ភ្នំពេញ៖ នេះជាការបញ្ជាក់របស់កញ្ញា ប៊ុត កេរ៉ាឌី អគ្គនាយិកាក្រុមហ៊ុន ចេង ហ្វុង នៅក្នុងពិធីអបអរសាទរការបើកសម្ពោធជាផ្លូវការរបស់ក្រុមហ៊ុន ចេង ហ្វ៊ុង អ៊ិនវេសម៉ិន កាលពីរសៀលថ្ងៃទី៣០ ខែឧសភា ឆ្នាំ២០១៨ នៅសណ្ឋាគារសូហ្វីតែលភោគីត្រា ក្រោមអធិបតីភាពលោកជំទាវកិត្តិសង្គហបណ្ឌិត មែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយ រដ្ឋសភា ព្រឹទ្ធសភា និងអធិការកិច្ច។
កញ្ញាអគ្គនាយិកាលើកឡើងថា ការសម្រេចចិត្តដំណើរការក្រុមហ៊ុននេះ គឺដោយសារប្រទេសកម្ពុជាបានកំពុងក្លាយជាប្រទេសមួយដែលមានសុខសន្តិភាព ព្រមទាំងជាគោលដៅទេសចរណ៍ដ៏ពេញនិយមមួយនៅអាស៊ីអាគ្នេយ៍ និងពិភពលោក។ សេដ្ឋកិច្ចប្រទេសកម្ពុជា បានរីកចម្រើនដោយសារស្ថិរភាពនយោបាយ និងគោលនយោបាយរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី។ កញ្ញាបន្តថា កំណើនសេដ្ឋកិច្ចរបស់ប្រទេសកម្ពុជាក្នុងរយៈពេល១០ឆ្នាំចុងក្រោយនេះ មានល្បឿនលឿនបំផុតនៅក្នុងតំបន់អាស៊ីអាគ្នេយ៍ ដែលយើងសង្កេតឃើញថា កំណើនផលិតផលក្នុងស្រុកសរុបជាមធ្យម ៧% ក្នុងមួយឆ្នាំ ចាប់តាំងពីឆ្នាំ ២០១០។
តាមកញ្ញា ប៊ុត កេរ៉ាឌី មានមូលហេតុជាច្រើនដែលគួរតែវិនិយោគិនទាំងអស់ កំពុងផ្តោតមកនៅប្រទេសកម្ពុជា ជាពិសេសគឺស្ថិរភាពនយោបាយ និងមានមានវប្បធម៌ដ៏សម្បូរបែប។ ការកើនឡើងគួរឱ្យកត់សម្គាល់ចំពោះវិនិយោគិនបរទេស ដែលកំពុងស្វែងរកឱកាសវិនិយោគនៅកម្ពុជាលើគ្រប់វិស័យ ដូចជា វិស័យអចលនទ្រព្យ វិស័យទេសចរណ៍ និងបដិសណ្ឋារកិច្ច។ ការទទួលបានភាពជោគជ័យក្នុងកំណើនសេដ្ឋកិច្ចរបស់ខ្លួន បានបង្កើតបរិយាកាសទាក់ទាញសម្រាប់ការវិនិយោគបរទេស ហើយនេះគឺជាកត្តាជំរុញដ៏សំខាន់សម្រាប់វិនិយោគិនទាំងនោះ ហើយការអភិវឌ្ឍន៍អចលនទ្រព្យនៅក្នុងប្រទេសកម្ពុជា នាពេលបច្ចុប្បន្នកំពុងបង្ហាញពីសក្តានុពលដ៏អស្ចារ្យ និងក្លាយជាកន្លែងទាក់ទាញសម្រាប់វិនិយោគិនទាំងឡាយ។ រាល់មូលហេតុខាងលើទាំងនេះ គឺជាការលើកទឹកចិត្តបំផុតសម្រាប់ជំរុញវិនិយោគិនក្នុងការសម្រេចចិត្តវិនិយោគនៅក្នុងប្រទេសកម្ពុជា។
