ភ្នំពេញ ៖ សេចក្តីព្រាងច្បាប់ស្តីពីការរៀបចំ និងការប្រព្រឹត្តទៅរបស់គណៈរដ្ឋមន្ត្រី ត្រូវបានរដ្ឋសភាអនុម័តដោយសំឡេង ១១១ លើ ១១១ សំឡេង។ ការអនុម័តនេះ បានធ្វើឡើងនៅក្នុងសម័យប្រជុំរដ្ឋសភាលើកទី១០ នីតិកាលទី៥ នៅវេលាព្រឹកថ្ងៃទី៣១ ខែឧសភានេះ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា។
លោក ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌ នៃរដ្ឋសភាថ្លែងថា សេចក្តីព្រាងច្បាប់នេះ ត្រូវបានបញ្ជូនមករដ្ឋសភា នៅថ្ងៃទី១១ ខែឧសភា ឆ្នាំ២០១៨។ សេចក្តីព្រាងច្បាប់នេះមានគោលបំណងកំណត់អំពីសមត្ថកិច្ច ក្នុងការកំណត់ និងអនុវត្តនយោបាយរបស់រដ្ឋ ស្របតាមគោលការណ៍ដែលបានចែងក្នុងរដ្ឋធម្មនុញ្ញ។ រាជរដ្ឋាភិបាលធានាការអនុវត្តច្បាប់ និងដឹកនាំកិច្ចការទូទៅរបស់រដ្ឋ។ សមាសភាពនៃរាជរដ្ឋាភិបាលមាន នាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រី។
សម័យប្រជុំពេញអង្គរដ្ឋសភាលើកទី១០ នាព្រឹកថ្ងៃទី៣១ នេះដែរ ក៏បន្តការពិភាក្សា និងអនុម័តសេចក្តីព្រាងច្បាប់ស្តីពីសញ្ជាតិ, ការពិភាក្សា និងអនុម័តយល់ព្រមលើកិច្ចព្រមព្រៀងស្តីពីការបង្កើតអង្គការសហប្រតិបត្តិការព្រៃឈើអាស៊ី និងការពិភាក្សា និងអនុម័តសេចក្តីព្រាងច្បាប់ស្តីពីវិសោធនកម្មមាត្រា៣ មាត្រា២៣ មាត្រា៣០ មាត្រា៣៣ មាត្រា៣៤ មាត្រា៣៥ មាត្រា៣៦ មាត្រា៣៧ មាត្រា៣៨ មាត្រា៣៩ និងមាត្រា៤០ នៃច្បាប់ស្តីពីការគ្រប់គ្រង និងការធ្វើអាជីវកម្មធនធានរ៉ែ ដែលត្រូវប្រកាសឱ្យប្រើដោយព្រះរាជក្រមលេខ នស/រកម ០៧០១/០៩ ចុះថ្ងៃទី១៣ ខែកក្កដា ឆ្នាំ២០០១ ជាបន្តបន្ទាប់ទៀត៕ 
Source: Kampuchea Thmey Daily
0 Comments