ឧត្តរមានជ័យ ៖ ប្រជាពលរដ្ឋដែលមានភូមិនៅជាប់ជើងភ្នំដងរែក នៅក្នុងភូមិសាស្ត្រច្រកអន្តរជាតិជាំសាង៉ាំ ស្រុកអន្លង់វែងកំពុងជួបនូវបញ្ហាសុខភាព ដែលជាទុក្ខព្រួយប្រចាំជីវិតរបស់ពួកគាត់ ដោយសា ក្រុមផលសាម៉នខេមរៈអភិវឌ្ឍន៍ បានយកអាជ្ញាប័ណ្ណក្រុមហ៊ុនអភិវឌ្ឍន៍ប្រទេសជាតិ ! មកបើកល្បែង (បាញ់កាំជ្រួច ប្រភេទចម្ងាយ ! ភ្នាល់ចាក់លុយ ) នៅលើខ្នងភ្នំចំណុចជាំសាង៉ាំ ជ្រកកោនក្រោមអាជ្ញាប័ណ្ណក្រសួង បានធ្វើឲ្យប៉ះពាល់ដល់សុខភាព និងធ្លាក់ទៅលើលំនៅដ្ឋានរបស់ពួកគាត់ទៀតផង។
ប្រជាពលរដ្ឋបាននិយាយថា រៀងរាល់ថ្ងៃសុក្រ ថ្ងៃសៅរ៍ និងថ្ងៃអាទិត្យ ពួកគាត់មិនហ៊ានចេញពីផ្ទះ ទៅចម្ការ ដើម្បីដកដំឡូងមី ឬទៅណាបាននោះទេ ព្រោះតែខ្លាចសំបកកាំជ្រួច ដែលបាញ់ភ្នាល់គ្នានៅលើភ្នំធ្លាក់ចំ អាចបណ្ដាលឲ្យពួកគាត់ គ្រោះថ្នាក់ដល់អាយុជីវិត ព្រោះកន្លងមកសំបកកាំជ្រួចទាំងនោះ បានធ្លាក់ទៅលើលំនៅដ្ឋាន ដីចម្ការពួក គាត់ញឹកញាប់ណាស់ សំបកកាំជ្រួចទាំងនោះវាជាប្រភេទបំពង់ទីបជ័រ និងដើមឫស្សី ដែលមានប្រវែងពី ៥ ទៅ ៦ម៉ែត្រ អាចឆក់យកជីវិតមនុស្សបានយ៉ាងងាយ។
ប្រជាពលរដ្ឋបានបញ្ជាក់ថា កន្លងមកពួកគាត់បានរាយការណ៍ទៅអាជ្ញាធរមូលដ្ឋាន ជាញឹកញយផងដែរ ក៏ប៉ុន្តែបែរជាអាជ្ញាធរនិយាយថា បើមានប៉ះពាល់អ្វីខាងក្រុមហ៊ុនធានាសងទាំងអស់។
ប្រជាពលរដ្ឋបន្ថែមថា ចាប់តាំងពីក្រុមហ៊ុនមួយនេះបើកល្បែងបាញ់កាំជ្រួចភ្នាល់គ្នា នៅលើខ្នងភ្នំដងរែក រហូតមកដល់ពេលនេះមានរយៈពេលជាង១ឆ្នាំ កន្លងមកពួកគាត់ស្រូបយកខ្យល់អាកាសផ្សែងធម្មជាតិកាំជ្រួចរបស់ក្រុមហ៊ុនមួយនេះ រហូតមានជំងឺផ្សេងៗទៀតផង ជាពិសេសក្មេងតូចៗដែលជាទំពាំងស្នងឫស្សីនោះ។
លោក ហោ ជិនវីរៈយុទ្ធ អភិបាលស្រុកអន្លង់វែងបានបំភ្លឺតាមទូរស័ព្ទថា ក្រុមហ៊ុនបើកល្បែងបាញ់ កាំជ្រួចភ្នាល់ ធ្វើឲ្យប៉ះពាល់ដល់ប្រជាពលរដ្ឋ លោកបានជ្រាបជាតំណឹងហើយ ព្រោះកន្លងមកនេះមានប្រជាពលរដ្ឋមកធ្វើការតវ៉ាឲ្យក្រុមហ៊ុនសងថ្លៃខូចខាត ដែលកាំជ្រួចបានធ្លាក់ទៅលើលំនៅដ្ឋាន និងផលស្រែចម្ការរបស់ពួកគាត់។ លោកអភិបាលស្រុកបញ្ជាក់ថា ចំពោះក្រុមហ៊ុនខាងលើបើកទីតាំងបាញ់កាំជ្រួចភ្នាល់មួយនេះគឺមាន អាជ្ញាប័ណ្ណគ្រប់គ្រាន់ចេញដោយក្រសួង ម្យ៉ាងទៀតស្ថិតនៅក្នុងដែនសមត្ថកិច្ចគ្រប់គ្រងរបស់អគ្គស្នងការ។
តាមការបញ្ជាក់ពីមន្ត្រីទំនាក់ទំនងព្រំដែនប្រចាំច្រកអន្តរជាតិជាំសាង៉ាំម្នាក់ ដែលសុំមិនបញ្ចេញឈ្មោះបានឲ្យដឹងថា ទីតាំងបាញ់កាំជ្រួចភ្នាល់ ភ្នាល់ចាក់លុយខាងលើ បានលក់សំបុត្រឲ្យអតិថិជនជាអ្នកភ្នាល់ល្បែងក្នុងម្នាក់ៗ ៥០០ ប្រាំរយបាត (ថៃ) ស្មើនឹងប្រាក់ជាង ៥ ម៉ឺនរៀល អតិថិជនទាំងនោះមានកម្ពុជា និងជនជាតិថៃរាប់រយនាក់ ព្រមទាំងព្រះសង្ឃថៃទៀតផង។ ប្រភពបញ្ជាក់ទៀតថា ចំពោះការបើកឲ្យលេងល្បែងបាញ់កាំជ្រួចភ្នាល់ខាងលើ នៅក្នុងប្រទេសថៃ គេពុំមានច្បាប់អនុញ្ញាតឲ្យលេងនោះទេ ព្រោះគេចាត់ទុកថា ជាល្បែងគ្រោះថ្នាក់ ដល់អាយុជីវិតមនុស្ស និងផ្សែងកាំជ្រួចធ្វើឲ្យប៉ះពាល់ដល់បរិស្ថានផងដែរ៕
ប្រជាពលរដ្ឋនៅក្នុងស្រុកអន្លង់វែង កំពុងព្រួយបារម្ភពីសុខភាព សុវត្ថិភាព ដែលក្រុមហ៊ុនមួយបើកទីតាំងភ្នាល់កាំជ្រួច
0 Comments