ភ្នំពេញ៖ អភិបាលរាជធានីភ្នំពេញ លោក ឃួង ស្រេង បានជំរុញអោយអាជ្ញាធរខណ្ឌទាំង ១២ និងមន្ទីរពាក់ព័ន្ធ ត្រូវធ្វើការផ្សព្វផ្សាយអោយប្រជាពលរដ្ឋទៅចូលរួមបោះឆ្នោតអោយបានគ្រប់គ្នា ដើម្បីបំពេញសិទ្ធិ ឬក៏ការប្រើប្រាស់សិទ្ធិក្នុងនាមជាប្រជាពលរដ្ឋខ្មែរមួយរូបក្នុងការបោះឆ្នោត។
ការជំរុញបែបនេះ បានធ្វើឡើងកាលពីរសៀលថ្ងៃទី៣០ ឧសភា ២០១៨ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ ក្រោមវត្តមានលោក ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ និងមានការចូលរួមពីលោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ លោក ជួន សុវណ្ណ ស្នងការរាជធានីភ្នំពេញ ប្រធានសាលាដំបូងរាជធានី អភិបាលខណ្ឌទាំង១២ ព្រមទាំងមន្ទីរចំណុះអោយរដ្ឋបាលរាជធានីភ្នំពេញទាំងអស់ផងដែរ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានថ្លែងប្រាប់អ្នកសារព័ត៌មានក្រោយបញ្ចប់កិច្ចប្រជុំនេះថា ក្នុងកិច្ចប្រជុំនោះ គឺលោកអភិបាលបានណែនាំដល់អាជ្ញាធរខណ្ឌទាំង១២ រួមនឹងជំនាញពាក់ព័ន្ធទាំងអស់ ត្រូវចុះរៀបចំសណ្តាប់ធ្នាក់ចាប់តាំងពីពេលនេះតទៅរហូតដល់ពេលបោះឆ្នោត និងបានជំរុញអោយអាជ្ញាធរខណ្ឌ មន្ទីរពាក់ព័ន្ធ ធ្វើការផ្សព្វផ្សាយអោយប្រជាពលរដ្ឋទៅចូលរួមបោះឆ្នោតឲ្យបានគ្រប់ៗគ្នា ដើម្បីបំពេញសិទ្ធិ ឬក៏ការប្រើប្រាស់សិទ្ធិក្នុងនាមជាប្រជាពលរដ្ឋខ្មែរមួយរូបក្នុងការបោះឆ្នោត។ក្នុងកិច្ចប្រជុំនោះ លោក ឃួង ស្រេង ក៏បានលើកឡើងដែរថា កំណាត់ផ្លូវ១១ខ្សែ ដែលអាជ្ញាធររាជធានី ប្រគល់សិទ្ធិរៀបចំអោយអាជ្ញាធរខណ្ឌអ្នកទទួលខុសត្រូវនោះ ឃើញថាមានវឌ្ឍនភាពល្អប្រសើរហើយ លើកលែងតែទីតាំងមួយចំនួនពិបាកក្នុងការៀបចំ ដូចជានៅតាមផ្លូវ២៧១ ម្តុំមុខពេទ្យរុស្ស៊ី ផ្លូវសហព័ន្ធរុស្ស៊ី ខាងមុខក្រសួងការងារ និងនៅតាមបណ្តាទីតាំងអាជីវកម្មមួយចំនួន។
លោកបានបញ្ជាក់ថា ម្ចាស់អាជីវកម្មទាំងនោះបានចូលរួមជាមួយអាជ្ញាធរ ប៉ុន្តែក៏នៅមានប្រជាពលរដ្ឋមួយចំនួនទៀត មិនទាន់បានសហការបានល្អនូវឡើយដែរ។ ពាក់ព័ន្ធនឹងការងារនេះ ថ្នាក់ដឹកនាំក៏បានពិគ្រោះ និងពិភាក្សាគ្នា ដោយជំរុញឲ្យមានការយកចិត្តទុកដាក់លើការងារសណ្តាប់ធ្នាប់នេះបន្ថែមទៀត ជាពិសេសនៅលើទីតាំងដែលមានការកកស្ទះខ្លាំង។ ដោយឡែកពាក់ព័ន្ធនឹងបញ្ហាចោរកម្ម លួច ឆក់ប្លន់ ល្បែងស៊ីសង និងបញ្ហាអគ្គិភ័យ ក៏បានលើកយកមកពិភាក្សានៅក្នុងកិច្ចប្រជុំនោះដែរ ខណៈដែលបទល្មើសទាំងនេះមានការថមថយល្អប្រសើរជាងមុន។
លោក ឃួង ស្រេង បញ្ជាក់ថា ការថមថយបទល្មើសទាំងនេះ ក៏ដោយសារតែទាំងសមត្ថកិច្ច រួមអាជ្ញាធរមូលដ្ឋាន រួមគ្នារឹតបន្តឹងការងារសន្តិសុខបានល្អប្រសើរ។ ប៉ុន្តែទោះជាយ៉ាងណាក្តី លោកអភិបាលក៏នៅតែជំរុញអោយអាជ្ញាធរ និងសមត្ថកិច្ចបន្តការយកចិត្តទុកដាក់អោយបានខ្ពស់បន្ថែមទៀត ដើម្បីផ្តល់នូវសន្តិសុខសុវត្ថិភាពជូនដល់ប្រជាពលរដ្ឋអោយកាន់តែប្រសើរឡើង។ ចំណែកបញ្ហាគ្រោះអគ្គិភ័យ ដែលជាគ្រោះកើតឡើងដោយចៃដន្យ គ្មានគ្រោងទុក ឬគ្មាននរណាម្នាក់ចង់ឲ្យកើតឡើងនោះ ឃើញថាមួយរយៈចុងក្រោយនេះបញ្ហាគ្រោះអគ្គិភ័យតូចៗបានកើតឡើងច្រើនលើក។ ប៉ុន្តែអាជ្ញាធរ និងសមត្ថកិច្ចរបស់យើងចេញជួយអន្តរាគមន៍បានទាន់ពេល និងទទួលបានការគាំទ្រពីសំណាក់ប្រជាពលរដ្ឋយ៉ាងខ្លាំង។ មានន័យថា នៅពេលអគ្គិភ័យកើតឡើង ចំណាត់ការរបស់អាជ្ញាធរមានប្រសិទ្ធភាពខ្ពស់ជាងមុន និងបានលុបបំបាត់ការនិយាយមិនល្អចំពោះក្រុមអគ្គិភ័យទៀត។
ចំពោះបញ្ហាល្បែងស៊ីសងខុសច្បាប់ លោកអភិបាលបានណែនាំឲ្យបន្តយកចិត្តទុកដាក់បង្ក្រាបអោយអស់ពីមូលដ្ឋាន។ ដោយឡែកទីតាំងខ្លះមានច្បាប់ទម្លាប់ត្រឹមត្រូវក៏ត្រូវតែចុះអនុវត្តន៍ដែរ ដើម្បីអោយដឹងថាពួកគាត់អនុវត្តន៍បានត្រឹមត្រូវដែរឬទេ ជៀសវាងអនុវត្តមានតែក្នុងក្រដាស ប៉ុន្តែភាពជាក់ស្តែងមិនមានភាពត្រឹមត្រូវនោះ៕
Source: Kampuchea Thmey Daily
0 Comments