*លីន អ៊ីស្សខយ ជួប ឯម វុត្ថា
អ្នកប្រដាល់ជើងខ្លាំងរបស់កម្ពុជា រឿង សោភ័ណ្ឌ ក្លិបម្កុដរាជសីហ៍ បន្ទាប់ពីវាយស្មើជាមួយអ្នកប្រដាល់ថៃDebachong កាលពីថ្ងៃទី២០ ខែធ្នូ ឆ្នាំ២០១៥ កន្លងមកនេះ ពេលនេះគេនឹងត្រូវជួបប្រកួតជាមួយអ្នកប្រដាល់ថៃមួយរូបទៀត គឺ Thorng Thai នៅយប់ថ្ងៃសៅរ៍ ទី០៩ ខែមករា ឆ្នាំ២០១៦នេះ លើសង្វៀនបាយ័នស្ទឹងមានជ័យ។
នេះជាការជួបប្រកួតជាលក្ខណៈមិត្តភាពអន្តរជាតិ ក្នុងប្រភេទទម្ងន់៦៩គីឡូក្រាម។ Thorng Thai នេះ មិនធ្លាប់មកប្រកួតជាមួយអ្នកប្រដាល់កម្ពុជាម្តងណាទេកន្លងមក។
បើតាមអ្នកផ្គូផ្គងឲ្យដឹងនោះថា អ្នកប្រដាល់ថៃរូបនេះ ជាជើងខ្លាំងមួយរូបនៅប្រទេសថៃ ក្នុងប្រភេទទម្ងន់មធ្យមនេះ។ ប៉ុន្តែគេមិនដឹងថា Thorng Thai មានប្រវត្តិប្រកួតប៉ុន្មានលើកនោះឡើយ។
ទោះជាយ៉ាងណា Thorng Thai មកជួបប្រកួតជាមួយ រឿង សោភ័ណ្ឌ ដែលមានប្រវត្តិប្រកួតចំនួន១៣៨លើក ឈ្នះ១២៦លើក ចាញ់១០លើក និងស្មើ០២លើកនោះ Thorng Thai ប្រហែលជាមានសង្ឃឹមតិចតួចណាស់ក្នុងការឈ្នះ សោភ័ណ្ឌ នោះ។
លីន អ៊ីស្សខយ ក្លិបពន្លឺសាមគ្គីខេត្តបាត់ដំបង ដែលជាអ្នកប្រដាល់ជើងចាស់ ហើយបានបាត់មុខពីសង្វៀនចង់មួយទសវត្សទៅហើយនោះ និងទើបបង្ហាញមុខនៅលើសង្វៀនភ្នំពេញវិញ កាលពីចុងខែតុលា ឆ្នាំ២០១៥កន្លងមកនោះ គេនឹងមកជួបប្រកួតជាមួយ ឯម វុត្ថា អ្នកប្រដាល់ក្លិបឫទ្ធីពោធិសែនជ័យ។ អ្នកប្រដាល់ទាំងពីរនេះ នឹងប្រកួតគ្នាក្នុងទម្ងន់៧០គីឡូក្រាម។
បើរំលឹកឡើងវិញពីជាង១០ឆ្នាំមុន លីន អ៊ីស្សខយ ជាជើងខ្លាំងមួយរូបក្នុងចំណោម ជើងខ្លាំងៗជាច្រើន ដែលបានអង្រួនសង្វៀនបុរីកីឡា តែក្រោយមកគេបានបាត់មុខរហូតដល់បច្ចុប្បន្ននេះ។
