ភ្នំពេញ ៖ រាជរដ្ឋាភិបាលកម្ពុជាបានបន្ថែមកញ្ចប់ថវិកាសម្រាប់ទិញឱសថ ប្រឆាំងមេរោគអេដស៍ និងឱសថព្យាបាលជំងឺឱកាសនិយមរហូតដល់ ៤,៥លានដុល្លារ ពីឆ្នាំ២០១៨ដល់ឆ្នាំ២០២០ខាងមុននេះ ខណៈដែលកាលពីឆ្នាំ២០១៥ ដល់២០១៧ បានរួមចំណែកចំនួន ៣,៧លានដុល្លារអាមេរិករួចហើយក្នុងការទិញឱសថ ទាំងនេះ។
លោកទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងនៅក្នុងសិក្ខាសាលាពិគ្រោះយោបល់ ស្តីពីការរៀបចំផែនទី បង្ហាញផ្លូវក្នុងការឆ្លើយតប នឹងមេរោគអេដស៍,ជំងឺអេដស៍ នឹងក្លាយជាទស្សនវិស័យ ប្រកបដោយចីរភាព នៅកម្ពុជាកាលពីព្រឹកថ្ងៃទី៣០ ខែឧសភា ឆ្នាំ២០១៨នៅឯសណ្ឋាគារឡឺ រ៉ូយ៉ាល់ថា ជាមួយគ្នានេះដែរ រាជរដ្ឋាភិបាលកម្ពុជាបានឯកភាពក្នុងការផ្តល់សហហិរញ្ញវត្ថុចំនួន ៥,២លានដុល្លារ ដើម្បីទាក់ទាញនូវការគាំទ្រពេញលេញនូវសំណើថវិកា ៤១,៦លានដុល្លារ ពីមូលនិធិសកល នៅឆ្នាំ២០១៨-២០២០។
បន្ថែមពីលើនេះ អាជ្ញាធរជាតិប្រយុទ្ធនឹងជំងឺអេដស៍បាននឹងកំពុងជំរុញឲ្យមានការគាំទ្រពហុវិស័យក្នុងការឆ្លើយតបនឹងមេរោគអេដស៍ និងជំងឺអេដស៍ ដែលក្នុងនោះ សមាជិកអាជ្ញាធរជាតិប្រយុទ្ធនឹងជំងឺអេដស៍ ត្រូវបានណែនាំឲ្យរៀបចំកញ្ចប់ថវិកាផ្ទាល់របស់ ស្ថាប័នខ្លួនផងដែរ។
លោកទេសរដ្ឋមន្ត្រីបានបន្តថា ដោយមានការគាំទ្រពីក្រសួងផែនការ អាជ្ញាធរជាតិប្រយុទ្ធនឹងជំងឺអេដស៍បានប្រឹងប្រែង ក្នុងការសម្របសម្រួលឲ្យអ្នកជំងឺអេដស៍ទទួលបាន អត្តសញ្ញាណប័ណ្ណគ្រួសារក្រីក្រ ដែលចាប់ផ្តើមពីខេត្តចំនួន៨ ក្នុងឆ្នាំ២០១៦កន្លងទៅនេះ ដែលនេះគឺជាការបើកផ្លូវឆ្ពោះទៅកាន់ការគាំទ្រឲ្យមានការគាំពារសង្គមជាប្រព័ន្ធមួយ (ដែលរួមបញ្ចូលនូវ មូលនិធិសមធម៌សុខាភិបាល) ដែលជាតម្រូវការដ៏ធំធេងនៃគ្រួសារទទួលរងគ្រោះដោយមេរោគអេដស៍ និងប្រជាជនគន្លឹះនៅតាមទីក្រុងនិងបានរៀបចំស្តង់ដារប្រតិបត្តិការដោយដាក់បញ្ចូលមេរោគអេដស៍ និងជំងឺអេដស៍ទៅក្នុងផែនការអភិវឌ្ឍន៍ឃុំ/ផែនការវិនិយោគឃុំ។
លោកទេសរដ្ឋមន្ត្រីអៀង ម៉ូលី បានបញ្ជាក់ថា ក្នុងរយៈពេលជាងពីរទសវត្សរ៍កន្លងមក យើងបានធ្វើការរួមគ្នាចលនាធនធាន ជាង៨០០លានដុល្លារ ដើម្បីឆ្លើយតបនឹងមេរោគអេដស៍និងជំងឺអេដស៍ ដែលមួយចំនួនធំជាហិរញ្ញប្បទានបានមក ពីក្រៅប្រទេស។
ពាក់ព័ន្ធនឹងសិក្ខាសាលាស្តីពីការពិគ្រោះយោបល់ ស្តីពីការរៀបចំផែនទី បង្ហាញផ្លូវក្នុងការឆ្លើយតប នឹងមេរោគអេដស៍,ជំងឺអេដស៍ នឹងក្លាយជាទស្សនវិស័យ ប្រកបដោយចីរភាព នៅកម្ពុជា»នេះដែរលោកទេសរដ្ឋមន្ត្រីសង្ឃឹមថា អ្នកចូលរួមក្នុងសិក្ខាសាលា ទទួលបានការយល់ដឹងច្បាស់លាស់អំពី ហានិភ័យដែលដែលរារាំង ដល់ការធានាចីរភាពនៃការឆ្លើយតប នឹងមេរោគអេដស៍និងជំងឺអេដស៍ នៅប្រទេសកម្ពុជា និងបានស្វែងរកនូវសកម្មភាព កាត់បន្ថយហានិភ័យទាំងនោះនិង រៀបចំអនុសាសន៍រួមមួយ ដែលជាការឯកភាពពីអ្នកពាក់ព័ន្ធទាំងអស់ក្នុងការកំណត់ ពីសកម្មភាពមួយចំនួនដែលកាត់បន្ថយហានិភ័យដើម្បីផ្តល់ក្របខ័ណ្ឌមួយសម្រាប់ ការរៀបចំផែនទីបង្ហាញផ្លូវក្នុង ការធានានិរន្តរភាព នៃការឆ្លើយតបនឹងមេរោគអេដស៍ និងជំងឺអេដស៍នៅប្រទេសកម្ពុជា៕
Source: Kampuchea Thmey Daily
0 Comments