សៀមរាប ៖ បុរសម្នាក់ ដើរទៅដោតម៉ូតូបូមទឹក ខណៈដៃសើម មិនប្រយ័ត្ន ក៏ត្រូវចរន្តអគ្គិសនីឆក់ដួលស្លាប់ភ្លាមៗនៅនឹងកន្លែងកើតហេតុ បង្កឲ្យមានការភ្ញាក់ផ្អើលដល់អ្នកជិតខាងមកជួយតែជួយមិនបាន។
ហេតុការណ៍ឆក់ស្លាប់មនុស្សនោះ បានកើតឡើងនៅវេលាម៉ោង១៨និង០០នាទីល្ងាចថ្ងៃទី០១ខែមិថុនា ឆ្នាំ២០១៨ ស្ថិតនៅផ្ទះជនរងគ្រោះ ក្នុងក្រុមទី៦ ភូមិបុស្សក្រឡាញ់ សង្កាត់ជ្រាវសៀមរាប ក្រុងសៀមរាប។
លោកអនុសេនីយ៍ឯក ស៊ត សៃ មេប៉ុស្តិ៍សង្កាត់ជ្រាវ បានប្រាប់នៅរសៀលថ្ងៃទី២ខែមិថុនា ឆ្នាំ២០១៨នេះថា មុនពេលកើតហេតុជនរងគ្រោះ បានដើរទៅបូមទឹកនៅខាងក្រោយផ្ទះ ដោយសារដៃជនរងគ្រោះសើម ហើយទៅដោតទឹក ទើបបណ្តាលឲ្យឆ្លងចរន្តភ្លើង ចេញពីម៉ូទ័រ បូមទឹកឆក់ស្លាប់ ភ្លាមៗតែម្តង។
លោកបានបន្តថា ជនរងគ្រោះមានឈ្មោះ សោម សារ៉ែន ភេទប្រុស អាយុ៣៩ឆ្នាំ មុខរបរធ្វើស្រែ មានទីលំនៅ ភូមិបុស្សក្រឡាញ់ សង្កាត់ជ្រាវ ក្រុង/ខេត្តសៀមរាប។ ក្រោយពេលកើតហេតុភ្លាមៗ កម្លាំងជំនាញបានចុះទៅដល់កន្លែងកើតហេតុ នាំគ្នា យកសពចេញពីកន្លែងបូមទឹក ហើយធ្វើកោសល្យវិច័យលើដងខ្លួន រួចសន្និដ្ឋានបានថា ជនរងគ្រោះពិតជាស្លាប់ដោយសារ ឆ្លងចរន្តភ្លើងម៉ូទ័របូមទឹក ឆក់ស្លាប់ពិតប្រាកដមែន ពុំមែនជាករណីឃាតកម្មទេ។
បច្ចុប្បន្ន សពជនរងគ្រោះ ត្រូវបានសមត្ថកិច្ចប្រគល់ឲ្យទៅក្រុមគ្រួសារសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments