អ្នកប្រដាល់ មាស ច័ន្ទមាន អ្នកប្រដាល់ជើងខ្លាំងនៃសមាគមកីឡាក្រសួងការពារជាតិ គេនឹងត្រូវជួបប្រកួតសងសឹកជាមួយ Phach Nam Ek នាព្រឹកថ្ងៃអាទិត្យ ទី១០ ខែមករា ឆ្នាំ២០១៦ នៅសង្វៀនGanzberg របស់SEA-TV ។ ពីរនាក់នេះ ប្រកួតគ្នាក្នុងប្រភេទទម្ងន់៦២គ.ក្រ។
អ្នកប្រដាល់ថៃរូបនេះ ធ្លាប់មកប្រកួតនៅកម្ពុជាចំនួន៤លើកហើយកន្លងមក។ គេមកលើកទី១(០៤តុលា២០១៥) វាយចាញ់ ឡៅ ចន្ទ្រា អ្នកប្រដាល់ក្លិបកងពលតូចទ័ពឆ័ត្រយោង៩១១ដោយពិន្ទុ លើកទី២(២៤តុលា២០១៥) Phach Nam Ek ប្រកួតឈ្នះ ឈឿន ឆៃដែន អ្នកប្រដាល់ក្លិបនិរោធមានជ័យដោយពិន្ទុ ,លើកទី៣(០៧វិច្ឆិកា២០១៥) គេបានវាយឈ្នះ មាស ច័ន្ទមាន សមាគមកីឡាក្រសួងការពារជាតិដោយពិន្ទុ និងលើកទី៤ (០៥ធ្នូ២០១៥) គេវាយស្មើជាមួយ សុខ សុវណ្ណ អ្នកប្រដាល់ក្លិបកងពលតូចលេខ៣១។
តាមអ្នកផ្គូផ្គងឲ្យដឹងថា Phach Nam Ek នេះនៅស្រុកថៃ គេជាជើងខ្លាំងក្នុងប្រភេទទម្ងន់៦២គ.ក្រនេះ ។ កាលដែលនាំយក Phach Nam Ek ឲ្យប្រកួតលើកនេះ គឺដើម្បីផ្តល់ឱកាសឲ្យ មាស ច័ន្ទមាន ធ្វើការសងសឹកវិញ។
មាស ច័ន្ទមាន ជើងខ្លាំងរបស់កម្ពុជាយើងនេះ ធ្លាប់វាយឈ្នះថៃ៤នាក់ និងចាញ់ អ្នកប្រដាល់ថៃ១ម្នាក់គឺ Phach Nam Ek នេះឯង។ ដូច្នេះ ចាំមើល មាស ច័ន្ទមាន អាចវាយឈ្នះអ្នកប្រដាល់ថៃ Phach Nam Ek រូបនេះ បានឬអត់ ?។
Phach Nam Ek នេះ មានប្រវត្តិប្រកួត៧៦លើក វាយឈ្នះ៦២លើក ចាញ់១៣លើក និងស្មើ០១លើក ខណៈដែល មាស ច័ន្ទមាន គេមានប្រវត្តិប្រកួតចំនួន១១៦លើក ក្នុងនោះឈ្នះ៩៣លើក ចាញ់២៣លើក និងមិនដែលស្មើ។
ច័ន្ទមាន ថ្វីត្បិតតែរាងទាបបន្តិចក្តី ប៉ុន្តែវាយខ្លាំងពិសេសកណ្ដាប់ដៃ និងទាត់ជើងក្រោម មានអ្នកប្រដាល់បរទេស និងអ្នកប្រដាល់រួមជាតិមិនតិចទេ ដែលត្រូវ ច័ន្ទមាន ផ្ដួលឲ្យចុះចាញ់ និងសន្លប់លើរេញនោះ។ ចាំមើល មាស ច័ន្ទមាន គេអាចសងសឹក Phach Nam Ek បានសម្រេច ឬអត់។
ង៉ែត្រ រដ្ឋា អ្នកប្រដាល់ក្លិបតាព្រហ្មមានជ័យនឹងជួបប្រកួតជាមួយអ្នកប្រដាល់ថៃ ឈ្មោះ RE DA ដោយប្រកួតក្នុងទម្ងន់៦០គ.ក្រ។ អ្នកប្រដាល់ថៃរូបនេះ ធ្លាប់មកប្រកួតនៅកម្ពុជាម្តងហើយ កាលពីថ្ងៃទី២៣ ខែសីហា ឆ្នាំ២០១៥ ដោយវាយឈ្នះ សេក គឹមផៃ អ្នកប្រដាល់ក្លិបអង្គរមានជ័យខេត្តសៀមរាបដោយពិន្ទុ។
