កំពង់ចាម៖ កំលោះអភ័ព្វស្នេហ៍ ដែលបានថែភាពនៅលីវរហូតដល់អាយុ៣០ ឆ្នាំទៅហើយ នៅតែគ្មានគូស្នេហ៍ថែរក្សាខ្លួន បានអង្រួនបេះដូងនារីៗដែលនៅលីវរស់ក្នុងភូមិជាមួយមានការសោកស្តាយ ព្រោះតែកំលោះច្រែះចាប់ម្នាក់នេះ បានគិតខ្លីបញ្ចប់ជីវិតដោយចងកនៅក្បែរផ្ទះរបស់ខ្លួន។
ប្រភពព័ត៌មាននៅកន្លែងកើតហេតុបានអោយដឹងថា នៅថ្ងៃទី៣០ ខែឧសភា ឆ្នាំ២០១៨ វេលាម៉ោង ២១ និង ០០ នាទី ឈ្មោះ ជួន មាស ភេទប្រុស អាយុ៣០ឆ្នាំ រស់នៅ ភូមិបាខម ឃុំសំពងជ័យ ស្រុកជើងព្រៃ ខេត្តកំពង់ចាម (នៅលីវ) និងជាមនុស្សញៀនស្រា បានផឹកស្រាស្រវឹង ហើយបានចូលដេកនៅលើគ្រែក្រោមផ្ទះជាមួយជាមួយឪពុកបង្កើតឈ្មោះ ជួន រ៉ា អាយុ៧០ឆ្នាំ។ លុះដល់ម៉ោង ១ និង ០០ នាទី ឈានចូលថ្ងៃទី៣១ ខែឧសភា ឆ្នាំ២០១៨ ឈ្មោះ ជួន មាស ក៏ក្រោកពីដំណេកចេញទៅបាត់មិនដឹងទៅណា។ លុះដល់ម៉ោង ៥ និង ០០ នាទីព្រឹក ថ្ងៃដដែល ឈ្មោះ ជួន រ៉ា ជាឪពុកបានក្រោកពីដេក ក៏ឃើញឈ្មោះ ជួន មាស ជាកូនបង្កើត បានចងកសម្លាប់ខ្លួននៅនឹងដើមស្វាយខាងមុខផ្ទះ ចម្ងាយពីផ្ទះ២០ម៉ែត្រ បណ្តាលអោយស្លាប់តែម្តង។
ចំពោះការធ្វើអត្តឃាតរបស់កំលោះចាស់យូរនេះ គេពុំទាន់ដឹងមូលហេតុនៅទ្បើយទេ តែគេសង្ស័យថា ជនរងគ្រោះកាលនៅរស់ប្រហែលជាខូចចិត្តនឹងនារីណាម្នាក់ហើយ ទើបដើរផឹកស្រារហូតក្លាយជាមនុស្សប្មឹកទៅហើយ។
ប៉ូលិសបានអោយដឹងថា ការពិនិត្យសពនៅផ្នែកកខាងមុខមានស្នាមទ្រុឌដោយខ្សែអង្រឹងប្រវែង ២០ សង់ទីម៉ែត្រ ចាប់ពីក្រោមទងត្រចៀកខាងឆ្វេងដល់ក្រោមទងត្រចៀកស្តាំ ក្រៅពីនោះគ្មានស្លាកស្នាមអ្វីទេ។ ផ្អែកតាមការបំភ្លឺពីសាក្សី និងការពិនិត្យសាកសព គណៈកម្មការពិនិត្យសពបានសន្និដ្ឋានថា ឈ្មោះ ជួន មាស ពិតជាស្លាប់ដោយចងកសម្លាប់ខ្លួនឯងពិតប្រាកដមែន ពុំមានពាក់ព័ន្ធទៅនឹងបទល្មើសព្រហ្មទណ្ឌទ្បើយ។ ក្រោយពិនិត្យរួចសពត្រូវបានក្រុមគ្រួសារធ្វើបុណ្យតាមប្រពៃណី៕
Source: Kampuchea Thmey Daily
0 Comments