ក្រុមបាល់ទាត់បឹងកេងអែហ្វស៊ី និងវិសាខាអែហ្វស៊ី រកបានជ័យជម្នះដូចគ្នា ខណៈក្រុមម្ចាស់ផ្ទះអាស៊ីអឺរ៉ុប ស្មើគ្នាជាមួយក្រុមអគ្គស្នងការដ្ឋាននគរបាលជាតិ (ប៉ូលីស) ថ្ងៃប្រកួតសប្ដាហ៍ទី៨នៃពានរង្វាន់ជម្រើសជើងឯកជាតិឆ្នាំ២០១៨ (Metfone Cambodian League 2018) នៅល្ងាចថ្ងៃសៅរ៍ ទី២ ខែមិថុនា ឆ្នាំ២០១៨។
ចំពោះក្រុមបឹងកេតអែហ្វស៊ី បានយកឈ្នះលើក្រុមអង្គរថាយហ្គឺរ ដោយលទ្ធផល៤ទល់០ លើទីលានកីឡដ្ឋានកងយោធពលខេមរភូមិន្ទ (ស្តាតចាស់) ខណៈការប្រកួតចាប់ផ្តើមពីម៉ោង៣រសៀល។ កីឡាករនីហ្សេរីយ៉ា Esoh Paul Omogba បានរកគ្រាប់បាល់បើកឆាកនៅនាទី៤៥ ខណៈកីឡាករមិត្តរួមជាតិ Ajayi Gbenga រកគ្រាប់បាល់ទី២នៅនាទី៦៩ និងកីឡាករប្រេស៊ីល Maycon រកបាន២គ្រាប់ម្នាក់ឯងគឺនៅនាទី៧២ និង៧៩។
ចំណែកក្រុមវិសាខា វិញបានយកឈ្នះក្រុមកំពូលតារាងណាហ្គាវើល ដោយលទ្ធផល៣ទល់០ លើទីលានកីឡដ្ឋានស្តាតចាស់ដូចគ្នា ដោយការប្រកួតចាប់ផ្តើមពីម៉ោង៦ល្ងាចតទៅ។ ៣គ្រាប់របស់វិសាខា រកបានដោយកីឡាករ រស់ សំអឿន រកបាន២គ្រាប់ ស្របពេលកីឡាករវ័យក្មេង សាន គឹមហេង រកគ្រាប់បាល់ទី៣ឲ្យវិសាខា ក្នុងប្រកួតនេះផងដែរ។
ដោយឡែកក្រុមម្ចាស់ផ្ទះអាស៊ីអឺរ៉ុប បានយកប្រកួតស្មើគ្នា១ទល់១ ជាមួយក្រុមអគ្គស្នងការដ្ឋាននគរបាលជាតិ ដោយលទ្ធផល១ទល់១ លើទីលានកីឡដ្ឋាន AEU Sport Part ម្តុំអរិយក្សត្រ ដោយការប្រកួតចាប់ផ្តើមពីម៉ោង៣រសៀល។ ក្រុមម្ចាស់ផ្ទះបានរកគ្រាប់បាល់បានមុនគឺនៅនាទី៥៥ និងក្រុមអគ្គស្នងការដ្ឋាននគរបាលជាតិវិញបានវាយបកនៅនាទី៦១ ដោយកីឡាករ នួន បូរី។
ចំណែកកម្មវិធីប្រកួតផ្សេងទៀតប្រចាំសប្ដាហ៍ទី៨ នេះនឹងធ្វើឡើងនៅថ្ងៃអាទិត្យ ទី៣ ខែមិថុនា ដោយក្រុមវេស្ទើនភ្នំពេញ ទទួលក្រុមភ្នំពេញក្រោន នៅវេលាម៉ោង៣រសៀលលើទីលានកីឡដ្ឋានវេស្ទើន ហើយក្រុមអគ្គីសនីកម្ពុជា ប៉ះក្រុមសូលទីឡូអង្គរ នៅម៉ោងដំណាលគ្នាលើទីលានកីឡដ្ឋានអគ្គីសនីកម្ពុជា និងចុងក្រោយក្រុមព្រះខ័នរាជស្វាយរៀង ទទួលក្រុមក្រសួងការពារជាតិ នៅម៉ោង៦ល្ងាចលើទីលានកីឡដ្ឋានខេត្តស្វាយរៀង។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship និងពានរង្វាន់ Singapore Cup ជាដើម៕
Source: Kampuchea Thmey Daily
0 Comments