ភ្នំពេញ៖ តារាចម្រៀងប្រុស និងជាអតីតប្រធានសមាគមសិល្បករខ្មែរ លោក សុះ ម៉ាច បានបង្ហាញអារម្មណ៍ហួសចិត្ត បន្ទាប់ពីកញ្ចក់រថយន្តរបស់លោកត្រូវបានលោកចោរដៃឆៅលួចបាត់អស់មួយចំហៀងផ្នែកខាងឆ្វេង។ មិនតែប៉ុណ្ណោះ លោកថែមទាំងដាក់ទំនាយយ៉ាងចាស់ដៃលើក្រុមចោរទាំងនោះទៀតផង។
លោក សុះ ម៉ាច បានសរសេរប្រកាសនៅលើបណ្តាញសង្គមហ្វេសប៊ុកថា ខ្ញុំមានកិត្តិយសសូមជម្រាបជូនដំណឹងទៅដល់លោកចោរដែលលួចកញ្ចក់ឡាន highlander របស់ខ្ញុំមុននេះមួយម៉ោងនៅតារាងបាល់ទាត់ western មេត្តាមានសន្តានចិត្តយកមកអោយខ្ញុំវិញផង។ បើមិនយកមកអោយវិញក្នុងយប់នេះទេ ស្អែកនេះខ្ញុំនឹងទៅទិញដាក់ថ្មីហើយ ព្រោះខ្ញុំមិនអាចរង់ចាំបានទេ សូមទានជ្រាប!។
តារាចម្រៀងជើងចាស់មានប្រជាប្រិយភាពលោក សុះ ម៉ាច បន្តថា អាចោរត្រូវឆ្នោត១លានដុល្លារលួចកញ្ចក់ឡានខ្ញុំ កំពុងតែសម្បូរលុយផង បើមិនយកសងខ្ញុំវិញទេខ្ញុំនឹងដាក់ទំនាយឯងអោយត្រូវឆ្នោត ហើយដេកស៊ីលុយឆ្នោតដើរលេងសប្បាយគ្រប់ប្រទេស ឈប់ធ្វើចោររហូតដល់ថ្ងៃស្លាប់ ឯងចាំមើលចុះទំនាយរបស់ខ្ញុំឆុតណាស់ណា៎។
លោក សុះ ម៉ាច បានបន្ថែមថា សូមបញ្ជាក់ថា សូមលោកចោរមិនបាច់ខ្មាសអៀន និងក្រែងចិត្តខ្ញុំនោះទេ យកមកអោយវិញចុះខ្ញុំមិនប្រកាន់ទោសអូសដំណើរឡើយ យើងរាប់អានគ្នាទុកដូចជាបងប្អូន ហើយខ្ញុំនឹងបង្ហាត់អោយចេះច្រៀងដើម្បីប្រកបមុខរបរសុចរិត ហើយសប្បាយទៀតផង សូមអរគុណទុកជាមុន។
តាមរយៈនេះមានមហាជនជាច្រើនបានសម្តែងអារម្មណ៍ហួសចិត្ត និងមានខ្លះទៀតបានផ្ញើសាររបៀបលេងសើចថា បងពិតជាមនុស្សចិត្តល្អមែន ចោរលួចកញ្ចក់ឡានហើយនៅតែដាក់ទំនាយឲ្យត្រូវឆ្នោតទៀត។ អ្វីដែលកាន់តែពិសេសនោះ គឺប្រកាសទទួលយកលោកចោរមកធ្វើជាកូនសិស្សចម្រៀងទៀតរកឯណាបាន …៕
Source: Kampuchea Thmey Daily
0 Comments