ព្រះវិហារ៖ យុទ្ធនាការរឹតបន្ដឹងត្រួតពិនិត្យយានយន្តកែច្នៃខុសលក្ខណៈបច្ចេកទេសទូទាំងខេត្តព្រះវិហារ ក្នុងរយៈពេលមួយខែ គឺខែឧសភា ឆ្នាំ២០១៨នេះ ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសរបស់ខេត្ត បានរកឃើញយានយន្ដល្មើសច្បាប់ ៣០៨ គ្រឿង ហើយរថយន្តទាំងនេះត្រូវបានធ្វើការផាកពិន័យ និងកាត់ទ្រុងនៅនឹងកន្លែងផងដែរ។
លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានអោយដឹងថា ក្នុងរយៈពេលមួយខែកន្លងមកនេះ ពោលគឺចាប់ពីថ្ងៃព្រហស្បតិ៍ ១២កើត ខែពិសាខ ឆ្នាំច សំរឹទ្ធិស័ក ព.ស ២៥៦១ ត្រូវនឹងថ្ងៃទី២៦ មេសា ២០១៨ ដល់ថ្ងៃសុក្រ ១១កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៥ ឧសភា ២០១៨ នេះ ក្រុមការងារត្រួតពិនិត្យយានយន្តកែច្នៃខុសលក្ខណៈបច្ចេកទេសខេត្តព្រះវិហារ បានធ្វើការត្រួតពិនិត្យយានយន្តសរុបចំនួន ៤៥៧ គ្រឿង ក្នុងនោះពិនិត្យឃើញថាត្រឹមត្រូវ ១៤៩ គ្រឿង រថយន្តត្រូវបានកាត់ទ្រុងចំនួន ០៧ គ្រឿង ដឹកសំពីងសំពោងចំនួន ១៥៣ គ្រឿង ខ្វះឯកសារចំនួន ៩៥ គ្រឿង បានដោះរានតខាងក្រោយ ៣៨ គ្រឿង គ្មានផ្លាកលេខចំនួន ០៣ គ្រឿង ផ្លាកលេខក្លែងក្លាយចំនួន ០១ គ្រឿង និងគ្មានប័ណ្ណបើកបរចំនួន ១១ នាក់។
គួររំលឹកដែរថា កាលពីព្រឹកថ្ងៃសុក្រ ៩រោច ខែមាឃ ឆ្នាំរកា ព.ស២៥៦១ ត្រូវនឹងថ្ងៃទី០៩ ខែកុម្ភៈ ឆ្នាំ២០១៨ កន្លងមកនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសដែលអញ្ជើញជាអធិបតីភាពបើកការដ្ឋានសាងសង់ស្ពានឆ្លងកាត់ទន្លេមេគង្គថ្មីមួយទៀត តភ្ជាប់ទឹកដីនៃខេត្តកំពង់ចាម ទៅកាន់ទឹកដីនៃខេត្តត្បូងឃ្មុំ សម្តេចតេជោ ហ៊ុន សែន បានដាក់ឱសានវាទ ចាប់ពីម៉ោង ០០ យប់ ថ្ងៃទី៩ កុម្ភៈ តទៅគ្មានវត្តមានឡានតទ្រុងលើដងផ្លូវទៀតទេ។ បើមាននៅតំបន់ណា ភូមិសាស្ត្រណា ចៅហ្វាយខេត្ត និងក្រុងនោះ ជាអ្នកទទួលខុសត្រូវ។ បើនរណាមកតវ៉ា ឬអ្នកកាង ទោះជាឋានៈណាក៏ដោយក៏ធ្លាក់បុណ្យស័ក្ដិទាំងអស់ និងបញ្ចូលព្រៃសតែម្តង៕ 
Source: Kampuchea Thmey Daily
0 Comments