ភ្នំពេញ៖ ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោ ហ៊ុន សែន នៅវេលាម៉ោង ១៦ ល្ងាច ថ្ងៃទី២៦ ខែឧសភា ឆ្នាំ២០១៨នេះ បានអញ្ជើញសម្ពោធដាក់ឲ្យប្រើប្រាស់ជាផ្លូវការ នូវអគារវឌ្ឍនៈកាពីតាល់ ដែលមានតម្លៃជាង ១៥០ លានដុល្លារ។
អគារវឌ្ឍនៈកាពីតាល់ បច្ចុប្បន្ននេះបានសាងសង់រួចរាល់ជាស្ថាពរហើយ ដែលបានប្រារព្ធពិធីសម្ពោធដាក់ឲ្យដំណើរការជាផ្លូវការរបស់ខ្លួន នៅថ្ងៃទី២៦ ខែឧសភា ឆ្នាំ២០១៨។ អគារវឌ្ឍនៈកាពីតាល់ គឺជាអគារខ្ពស់បំផុត និងដំបូងបង្អស់សម្រាប់ពាណិជ្ជកម្មប្រើប្រាស់ចម្រុះនៅក្នុងប្រទេស ដែលចាប់ផ្តើមការដ្ឋានសាងសង់នៅឆ្នាំ ២០០៧។ អគារវឌ្ឍនៈកាពីតាល់ ត្រូវបានសាងសង់ឡើងតាមស្តង់ដារអន្តរជាតិ ទាំងផ្នែកសោភណភាព និងសុវត្ថិភាព ហើយធ្លាប់ប្រកួតឈ្នះពានរង្វាន់អគារល្អដាច់គេក្នុងប្រទេសអាស៊ាន នាឆ្នាំ ២០១២ និងទទួលបានសញ្ញាប័ត្របរិស្ថានកម្រិតហ្គោលពីសហរដ្ឋអាមេរិកផងដែរ។អគារវឌ្ឍនៈកាពីតាល់ បាននិងកំពុងដឹកនាំមុខគេក្នុងការផ្លាស់ប្តូរថ្មី ដោយបានវិនិយោគយ៉ាងច្រើនក្នុងការអភិវឌ្ឍហេដ្ឋារចនាសម្ព័ន្ធ ជំរុញការរីកចម្រើន ការវិនិយោគ និងចំណាប់អារម្មណ៍បន្ថែមនៅប្រទេសកម្ពុជា។ អគារវឌ្ឍនៈថោវើ មានកម្ពស់ ៣៩ ជាន់ ស្មើនឹងកម្ពស់សរុប ១៨៦ ម៉ែត្រ គឺជាអគារពាណិជ្ជកម្មដ៏ទំនើបមួយនៅក្នុងប្រទេសកម្ពុជា ប្រមូលផ្តុំទៅដោយសេវាកម្មចម្រុះជាច្រើនដូចជា ទីតាំងសម្រាប់ប្រើប្រាស់ធ្វើជាការិយាល័យធ្វើការ សណ្ឋាគារ ភោជនីយដ្ឋាន ផ្សារទំនើប ព្រមទាំងមានហាងលក់ទំនិញដែលមានម៉ាកល្បីៗលំដាប់អន្តរជាតិថែមទៀតផង។
អគារនេះត្រូវបានបែងចែកជាបីផ្នែក គឺចាប់ពីចាន់ក្រោមដី និងផ្នែកខ្លះនៃជាន់ទី១ គឺជាផ្សារទំនើប ចំណែកចាប់ពីជាន់ទី១ ដល់ជាន់ទី២ គឺជាការិយាល័យកណ្តាលរបស់ធនាគារវឌ្ឍនៈ។ ចាប់ពីជាន់ទី៣ ដល់ជាន់ទី២៣ ជាទីតាំងអគារការិយាល័យជួល និងចាប់ពីជាន់ទី២៥ ដល់ជាន់ទី៣៩ គឺជាសណ្ឋាគារលំដាប់ផ្កាយ៥ Rosewood ដែលបានជួលដោយក្រុមហ៊ុន Rosewood មកពីសហរដ្ឋអាមេរិក។
វឌ្ឍនៈថោវើ មានជណ្តើរយន្តចំនួន ៣១ ដោយអ្នកធ្វើដំណើរឡើងចុះក្នុងអគារនេះ ចំណាយពេលរង់ចាំមិនដល់ ៣០ នាទីនោះទេនៅក្នុងម៉ោងចូលធ្វើការដ៏មមាញឹក ខណៈដែលអគារធំៗក្នុងរាជធានីភ្នំពេញ មានជណ្តើរយន្តពី ៦ ទៅ ៨ ខ្សែតែប៉ុណ្ណោះ។ អគារវឌ្ឍនៈនេះធ្លាប់បានទទួលវិញ្ញាបនបត្រពីសហរដ្ឋអាមេរិក ជាប្រភេទសំណង់ដែលសាងសង់ឡើងដោយមិនប៉ះពាល់ទៅដល់បរិស្ថាន ពោល គឺជាប្រភេទអគារពណ៌បៃតងដែលបំពាក់ដោយប្រព័ន្ធសុវត្ថិភាព មានផាសុកភាព និងបរិស្ថានល្អផងដែរ។
លោក សំអាង វឌ្ឍនៈ នាយកប្រតិបត្តិក្រុមហ៊ុនវឌ្ឍនៈប្របភើធី លីមីតធីត ធ្លាប់បានឲ្យដឹងថា គម្រោងសាងសង់អគារនេះចំណាយថវិកាប្រមា ១៥០ លានដុល្លារ។ របាយការណ៍ប្រចាំឆ្នាំ ២០១៧ ដែលបានចេញផ្សាយដោយក្រសួងរៀបចំដែនដីនគរូបនីយកម្ម និងសំណង់ (MLMUPC) បង្ហាញថា តម្លៃសរុបនៃគម្រោងសាងសង់ដែលបានអនុម័ត បានកើនឡើងដល់ ៦.៤២ ពាន់លានដុល្លារ ក្នុងឆ្នាំ ២០១៧ ពោលគឺកើនឡើង ២២.៣ ភាគរយ ធៀបនឹងឆ្នាំ ២០១៦។
តាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់ធ្លាប់បានបង្ហាញថា រយៈពេល ១៥ ឆ្នាំកន្លងមកនេះ នៅទូទាំងប្រទេសកម្ពុជាទាំងមូលមានវត្តមានសំណង់អគារខ្ពស់ថ្មីៗ កម្ពស់ចាប់ពី ៥ ជាន់ឡើងទៅមានចំនួនដល់ទៅ ៩៨៥ អគារ។ ក្នុងចំណោមអគារទាំងនេះ គ្រាន់តែនៅរាជធានីភ្នំពេញ មានអាគារកម្ពស់ពី ៥ ជាន់ឡើង រហូតដល់ទៅជាង ៦០០ អគារ ស្មើនឹងជាង ៦០% នៅទូទាំងប្រទេស។ បើធ្វើការប្រៀបធៀបឆ្នាំ ២០១៦ ចំនួនអគារខ្ពស់ចាប់ពី ៥ ជាន់ឡើងទៅបានកើនឡើងជាង ១០០ អគារបន្ថែមក្នុងឆ្នាំ ២០១៧៕
Source: Kampuchea Thmey Daily
0 Comments