អ៊ុង វិរៈ ផ្ដួល Yorth Dachha ទឹក១ ខណៈ វៀត ប៊ុនឌឿន ឈ្នះ Yorth Sanan ដោយពិន្ទុនៅSEA-TV

*សង្វៀនGanzberg

អ៊ុង វិរះ អ្នកប្រដាល់ជើងខ្លាំងនៃក្លិបកងពលតូចទ័ពឆ័ត្រយោង៩១១ បានប្រើពេលមិនដល់មួយទឹកទេ ផ្ដួលអ្នកប្រដាល់ថៃ Yorth Dachha ឲ្យសន្លប់ក្នុងទឹកទី១ កាលពីព្រឹកថ្ងៃអាទិត្យ ទី០៣ ខែមករា នៅលើសង្វៀន SEA-TV ក្នុងកម្មវិធីប្រដាល់ Ganzberg។

Yorth Dachha គេចាញ់កម្ពស់ អ៊ុង វិរៈ ដាច់ពេក ទើបផុយសន្លប់បែបនេះ។ វិរះ បានប្រើកណ្ដាប់ដៃឆ្វេងដាល់ចំគល់ថ្គាមខាងស្តាំរបស់ Yorth Dachha បណ្ដាលឲ្យអ្នកប្រដាល់ថៃរូបនេះ រលំដួលលើរេញសន្លប់លែងក្រោកតែម្តង។ Yorth Dachha នេះ ជាអ្នកប្រដាល់ថៃទី១៥ហើយ ដែលត្រូវ អ៊ុង វិរៈ ផ្ដួលយកឈ្នះនោះ។

វៀត ប៊ុនឌឿន អ្នកប្រដាល់ជើងខ្លាំងក្លិបក្រសួងការពារជាតិ បានវាយឈ្នះអ្នកប្រដាល់ខ្លាំងប្រចាំប្រទេសថៃគឺ Yorth Sanan ក្នុងទឹកទី៤។

Yorth Sanan ដែលមានស្ថិតិប្រកួត៦៣លើក វាយឈ្នះ៥៣លើក និងចាញ់១០លើក និងធ្លាប់បានផ្ដួលជើងខ្លាំងរបស់កម្ពុជា សារឿន ច័ន្ទ អ្នកប្រដាល់ក្លិបតាព្រហ្មមានជ័យ ឲ្យសន្លប់ក្នុងទឹកទី២កាលពីថ្ងៃទី១៣ ខែធ្នូ ឆ្នាំ២០១៥កន្លងមកនោះ ពេលនេះត្រូវ វៀត ប៊ុនឌឿន ផ្ដួលឲ្យបោះបង់ចោលការប្រកួតក្នុងទឹកទី៤ បន្ទាប់ពី ប៊ុនឌឿន ទាត់ឲ្យខូចជើងឆ្វេងនោះ។

វៀត ប៊ុនឌឿន គេព្យាយាមទាត់ជើងក្រោមរបស់ Yorth Sanan តាំងពីក្នុងទឹកទី១មកម្ល៉េះ តែអ្នកប្រដាល់ថៃរូបនេះ គេមិនខ្ចីឈឺ លុះមកដល់ទឹកនេះ ប៊ុនឌឿន ទាត់ចំសន្លាក់ក្បាលជង្គង់ខាងឆ្វេង ធ្វើឲ្យ Yorth Sanan ដួលក្រោកលែងរួចតែម្តង។

សម្រាប់ការប្រកួតខ្មែរ និងខ្មែរវិញ ហុង ចាយ អ្នកប្រដាល់ក្លិបពន្លឺសាមគ្គី ខេត្តបាត់ដំបង ដែលឡើងសងសឹក យឹម សារុន អ្នកប្រដាល់ក្លិបកងពលតូចលេខ៣១នោះ គឺត្រូវបរាជ័យក្នុងទឹកទី២ ដោយត្រូវ សារុន ទាត់ឲ្យខូចដៃខាងឆ្វេង។

អ្នកប្រដាល់ទាំងពីរនេះ កាលពីជួបគ្នាលើកទីមួយនោះ (ថ្ងៃទី០៤ តុលា ២០១៥) យឹម សារុន បានបំបាក់ ហុង ចាយ ឲ្យសន្លប់ក្នុងទឹកទី ៤។ ជួបគ្នាលើកនេះ ហុង ចាយ បោះបង់ការប្រកួតក្នុងទឹកទី២។

