ឃីម បូរ៉ា អ្នកប្រដាល់ក្លិបរស្មីភូមិគាបខេត្តបន្ទាយមានជ័យ និង ហេង សំរាំង អ្នកប្រដាល់ក្លិបព្រៃទទឹងខេត្តបាត់ដំបង ពួកគេទាំងពីរនាក់នេះ ត្រូវគេផ្គូអោយជួបប្រកួតជាមួយអ្នកប្រដាល់ថៃ និងរុស្សីនៅលើសង្វៀន Ganzberg របស់ SEA-TV នាយប់ថ្ងៃសៅរ៍ ទី០២ ខែមិថុនា ឆ្នាំ២០១៨ នេះ។ ឃីម បូរ៉ា អ្នកប្រដាល់ជើងខ្លាំង នឹងត្រូវគេផ្គូផ្គងឲ្យជួបជាមួយអ្នកប្រដាល់ជើងខ្លាំងមកពីប្រទេសថៃឈ្មោះ Phat Chhayak Phum។ នេះជាគូប្រកួតដ៏អស្ចារ្យមួយ ព្រោះថាគេទាំងពីរនាក់នេះសុទ្ធតែវាយខ្លាំងដូចគ្នា។
Phat Chhayak Phum ធ្លាប់មកប្រកួតនៅកម្ពុជាច្រើនលើកហើយកន្លងមក។ ក្នុងនោះ Phat Chhayak Phum ធ្លាប់វាយឈ្នះចាញ់ជាមួយ ចាន់ ប៊ុនហឿន អ្នកប្រដាល់ក្លិបថ្មគោលពោធិសែនជ័យឲ្យសន្លប់ក្នុងទឹកទី៣។ ដូច្នេះគេជឿថា ការជួបគ្នារវាង ឃីម បូរ៉ា និង Phat Chhayak Phum អ្នកប្រដាល់ទាំងពីរសុទ្ធតែចង់ផ្តួលគ្នាទៅវិញទៅមក។ ឃីម បូរ៉ា ជើងខ្លាំងរបស់កម្ពុជានេះ គេទើបតែផ្តួលយកឈ្នះអ្នកប្រដាល់ថៃឈ្មោះ Pha Yaknoy ក្នុងទឹកទី៤ កាលពីថ្ងៃទី០៧ មេសា កន្លងមកនេះ។
Phat Chhayak Phum ដែលជាគូរបស់ ឃីម បូរ៉ានេះ ជាជើងខ្លាំងទម្ងន់ ៦០ គីឡូក្រាម ប្រចាំនៅស្រុកថៃ។ មកប្រកួតលើកចុងក្រោយរបស់ Phat Chhayak Phum គឺគេវាយស្មើជាមួយ ចាន់ ប៊ុនហឿន។ ឆ្លងកាត់ការប្រកួត៧៧លើក Phat Chhayak Phum វាយឈ្នះ៦៣លើក ចាញ់១៣លើក និងស្មើ០១លើក។ ឃីម បូរ៉ា គេមានប្រវត្តិប្រកួតចំនួន៦៧លើក ឈ្នះ៥៦លើក និងចាញ់១០លើក និងស្មើ០១លើក។ បូរ៉ា គេមានថ្វីកែងនិងជង្គង់ល្អណាស់ តែយ៉ាងណាការឈ្នះចាញ់រវាង ឃីម បូរ៉ា និង Phat Chhayak Phum នេះពុំមាននរណាហ៊ានទាយមុនថាអ្នកណាឈ្នះនោះទេ?។
ចំពោះ ហេង សំរាំង អ្នកប្រដាល់ក្លិបព្រៃទទឹងខេត្តបាត់ដំបង ត្រូវគេផ្គូអោយជួបប្រកួតជាមួយអ្នកប្រដាល់ជនជាតិរុស្សី Arthur Shushinsky។ សំរាំង អ្នកប្រដាល់ជើងចាស់របស់កម្ពុជា និងអ្នកប្រដាល់រុស្សីនេះ ពួកគេទាំងពីរជួបប្រកួតគ្នាក្នុងទម្ងន់ ៧១ គីឡូក្រាម។ ជាលើកទី៣ ហើយបន្ទាប់ពីរូបគេវិលមកកាន់សង្វៀនវិញ ហើយត្រូវគេផ្តល់ឱកាសឲ្យជួបប្រកួតជាមួយបរទេសនេះ។ ហេង សំរាំង ជាអ្នកប្រដាល់ជើងចាស់ធ្លាប់ហែលឆ្លងកាត់ប្រកួតជាមួយបរទេស ពិសេសជាមួយថៃច្រើនលើកណាស់មកហើយ កាលពីគេនៅមានឈ្មោះបោះសម្លេង។ តែពេលនេះគេមិនដូចពីមុននោះទេ ដោយសារគេចាស់ ឡើងទម្ងន់ គួបផ្សំគេស្ទើរកម្ពស់ផង ធ្វើអោយការប្រកួតជាមួយបរទេសពិបាកសង្ឃឹមឈ្នះ។
យ៉ាងណាប៉ះជាមួយអ្នកប្រដាល់រុស្សី ដែលទើបប្រកួតបាន៣៨លើក ឈ្នះ៣០លើក ចាញ់០៨ប្រហែលជាមិនពិបាកប៉ុន្មានឡើយ។ ប៉ុន្តែ ហេង សំរាំង ក៏ប្រហែលត្រូវប្រឈមការលំបាករឿងចាញ់កម្ពស់ហើយ ព្រោះអ្នកប្រដាល់រុស្សីមកលើកនេះ មានកម្ពស់ខ្ពស់ជាងប្រមាណ១តឹកឯណោះ គឺ១,៧៨ម៉ែត្រ ខណៈដែលខ្លួនគេកម្ពស់ ១,៦៨ ម៉ែត្រ។ តែយ៉ាងណាដោយសារគេមានចិត្តប្រដាល់ធំនោះ សង្ឃឹមថា ហេង សំរាំង នឹងយកឈ្នះអ្នកប្រដាល់រុស្សីបានមិនខាន។ សំរាំង មានកំណត់ត្រាប្រកួតចំនួន៩១លើក ឈ្នះ៧១លើក ចាញ់១៩លើក និងស្មើ០១លើក។
Arthur Shushinsky គេធ្លាប់មកប្រកួតនៅកម្ពុជាពីរលើកហើយ ដោយវាយឈ្នះយុគ យក្សផ្លែ។ យ៉ាងណា អ្នកប្រដាល់រុស្សីរូបនេះគេខ្លាំងគួរសមដែរ តែមកប៉ះជាមួយ ហេង សំរាំង លើកនេះ Arthur Shushinsky ក៏មិនជាស្រួលប៉ុន្មានដែរ ព្រោះថា សំរាំង គេវាយបុកខ្លាំង កណ្តាប់ដៃខ្លាំង ទម្ងន់ជើងក៏ធ្ងន់ដែរ។ តែយ៉ាងណា សំរាំង ក៏ត្រូវប្រយ័ត្នដែរសម្រាប់ការប្រកួតលើកនេះ។ ដូច្នេះចាំមើល តើ ហេង សំរាំង អាចយកឈ្នះអ្នកប្រដាល់រុស្សីនេះបានឬអត់?៕
Source: Kampuchea Thmey Daily
0 Comments