លោក ត្រាំ និយាយ​ថា កិច្ចប្រជុំ​កំពូល​ជាមួយ​កូរ៉េខាងជើង​នៅតែ​អាច​កើតឡើង

មួយថ្ងៃ ​បន្ទាប់ពី​ការលុបចោល​កិច្ចប្រជុំ​កំពូល​ភ្លាមៗ​ជាមួយ​កូរ៉េខាងជើង ប្រធានាធិបតី​សហរដ្ឋអាមេរិក​លោក ដូ​ណា​ល់ ត្រាំ បាន​និយាយ​កាលពី​ថ្ងៃ​សុក្រ​ថា កិច្ចប្រជុំ​ជាមួយ​លោក គីម ជុង​អ៊ុន អាច​នឹង​បន្ត​ទៅមុខ​ ហើយ​ទំនងជា​នឹង​កើតឡើង​តាម​ថ្ងៃ​កំណត់​ដែល​គ្រោងទុក​នៅ​ថ្ងៃទី​១២​ខែមិថុនា​។​

ជំនួប​កំពូល​នេះ​នឹង​ក្លាយជា​កិច្ចប្រជុំ​មួយ​ដែល​មិន​ធ្លាប់មាន​ពីមុន​រវាង​ប្រធានាធិបតី​សហរដ្ឋអាមេរិក​កំពុងកាន់​តំណែង​និង​មេដឹកនាំ​កូរ៉េខាងជើង​មួយរូប​ដែល​ក្រុង​វ៉ាស៊ីនតោន​សង្ឃឹមថានឹង​ធ្វើ​ឲ្យ​មានការ​លុបបំបាត់​អាវុធ​នុយក្លេអ៊ែរ​ទាំងស្រុង​របស់​រដ្ឋ​ឯកោ​មួយ​នេះ​។​

លោក ត្រាំ បាន​និយាយ​នៅក្នុង Twitter ថា “​កិច្ចពិភាក្សា​ប្រកបដោយ​ផ្លែផ្កា​យ៉ាងខ្លាំង​” កំពុង​បន្ត​ជាមួយ​កូរ៉េខាងជើង​អំពី​ការចាប់ផ្តើម​កិច្ចប្រជុំ​កំពូល​ឡើងវិញ​។​

លោក​បានសរសេរថា “​ប្រសិនបើ​វា​កើតឡើង​មែន​នោះ វា​ទំនងជា​នឹង​នៅ​ប្រទេស​សិង្ហ​បុរី​នៅ​ថ្ងៃ​ដដែល​គឺ​ថ្ងៃទី​១២​ខែមិថុនា​”​។ លោក​បន្ថែមថា កិច្ចប្រជុំ​នេះ​អាច​ពន្យា​ពេល​បើសិន​ចាំបាច់​។​

កាលពី​ថ្ងៃ​ព្រហស្បតិ៍ លោក​ត្រាំ​បាន​លុបចោល​កិច្ចប្រជុំ​កំពូល​ដែល​គ្រោង​នឹង​ប្រព្រឹត្តទៅ​នៅ​ប្រទេស​សិង្ហ​បុរី​ដោយ​បន្ទោស​ដល់ “​កំហឹង​យ៉ាងខ្លាំង​និង​អំពើ​បង្ក​សង្គ្រាម​ដោយ​បើកចំហ​” ពី​ទីក្រុង​ព្យុងយ៉ាង​នៅក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ​។​

ប៉ុន្តែ​កូរ៉េខាងជើង​បាន​ឆ្លើយតប​កាលពី​ថ្ងៃ​សុក្រ​ដោយ​និយាយថា ខ្លួន​មាន​ឆន្ទៈ​ចង់​និយាយ​ជាមួយ​សហរដ្ឋអាមេរិក​នៅពេល​ណាមួយ​។ ប្រតិកម្ម​តប​នេះ​ត្រូវបាន​លោក ត្រាំ ទទួល​ស្វាគមន៍​ថា​ជា “​ភាពកក់ក្ដៅ​និង​ផលិតភាព​”​។ លោក ត្រាំ បាន​និយាយ​អំពី​ប្រជាជន​កូរ៉េខាងជើង​ថា “​យើង​កំពុងនិយាយ​ទៅកាន់​ពួកគេ​ឥឡូវនេះ​។ ពួកគេ​ចង់បាន​វា​ណាស់ យើង​ក៏​ចង់បាន​វា​ដែរ​”​។​

ស្របពេល​ជាមួយគ្នា​នោះ រដ្ឋមន្ត្រី​ក្រសួងការពារជាតិ​អាមេរិក​លោក Jim Mattis បាន​និយាយថា មាន “​ដំណឹង​ល្អ​ខ្លះ​” អំពី​កិច្ចប្រជុំ​កំពូល​នេះ​ខណៈដែល​អ្នកនាំពាក្យ​សេត​វិមាន​លោកស្រី Sarah Sanders បាន​ប្រាប់​អ្នកយកព័ត៌មាន​ថា “​ប្រសិនបើ​កិច្ចប្រជុំ​នេះ​នឹង​ប្រព្រឹត្តទៅ​នៅ​ថ្ងៃទី​១២​ខែមិថុនា​មែន​នោះ យើង​នឹង​ត្រៀមខ្លួន​”៕ AFP

​

Source: Kampuchea Thmey Daily