អ្នកប្រដាល់ជា រឿនឈី ក្លិបអមតៈគុនខ្មែរខេត្តសៀមរាប ប្រកួតចាញ់ សេក មេសា អ្នកប្រដាល់ក្លិបអង្គរមានជ័យមកពីខេត្តសៀមរាបជាមួយគ្នា ដោយពិន្ទុ៕

*សង្វៀន Black Cat

ចាន់ ប៊ុនហឿន អ្នកប្រដាល់ក្លិបនិរោធមានជ័យ និង ធី តុងហ៊ី អ្នកប្រដាល់ក្លិបសាលវ័ន្តកីឡា ពួកគេទាំងពីរនាក់នេះ បានវាយឈ្នះអ្នកប្រដាល់ថៃដូចគ្នា ក្នុងការជួបប្រកួតនៅលើសង្វៀនBlack Cat របស់SEA-TV នាយប់ថ្ងៃអាទិត្យ ទី០៣ ខែមករានេះ។

ប៊ុនហឿន បានផ្ដួលអ្នកប្រដាល់ថៃ Kang Prachin ក្នុងទឹកទី៣។ ក្នុងការប្រកួតគ្នាទឹកទី១នោះ Kang Prachin ត្រូវ ប៊ុនហឿន ដាល់ត្រូវកណ្ដាលមុខប៊ិះតែនឹងសន្លប់ ប៉ុន្តែក្រោយពីអាជ្ញាកណ្ដាលរាប់ដល់៨ Kang Prachin ឡើងប្រកួតបន្តទៀត។ មកដល់ទឹកទី២ Kang Prachin ក៏ត្រូវ ប៊ុនហឿន ដាល់ដួលម្តងទៀតដែរ ហើយត្រូវអាជ្ញាកណ្ដាលរាប់ដល់៨មួយដងទៀត។ ជាលើកទី៥របស់ ប៊ុនហឿន ហើយ ដែលគេឡើងប្រកួតជាមួយថៃនេះ។

Kang Prachin នេះ ទៅមិនរួចជាមួយ ចាន់ ប៊ុនហឿន នោះឡើយ ដោយក្នុងទឹកទី៣ត្រូវ ចាន់ ប៊ុនហឿន វាយឲ្យដួលជាលើកទី៣ និងបានបោះបង់ចោលការប្រកួតក្នុងទឹកទី៣នេះតែម្តង។

ចំណែក ធី តុងហ៊ី គេបានវាយឈ្នះអ្នកប្រដាល់ថៃឈ្មោះ Play Noy ត្រឹមពិន្ទុប៉ុណ្ណោះ។ តុងហ៊ី អ្នកប្រដាល់របស់កម្ពុជារូបនេះ បានវាយកែងឲ្យ Play Noy បែកឈាមថ្ងាសក្នុងទឹកទី៤ ដល់ទឹកទី៥ Play Noy ក៏បានវាយធីតុងហ៊ី ឲ្យបែកចុងចិញ្ចើមឆ្វេងវិញដែរ។

ទោះជាយ៉ាងណា Play Noy គេចាញ់ពិន្ទុ ធី តុងហ៊ី តាំងពីក្នុងទឹកទី១ និងទឹកទី២មកម្ល៉េះ ហើយទឹកទី៤ក៏ តុងហ៊ី មានប្រៀបឈ្នះដែរ។ ដូច្នេះហើយទើបគេឈ្នះ Play Noy ដោយពិន្ទុនេះ។

ចំពោះការប្រកួតរវាងអ្នកប្រដាល់រួមជាតិវិញ ចាប សុភា អ្នកប្រដាល់ក្លិបតាឯកដំបងដែកមានរិទ្ធ ប្រកួតចាញ់ ឡូញ វ៉ាន់ឌី អ្នកប្រដាល់ក្លិបពន្លឺវិបុលរិទ្ធី ដោយពិន្ទុ ឯ សុខុន រីហ្គាវុត្ថា អ្នកប្រដាល់ក្លិបកុមារទេពមានរិទ្ធ ប្រកួតឈ្នះ សែន រ៉ាដូ អ្នកប្រដាល់ក្លិបអប្សរាគុនខ្មែរដោយពិន្ទុដែរ៕

*សង្វៀនCambodia

ភុំ សារ៉ាយ អ្នកប្រដាល់ក្លិបកងពលតូចលេខ៣១ បានប្រកួតឈ្នះអ្នកប្រដាល់ ម៉ូ រដ្ឋា ក្លិបព្រៃទទឹងខេត្តបាត់ដំបង ក្នុងការជួបគ្នានៅលើសង្វៀនCambodiaរបស់SEA-TV កាលពីល្ងាចថ្ងៃអាទិត្យ ទី០៣ខែមករា ឆ្នាំ២០១៦ នេះ។

