ផ្លូវ​នៃ​កោះ​ហា​វ៉ៃ​ ត្រូវ​បាន​លេប​ត្របាក់​ដោយ​កំអែ​ភ្នំភ្លើង​ ខណៈ​ផ្ទះ​ជាច្រើន​ទៀត​ត្រូវ​ដុត​បំផ្លាញ

ការ​កើនឡើង​នៃ​កំអែ​ភ្នំភ្លើង​បានប្រែក្លាយ​ផ្លូវ​នៅលើ​កោះ​ហា​វ៉ៃ​ឲ្យ​ក្លាយទៅជា​វាល​ភ្នំភ្លើង​ដោយបាន​បំផ្លាញ​ផ្ទះ​យ៉ាងតិច​៨​ខ្នង ​ខណៈដែល​ប្រជាពលរដ្ឋ​បាន​ឈរ​តាម​ដងផ្លូវ​ ហើយ​មើល​ផ្ទះ​របស់​ពួកគេ​ដែល​ត្រូវបាន​ដុតបំផ្លាញ។

យោងតាម​លោក David Mace អ្នកនាំពាក្យ​ភ្នាក់ងារ​គ្រប់គ្រង​គ្រាអាសន្ន​សហព័ន្ធ​បាន​និយាយ​ថា ការផ្ទុះ​ភ្នំភ្លើង Kilauea បាន​បំផ្លិចបំផ្លាញ​នៅ​តំបន់ Leilani Estates ខណៈដែល​ចំនួន​ផ្ទះ​ដែល​ត្រូវ​បំផ្លាញ​បាន​កើនឡើង​ពី​៥០​ដល់​៨២​ខ្នង​ក្នុង​រយៈពេល​ត្រឹមតែ​ពីរ​បី​ថ្ងៃ​ប៉ុណ្ណោះ។

យោង​តាម​ភ្នាក់ងារ​រដ្ឋ​ហា​វ៉ៃ​បាន​ឲ្យ​ដឹងថា ផ្ទៃដី​ប្រហែល​១៥,០០០​ហិច​តា​ត្រូវបាន​ដុតបំផ្លាញ​ដោយសារតែ​កំអែ​ភ្នំភ្លើង​ចាប់តាំងពី​ថ្ងៃទី​៣​ខែឧសភា​មក​។​

លោក​Ikaika Marzo បាន​និយាយ​នៅ​ក្នុង​វីដេអូ Facebook ខណៈ​ដែល​គាត់​ឈរ​នៅ​លើ​ផ្លូវ Kaupuli ថា “​មានផ្ទះ​ប្រាំបី​ខ្នង​ត្រូវ​បាន​លេប​ត្របាក់​នៅ​លើ​ផ្លូវ​នេះ​ក្នុង​រយៈពេល​១២​ម៉ោង​”​។​

រចនាសម្ព័ន្ធ​ប្រហែល​៣៧​ត្រូវ​ជាប់​ដោយសារ​កំអែ​ភ្នំភ្លើង​ដែល​មានន័យថា ផ្ទះ​មិនអាច​ចូលទៅ​បានទេ​ហើយ​អ្នក​ដែល​មិន​ត្រូវ​បាន​ជម្លៀស​អាច​ជាប់​នៅក្នុង​ជញ្ជាំង​នៃ​កំអែ​កម្ពស់​៣០​ហ្វី​ត​។​

លោក Marzo បាន​និយាយ​ទៀត​ថា លោក​ត្រូវ​បាន​ប្រាប់​ដោយ​ភ្នាក់ងារ​ភូមិសាស្ត្រ​របស់​អាមេរិក USGS ថា នឹងមាន​អ្វីៗ​ជាច្រើន​ទៀត​ដែល​មកពី​ភ្នំភ្លើង Kilauea។

លោក​បាន​និយាយ​ថា លោក​ត្រូវ​បាន​គេ​ប្រាប់​ថា អ្វីដែល​ចេញមក​នេះ​គឺ​គ្រាន់តែ​ជា​ចំណែក​តូច​មួយ​របស់​ភ្នំភ្លើង​ប៉ុណ្ណោះ។

គួរ​បញ្ជាក់​ថា ការ​រញ្ជួយ​ដី​កម្រិត​៤.៤​រ៉ិ​ច​ទ័​រ​នៅ​ឯ​កំពូល​ភ្នំភ្លើង​កាលពី​ថ្ងៃ​សុក្រ​បាន​ជំរុញ​ឲ្យ​រដ្ឋអំណាច​ស៊ីវិល​រដ្ឋ​ហា​វ៉ៃ​ធានា​ដល់​ប្រជាជន​ប្រមាណ​២០០,០០០​នាក់​របស់​កោះ​នេះ​ថា មិន​មាន​ហានិភ័យ​នៃ​រលក​យក្ស​ស៊ូណាមិ​នោះទេ៕ REUTERS

[caption id="attachment_916175" align="aligncenter" width="700"]  [/caption]

Source: Kampuchea Thmey Daily