថវិកាជាង៩០លានរៀល
0 Comments