លីន អ៊ីស្សខយ បានលេចមុខមកកាន់សង្វៀនវិញកាលពីចុងខែតុលាកន្លងមកនេះ នៅសៀមរាប ដោយប្រកួតចាញ់ ជួង ទីតា អ្នកប្រដាល់ក្លិបខ្លារខិនមានរិទ្ធដោយពិន្ទុ និងមកលើកក្រោយទៀត(២២វិច្ឆិកា២០១៥) គេវាយចាញ់ ម៉ូ រដ្ឋា អ្នកប្រដាល់ក្លិបព្រៃទទឹងខេត្តបាត់ដំបងដោយពិន្ទុ មិនអាចនិយាយថា លីន អ៊ីស្សខយ អាចឈ្នះ ឯម វុត្ថា នោះឡើយ ព្រោះគេមកសាកពីរប្រកួតរួចហើយ វាយចាញ់ទាំងពីរលើក ហើយគេផ្គូត្រឹមអ្នកប្រដាល់ល្មមៗដូច ជួង ទីតា និង ម៉ូ រដ្ឋា នោះ។
ឯម វុត្ថា គេមានកម្រិតសមត្ថភាពលើ ជួង ទីតា និង ម៉ូ រដ្ឋា។ វុត្ថា ប្រកួតលើកចុងក្រោយនេះ (២៦ធ្នូ ២០១៥) វាយឈ្នះ សរ សី អ្នកប្រដាល់សមាគមកីឡាក្រសួងការពារជាតិដោយពិន្ទុ។
ដូច្នេះ សម្រាប់ការឡើងប្រកួតរបស់ លីន អ៊ីស្សខយ ជាលើកទី៣ ក្រោយការវិលមកសង្វៀនវិញនេះ អ៊ីស្សខយ ក៏ប្រហែលជាពិបាកនឹងយកឈ្នះ ឯម វុត្ថា នោះដែរ។
ឡូញ វ៉ាន់ឌី អ្នកប្រដាល់ក្លិបពន្លឺវិបុលរិទ្ធី ដែលទើបឈ្នះពានរង្វាន់បាយ័នក្នុងប្រភេទ ទម្ងន់៥៧គីឡូក្រាម ត្រូវគេផ្គូឲ្យប្រកួតជាមួយ នូវ ដារ៉ូ អ្នកប្រដាល់ក្លិបនាគរាជមានជ័យ។ វ៉ាន់ឌី និង នូវ ដារ៉ូ នេះ ពុំដែលប៉ះគ្នាទេកន្លងមក។
នូវ ដារ៉ូ ជាអ្នកប្រដាល់ជើងថ្មី ដែលទើបតែឡើងប្រកួតប៉ុណ្ណោះ។ គេឡើងប្រកួតលើកដំបូងនោះបានវាយឈ្នះ ឯម ភូលូ អ្នកប្រដាល់ក្លិបឫទ្ធីពោធិសែនជ័យដោយពិន្ទុកាលពីថ្ងៃទី១៨ ខែធ្នូ ឆ្នាំ២០១៥ ។
ទោះជាយ៉ាងណា នូវ ដារ៉ូ ជួបប្រកួតជាមួយ ឡូញ វ៉ាន់ឌី លើកនេះ ប្រហែលជាពុំមាន សង្ឃឹមថាឈ្នះ វ៉ាន់ឌី នោះទេ ព្រោះបើតាមការកត់សម្គាល់ពីសមត្ថភាពបច្ចេកទេសនោះ គឺ ដារ៉ូ នៅអន់ខ្សោយជាង វ៉ាន់ឌី។ ដូច្នេះ ចាំមើលពីរនាក់នេះជួបគ្នា តើនរណាជាអ្នកឈ្នះនោះ ?។
ឯម ម៉ូលី អ្នកប្រដាល់ក្លិបឫទ្ធីពោធិសែនជ័យនឹងជួបប្រកួតជាមួយជើងថ្មី បឺត ជើត អ្នកប្រដាល់ក្លិបរ៉ាហាប់ស្វាយប៉ាក ដោយប្រកួតក្នុងទម្ងន់៦០គីឡូក្រាម។ បឺត ជើត នេះ មិនដឹងថា អាចទៅរួចជាមួយឯម ម៉ូលី ឬអត់ទេ? ព្រោះ ម៉ូលី ជាអ្នកប្រដាល់ជើងចាស់៕
រឿង សោភ័ណ្ឌ ជួប Thorng Thai នៅសង្វៀនស្ទឹងមានជ័យ
0 Comments