តាមពិត សារ៉ាយ ត្រូវជួបជាមួយ លួន សុខខេង ក្លិបអាស៊ីកីឡានោះទេ តែមិនដឹងយ៉ាងណា ទើបប្ដូរមកជា ម៉ូ រដ្ឋា វិញនោះ។

ម៉ូ រដ្ឋា ប៉ះជាមួយ ភុំ សារ៉ាយ ទៅមិនរួចជាមួយអ្នកប្រដាល់ជើងចាស់នោះទេ ដោយត្រូវ សារ៉ាយ ដេញវាយ និងមានប្រៀបឈ្នះសឹងតែគ្រប់ទឹកតែម្តង តែយ៉ាងណា សារ៉ាយ ឈ្នះ រដ្ឋា ត្រឹមពិន្ទុប៉ុណ្ណោះ ក្រោយពីបញ្ចប់ការប្រកួត៥ទឹកនោះ។

ធន់ ចាន់តាក់ អ្នកប្រដាល់ជើងថ្មី ក្លិបមជ្ឈមណ្ឌលកីឡាខ.ភ.ម បានផ្ដួលអ្នកប្រដាល់ ផន ភឿត ក្លិបឃ្លាំងមឿងខេត្តពោធិ៍សាត់ ឲ្យសន្លប់ក្នុងទឹកទី១។ ចំណែក ភួង ពិសិដ្ឋ អ្នកប្រដាល់ក្លិបតាឡីដំរីមានរិទ្ធ បានយកឈ្នះ ឡុង សម្ផស្ស អ្នកប្រដាល់ក្លិបសាលវ័ន្តកីឡា ដោយពិន្ទុដែរ។

អាន ទាវ អ្នកប្រដាល់ក្លិបសុភានូមានជ័យ ក៏ប្រកួតឈ្នះ កែវ ឌីណា អ្នកប្រដាល់ក្លិបរ៉ាហាប់ស្វាយប៉ាកដោយពិន្ទុដែរ៕

*សង្វៀនK.Cement

នៅលើសង្វៀន K.Cement របស់SEA-TV កាលពីរសៀលថ្ងៃសៅរិ៍ ទី០២ ខែមករា ឆ្នាំ២០១៦ ឡៅ ផានាថ អ្នកប្រដាល់ក្លិបម្កុដរាជសីហ៍ ដែលឡើងប្រកួតជំនួស តក់ សោភ័ណ្ឌ នោះ បានវាយចាញ់ ធា នុរាជ អ្នកប្រដាល់ក្លិបពោធិជ័យកីឡាដោយពិន្ទុ។

ក្នុងការប្រកួតប្រាំទឹកនោះ ឡៅ ផានាថ វាយចាញ់នុរាជដាច់តែម្តង ព្រោះថា ផានាថ មិនសមធ្វើជាដៃគូប្រកួតជាមួយ ធា នុរាជ នោះឡើយ។

គុន សំណង អ្នកប្រដាល់ក្លិបគីសែមានរិទ្ធ ប្រកួតចាញ់ ម៉ន រ៉ៃយ៉ា អ្នកប្រដាល់ក្លិបការិយាល័យទី៥កងទ័ពជើងគោកដោយពិន្ទុ ខណៈដែល យុគ យក្សខួច អ្នកប្រដាល់ក្លិបអប់រំកាយនិងកីឡាខេត្តបាត់ដំបង ប្រើពេលតែ៣ទឹកប៉ុណ្ណោះ ក្នុងការផ្ដួល សែត ប៊ូកើត អ្នកប្រដាល់ក្លិបដួងសែនសុខគុនខ្មែរឲ្យបោះបង់ការប្រកួត បន្ទាប់ពី ប៊ូកើត បែកឈាមខ្លាំងហូរកាត់ភ្នែក រំខានដល់ការប្រកួតនោះ ហើយគ្រូពេទ្យបានបញ្ឈប់លែងឲ្យប្រកួតតែម្តង។

សំរាំង ភក្តី អ្នកប្រដាល់ក្លិបព្រៃទទឹងខេត្តបាត់ដំបង បានប្រកួតឈ្នះ សែម ឆវ័ន្ត អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែងក្នុងទឹកទី៣ដែរ៕

4-1-2016j7