RE DA គេមិនជាខ្លាំងប៉ុន្មានទេ ឆ្លងតាមការប្រកួតជាមួយ សេក គឹមផៃ កន្លងមកនោះ ។ អ្នកប្រដាល់ថៃរូបនេះ មានប្រវត្តិប្រកួត៩៨លើក វាយឈ្នះ៧៨លើក ចាញ់១៦លើក និងស្មើ០៤លើក ខណៈដែល ង៉ែត្រ រដ្ឋា គេមានប្រវត្តិប្រកួតចំនួន៧១លើក ឈ្នះ៦១លើក ចាញ់០៨លើក និងស្មើ០២លើក ។
ទោះជាយ៉ាងណា ង៉ែត្រ រដ្ឋា ត្រូវតែខំព្យាយាមខ្លាំងមែនទែន ទើបមានសង្ឃឹមឈ្នះ RE DA នោះ បើមិនដូច្នោះទេ គឺចាញ់ទៀតហើយ ព្រោះថា អ្នកប្រដាល់ថៃរូបនេះ ស្នៀតប្រដាល់មិនជាប៉ុន្មានទេ តែគេមានកម្លាំងស៊ុហ្វខ្លាំង គឺវាយបុកដោយកម្លាំងបាយតែម្តង។
ង៉ែត្រ រដ្ឋា ធ្លាប់វាយជាមួយថៃចំនួន៧នាក់ហើយ ដោយឈ្នះ១នាក់ ចាញ់៥នាក់ និងអត់ប្រកាសលទ្ធផល១នាក់។ ដូច្នេះជាលើកទី៨សម្រាប់គេស្ដារកេរ្តិ៍ឈ្នះឡើងវិញ ក្នុងការដែលជួបប្រកួតជាមួយថៃRE DA នេះ។
ចាំមើល ង៉ែត្រ រដ្ឋា អាចវាយឈ្នះអ្នកប្រដាល់ថៃ RE DA ដែលមកនេះ បាន ឬអត់ ?។ រដ្ឋា មួយរយៈចុងក្រោយនេះ គេរាងធ្លាក់ចុះច្រើនជាងមុន ដោយវាយចាញ់ទាំងអ្នកប្រដាល់រួមជាតិស្រករក្រោយផង។
ចំពោះការប្រកួតរវាងអ្នកប្រដាល់រួមជាតិវិញ ធន់ ដារ៉ា អ្នកប្រដាល់ក្លិបមជ្ឈមណ្ឌលកីឡាខ.ភ.ម នឹងឡើងសងសឹក គៀន បញ្ញា អ្នកប្រដាល់ក្លិបរស្មីកុមារកំព្រា ដោយប្រកួតគ្នាក្នុងទម្ងន់៦៣,៥០០គីឡូក្រាម។
ពីរនាក់នេះ ពិបាកទាយថា អ្នកណាឈ្នះ អ្នកណាចាញ់ណាស់ ដោយសារពួកគេទាំងពីរមានថ្វីដៃល្អប្រហាក់ប្រហែលគ្នា។ អ្នកប្រដាល់ទាំងពីរនាក់នេះ សុទ្ធតែផ្លែល្អដូចគ្នា ដូច្នេះអ្នកណា ឈ្នះអ្នកណាចាញ់នោះ មិនអាចទាយមុនបានទេ។
អ្នកប្រដាល់ជើងថ្មីពីរនាក់គឺ លីន ជី ក្លិបបូរីរាជសីហ៍មានរិទ្ធ និង បឺត ចើត ក្លិបរ៉ាហាប់ស្វាយប៉ាកដោយប្រកួតគ្នាក្នុងទម្ងន់៦០គីឡូក្រាម។ ចំណែក សេក សុខសរ អ្នកប្រដាល់ក្លិបអង្គរមានជ័យខេត្តសៀមរាប ត្រូវជួបប្រកួតជាមួយ សូយ សុគន្ធ អ្នកប្រដាល់ក្លិបពោធិជ័យកីឡា៕
មាស ច័ន្ទមាន សងសឹក Phach Nam Ek ង៉ែត្រ រដ្ឋា ជួប RE DA នៅSEA-TV
0 Comments