កញ្ញា ប៊ុត កេរ៉ាឌី បានលើកឡើងដែរថា ក្រុមហ៊ុន ចេង ហ្វ៊ុង អ៊ិនវេសម៉ិន គឺជាក្រុមហ៊ុនផ្តល់ប្រឹក្សាវិនិយោគមួយនៅក្នុងប្រទេសកម្ពុជា ដែលត្រូវបានបង្កើតឡើងនៅដើមឆ្នាំ ២០១៨ នេះ ដោយមានការទទួលស្គាល់ពីក្រសួងពាណិជ្ជកម្ម និងអគ្គនាយកដ្ឋានពន្ធដារនៃព្រះរាជាណាចក្រកម្ពុជា។ ក្រុមហ៊ុន ចេង ហ្វុង មានបេសកកម្មជំរុញការធ្វើអាជីវកម្មគ្រប់ទម្រង់ និងគ្រប់ខេត្តក្រុងទាំងអស់ក្នុងព្រះរាជាណាចក្រកម្ពុជា និងជាដៃគូវិនិយោគដ៏យូរអង្វែង ដើម្បីធ្វើឲ្យអាជីវកម្ម និងការវិនិយោគលោកអ្នកទទួលបាននូវភាពជោគជ័យ។ ក្រុមហ៊ុននេះទទួលផ្តល់ប្រឹក្សា និងជំរុញការវិនិយោគ ដោយឈរលើភាពស្មោះត្រង់ និងសុចរិតភាព ដើម្បីកសាងការទំនាក់ទំនងដ៏យូរអង្វែងជាមួយគ្រប់ដៃគូអាជីវកម្មរបស់ពួកយើង។
ចំណែកលោកជំទាវកិត្តិសង្គហបណ្ឌិត មែន សំអន បានមានប្រសាសន៍ថា រយៈពេលប៉ុន្មានឆ្នាំចុងក្រោយនេះ ប្រទេសកម្ពុជាមានកំណើនសេដ្ឋកិច្ចជាមធ្យមប្រមាណ ៧% ជាប់ៗគ្នា ដែលនាំឲ្យចំណូលរបស់ប្រជាជនមានការកើនឡើង និងមានជីវភាពកាន់តែធូរធារផងដែរ។ ដោយឡែកក្នុងរាជធានីភ្នំពេញ ដែលជាកន្លែងប្រជុំជនកំពុងតែរីកលូតលាស់ក្លាយទៅជាមជ្ឈមណ្ឌលពាណិជ្ជកម្មមួយដ៏ទាក់ទាញ និងមានសកម្មភាពអាជីវកម្មយ៉ាងមមាញឹក ជាក់ស្តែងដូចអ្នកទាំងអស់គ្នាឃើញច្បាស់នឹងភ្នែកស្រាប់ហើយថា មានរមណីយដ្ឋាន, សណ្ឋាគារ, ភោជនីយដ្ឋាន, ហាងលក់ទំនិញគ្រប់មុខ, ផ្សារទំនើប, សំណង់ធំៗ ជាពិសេសអគារខ្ពស់ៗ បុរីគេហដ្ឋានថ្មីៗ កំពុងរីកដុះដាលដូចផ្សិត។
លោកស្រីបន្ដថា ការបង្កើតក្រុមហ៊ុន Cheng Fung Invetment នឹងរួមចំណែកអភិវឌ្ឍប្រទេសកម្ពុជា ហើយលើសពីនេះទៀត ក្រុមហ៊ុនមិនត្រឹមតែជួយទាក់ទាញទុនវិនិយោគពីបរទេស និងទាក់ទាញទេសចរមកទស្សនាកម្ពុជាប៉ុណ្ណោះទេ តែថែមទាំងជួយបង្កើនទំនាក់ទំនងសេដ្ឋកិច្ច និងពាណិជ្ជកម្មរវាងកម្ពុជា និងប្រទេសជាច្រើន ជាពិសេសប្រទេសចិនឱ្យកាន់តែរឹងមាំថែមទៀត៕
Source: Kampuchea Thmey Daily
0 Comments