កំពង់ធំ ៖ ឯកឧត្តមបណ្ឌិត ងួន ញ៉ិល អនុប្រធានទី២ រដ្ឋសភា បានលើកឡើងថា នៅថ្ងៃទី២៩ ខែកក្កដា ឆ្នាំ២០១៨ខាងមុខ គឺជាថ្ងៃបោះឆ្នោតជ្រើសតាំងតំណាងរាស្ត្រ នីតិកាលទី៦ ដូច្នេះសូមអំពាវនាវឱ្យប្រជាពលរដ្ឋទូទាំងប្រទេស ត្រូវអញ្ជើញទៅបោះឆ្នោតឱ្យបានគ្រប់គ្នា ដើម្បីបំពេញកាតព្វកិច្ចសិទ្ធិជាប្រជាពលរដ្ឋ ក៏ដូចជាជ្រើសរើសអ្នកដឹកនាំដ៏ល្អរបស់ខ្លួន សម្រាប់បន្តជោគវាសនាប្រទេសជាតិឱ្យមានការរីកចម្រើនទៅមុខថែមទៀត ហើយកុំជឿទៅតាមការញុះញង់រារាំងមិនអោយប្រជាពលរដ្ឋទៅបោះឆ្នោត គឺជាអំពើខុសច្បាប់ និងត្រូវអនុវត្តទោសទណ្ឌតាមច្បាប់។
នៅក្នុងពិធីបុណ្យពុទ្ធាភិសេកសម្ពោធឆ្លងដាក់ឱ្យប្រើប្រាស់ជាផ្លូវការ សមិទ្ធផលនានាក្នុងតម្លៃប្រមាណ ១៨ ម៉ឺនដុល្លារអាមេរិក ស្ថិតនៅក្នុងវត្តទួលដំណាក់ថ្មី ឃុំចុងដូង ស្រុកបារាយណ៍ ខេត្តកំពង់ធំ ព្រឹកថ្ងៃទី២៦ ខែឧសភា ឆ្នាំ២០១៨ ឯកឧត្តមបណ្ឌិត ងួន ញ៉ិល បានមានប្រសាសន៍បញ្ជាក់ថា រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដឹកនាំប្រទេសតាំងពីក្រោយថ្ងៃរំដោះ ៧ មករា ឆ្នាំ១៩៧៩មក ប្រទេសជាតិ និងប្រជាជនទទួលបានសុខសន្តិភាព និងការអភិវឌ្ឍន៍រីកចម្រើនលើគ្រប់វិស័យ ទាំងអាណាចក្រ ទាំងពុទ្ធចក្រ។ ក្នុងពិធីនោះដែរ ឯកឧត្ដមបណ្ឌិត ងួន ញ៉ិល ក៏បានអញ្ជើញបំពាក់គ្រឿងឥស្សរិយយស មេដាយស្ថាបនាជាតិ និងប្រគេនចែកជូនថវិកា និងសម្ភារៈដល់ព្រះសង្ឃ មន្ត្រីរាជការ ប្រជាពលរដ្ឋ និងអញ្ជើញកាត់ខ្សែបូរណ៍សម្ភោធដាក់អោយប្រើប្រាស់ជាផ្លូវការនូវសមិទ្ធផលនានាចាប់ពីពេលនេះតទៅផងដែរ។
តាមរបាយការណ៍លោក ហាក់ ម៉ុងហ៊ួត អភិបាលស្រុកបារាយណ៍បានឱ្យដឹងថា សមិទ្ធផលជាច្រើនរួមមាន កុដិធំ កុដិតូច បន្ទប់អនាម័យ សរុបទឹកប្រាក់ទាំងអស់ចំនួន ១៨ ម៉ឺនដុល្លារសហរដ្ឋអាមេរិក កើតចេញដោយមានការផ្តួចផ្តើមពីឯកឧត្ដមបណ្ឌិត ងួន ញ៉ិល អនុប្រធានទី២ រដ្ឋសភា និងជាអ្នកដំណាងរាស្ត្រមណ្ឌលកំពង់ធំ រួមជាមួយពុទ្ធបរិស័ទក្នុង និងក្រៅប្រទេស៕
Source: Kampuchea Thmey Daily
0 Comments