ភ្នំពេញ ៖ កម្លាំងចម្រុះរបស់មន្ទីរគ្រឿងញៀនក្រសួងមហាផ្ទៃ បានចុះមកសហការជាមួយកម្លាំងនៃអធិការនគរបាលខណ្ឌដូនពេញ ក្នុងការចុះប្រតិបត្តិការចាប់បង្ក្រាបគ្រឿងញៀននៅក្នុងក្លិបគ្រវីមួយកន្លែង ដែលពោរពេញទៅដោយគ្រឿងញៀនសុទ្ធសាធ កាលពីរសៀលថ្ងៃទី២៥ ខែឧសភា ឆ្នាំ២០១៨ នៅចំណុចក្លិបដែលមានយីហោ លីហ្គាស៊ីហ្គោល (Legacy gold) ដែលមានទីតាំងនៅជិតការ៉ាស់សាំងតូតាល់ ផ្លូវលេខ៤៧ ក្នុងសង្កាត់ស្រះចក ខណ្ឌដូនពេញ។
ប្រភពព័ត៌មានពីប្រជាពលរដ្ឋរស់នៅជិតខាងក្លិបគ្រវី ដែលពោរពេញទៅដោយគ្រឿងញៀនសុទ្ធសាធនោះបានឲ្យដឹងថា សព្វថ្ងៃនេះពួកគាត់មានការបារម្ភយ៉ាងខ្លាំង ខណៈដែលពីមុនទីតាំងនេះគេបើករកស៊ីជាហាងខារ៉ាអូខេ និងម៉ាស្សាស្ទីម តែបច្ចុប្បន្ននេះ គេបើកទៅជាក្លិបរាំគ្រវី ដែលមួយយប់មានភ្ញៀវប្រុសនិងស្រី ភាគច្រើនសុទ្ធតែស្ទាវ ជាកូនអ្នកមានៗជិះរថយន្តទំនើបៗ បានមកពពាក់ពពូនចូលផឹកស៊ីរាំគ្រវីសប្បាយ ដោមានការចរាចរ និងការប្រើប្រាស់គ្រឿងញៀនយ៉ាងពេញបន្ទុកតែម្តង។
ប្រភពព័ត៌មានបានបន្តទៀតថា ពេលក្រុមស្ទាវ និងអ្នកដែលចូលចិត្តប្រើប្រាស់គ្រឿងញៀនទាំងនោះចេញពីក្លិបវិញនាពេលយប់ជ្រៅ និងអ្នកខ្លះទៀតនៅលេងទល់ភ្លឺនោះ បានដើរទ្រេតទ្រោត ព្រមទាំងស្រែកឡូឡា ធ្វើឲ្យការរស់នៅរបស់ពួកគាត់ដែលជាអ្នកជិតខាងមានការរំខានជាខ្លាំង ព្រោះតែការសម្រាកដេកពួនមិនបានស្ទើរតែរាល់យប់តែម្តង។
ប្រភពព័ត៌មានពីអ្នកជិតខាងបានបន្តទៀតថា ចាប់តាំងពីទីតាំងនោះបានបើកជាក្លិបបែបនេះមក ពួកគាត់មិនដែលឃើញសមត្ថកិច្ច ឬអាជ្ញាធរមូលដ្ឋាន ជាពិសេសលោក ហួត ចាន់យ៉ាន់ ដែលជាអធិការប៉ូលិសខណ្ឌដូនពេញ មានវិធានការទប់ស្កាត់ឡើយ។ ចឹងហើយនៅរសៀលថ្ងៃនេះដែរ ពួកគាត់ខណៈដែលឃើញកម្លាំងបានចុះមកព្រោងព្រាត ដោយអ្នកខ្លះស្លៀកពាក់ស៊ីវិល មានទាំងអាវក្រោះខាងក្នុង និងអ្នកខ្លះទៀតមានឯកសណ្ឋាន ហើយបានដើរចូលទៅខាងក្នុងនៃក្លិបនោះ ដែលមានទាំងលោកអធិការនគរបាលខណ្ឌដូនពេញផងនោះ មិនទាន់បានចូលទៅឆែកឆេរផង ស្រាប់តែឃើញបងៗសមត្ថកិច្ចទាំងនោះដើរចេញមកវិញ ព្រមទាំងហាមឃាត់អ្នកសារព័ត៌មានថា កុំថតៗ ហើយក្រុមសមត្ថកិច្ចទាំងនោះក៏បំបែកគ្នាទៅអស់ទៅ។ប្រភពព័ត៌មានពីប្រជាពលរដ្ឋជិតខាងបានបន្តទៀតថា ក្នុងលក្ខណៈដែលកម្លាំងព្រោងព្រាតចុះមកដល់ទីតាំងក្លិបនោះ ពួកគាត់ខំតែត្រេកអរនឹកស្មានថាពួកគេនឹងបង្ក្រាបក្លិបនោះ តែការពិតគេមិនហានបង្ក្រាបនោះទេ ប្រហែលជាម្ចាស់អាជីវកម្មនោះមានខ្នងក្រាស់ហើយ ទើបក្រុមសមត្ថកិច្ចបែរជាដកថយបែបនេះនោះ។ ចឹងហើយការព្រួយបារម្ភរបស់ពួកគាត់នៅតែមាន ល្គឹកណាក្លិបនោះនៅតែបើកអាជីវកម្មបែបនេះតទៅទៀតនោះ៕
Source: Kampuchea Thmey Daily
0 Comments