កំពង់ចាម ៖ អភិបាលខេត្តកំពង់ចាម លោក គួច ចំរើន បានលើកឡើងថា បញ្ហាឱសថក្លែងក្លាយត្រូវបង្កើនការទប់ស្កាត់ឱ្យមានប្រសិទ្ធភាព ពិសេសគឺក្រុមពេទ្យ ដែលបានដើរចាក់ថ្នាំគ្មានច្បាប់ ដោយមានរហូតដល់ជាង ៥០០ នាក់ ត្រូវតែមានវិធានការទប់ស្កាត់ ហើយបើគ្លីនិកឯកជនណាបើកបង្រៀនផ្នែកពេទ្យត្រូវតែបញ្ឈប់ជាបន្ទាន់ ដោយនេះជាអំពើល្មើសច្បាប់។
លោក គួច ចំរើន បានលើកឡើងបែបនេះ កាលពីព្រឹកថ្ងៃពុធ ១រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣០ ខែឧសភា ឆ្នាំ២០១៨ ក្នុងពិធីជួបសំណេះសំណាលជាមួយមន្ត្រីសុខាភិបាលខេត្តខេត្តកំពង់ចាម នៅសាលប្រជុំមន្ទីរសុខាភិបាលខេត្តកំពង់ចាម ដោយមានការចូលរួមពីអស់លោកជាប្រធានអនុប្រធានមន្ទីរសុខាភិបាល ជាប្រធានអនុប្រធានការិយាល័យ ប្រធានអនុប្រធានមន្ទីរពេទ្យបង្អែក ស្រុកប្រតិប័ត្រ និងប្រធានមណ្ឌលសុខភាពនៅទូទាំងខេត្ត។
លោកបន្តថា ចំពោះសុវត្ថិភាពចំណីអាហារ លោកសុំឱ្យម្ចាស់អាហារដ្ឋាន ដែលគ្មានច្បាប់ត្រូវមកធ្វើច្បាប់ និងបន្តរកវិធានការអប់រំឱ្យគាត់មកសុំច្បាប់អោយបានត្រឹមត្រូវដើម្បីដឹងសាវតារ និងពួកគាត់ចូលរួមធ្វើអនាម័យបរិស្ថានដោយម្ចាស់ការដើម្បីសុខភាពសាធារណៈ។ លោក គួច ចំរើន ក៏បានជំរុញដល់មន្ត្រីពាក់ព័ន្ធទាំងអស់ យកចិត្តរបស់អ្នកជំងឺមកដាក់ក្នុងខ្លួន និងអ្នកជំងឺត្រូវយកចិត្តគ្រូពេទ្យមកដាក់ខ្លួន។
លោក គួច ចំរើន ក៏បានលើកឡើងនូវសំណូមពររបស់ អ្នកជំងឺ បុគ្គលិក បសស និងបុគ្គលិកសុខាភិបាល ក្រោយពីលើកឡើងពីសំណូមពររបស់ អ្នកជំងឺ បុគ្គលិក ប.ស.ស និងបុគ្គលិកសុខាភិបាល លោកអភិបាលក៏បានដោះស្រាយនូវបញ្ហាជាច្រើននៃការលើកឡើងទាំងនោះ។
លោកក៏បានស្នើដល់មន្ត្រីពាក់ព័ន្ធទាំងអស់ យកចិត្តរបស់អ្នកជំងឺមកដាក់ក្នុងខ្លួន និង អ្នកជំងឺត្រូវយកចិត្តគ្រូពេទ្យមកដាក់ខ្លួន ព្រោះរាល់ពេលអ្នកជំងឺមកជួបគ្រូពេទ្យ ពិតជាចង់បានចម្លើយនៃការពិគ្រោះយោបល់រវាងអ្នកជំងឺ និងគ្រូពេទ្យ។ ប្រសិនបើអ្នកជំងឺទទួលបានការពិគ្រោះយោបល់រួចហើយ សូមអោយអ្នកជំងឺផ្តល់ទំនុកចិត្តចំពោះក្រុមគ្រូពេទ្យយើងវិញ។
លោកបន្តទៀតថា បច្ចុប្បន្នអាជ្ញាធរកំពុងខិតខំជំរុញ ដោយត្រូវរួមសហការជាមួយមូលនិធិសមធម៌គាំពារសង្គម ហើយអាចជាសមាជិក ប.ស.ស ត្រូវផ្តល់ដល់សមាជិកភូមិ មេភូមិ និងមន្ត្រីជាប់កិច្ចសន្យាទាំងអស់ក្នុងខេត្ដ ដែលគ្រប់គ្រងដោយគណៈបញ្ជារការឯកភាព ចែកជូនសម្រាប់ប្រើប្រាស់សេវា ប.ស.ស កាន់ល្អប្រសើរឡើងបន្ថែមទៀត។
លោក គួច ចំរើន ក៏បានសំណូមពរដល់មន្ត្រីសុខាភិបាលយើងទាំងអស់ ត្រូវបង្កើនការយកចិត្តទុកដាក់បម្រើសេវាសាធារណៈឱ្យបានកាន់តែល្អថែមទៀត និងចូលរួមគោរពច្បាប់ចរាចរ និងបញ្ហាគ្រឿងញៀន ដោយវាជាសត្រូវធំបំផុតរបស់យើង។ បញ្ហាគ្រឿងញៀនត្រូវបម្រើសេវាជូនអ្នកចង់ផ្តាច់គ្រឿងញៀន គឺត្រូវផ្តល់ថ្នាំដោយមិនយកកម្រៃឡើយ៕Source: Kampuchea Thmey Daily
0 Comments