បន្ទាយមានជ័យ ៖ នគរបាលខេត្ត សហការជាមួយកម្លាំងនគរបាលក្រុងប៉ោយប៉ែត ចុះបង្ក្រាបឃាត់ខ្លួនជនសង្ស័យជនជាតិថៃប្រុសស្រីបានចំនួន៣នាក់ រួមនឹងថ្នាំញៀន៦.០០០គ្រាប់ក្នុងបន្ទប់ជួលស្នាក់នៅកាស៊ីណូស្តារវេហ្គាសលេខ៦០៩ នៅវេលាម៉ោង១២ ថ្ងៃត្រង់ ថ្ងៃទី១ ខែមិថុនា ឆ្នាំ ២០១៨ ស្ថិតក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ឯក ធិនស៊ិនដេត អធិការដ្ឋាន នគរបាលក្រុង ប៉ោយប៉ែតបានប្រាប់អ្នកយកព័ត៌មានឲ្យដឹងថា មុនពេលកើតហេតុនោះ មន្ត្រីនគរបាលមន្ទីរគ្រឿងញៀនស្នងការខេត្ត សហការជាមួយកម្លាំងនគរបាល ក្រុងប៉ោយប៉ែត បានចុះបង្ក្រាប និង ឃាត់ខ្លួនជនសង្ស័យម្នាក់ឈ្មោះឈីរ៉ាត់ ឆៃស៊ែង អាយុ១៨ឆ្នាំ ភេទស្រី ជនជាតិថៃ និងដកហូតវត្ថុតាង ថ្នាំញៀនប្រភេទមេតំហ្វេតាមីន ( wy) ចំនួន៦០០០គ្រាប់។
បន្ទាប់ពីឃាត់ខ្លួនជនសង្ស័យខាងលើបានហើយ កម្លាំងជំនាញបន្តទៅឆែកឆេរក្នុងបន្ទប់ជួលស្នាក់នៅកាស៊ីណូស្តារវេហ្គាស លេខ៦០៩ ឃាត់ខ្លួនជនសង្ស័យបានចំនួន២នាក់បន្ថែមទៀត ១ឈ្នោះ លីម សាលិ ភេទប្រុស អាយុ២៧ឆ្នាំ ជនជាតិថៃ និងទី២ឈ្មោះ បែន រាម៉ាត ភេទស្រី អាយុ៣០ឆ្នាំ ជនជាតិថៃប ហើយបញ្ជូនមកស្នងការដើម្បីចាត់ការបន្ត។
នៅមុខនគរបាលជនសង្ស័យទាំង៣នាក់បានឆ្លើយសារភាពថា ខ្លួនពិតជាបានលួចលាក់គ្រឿងញៀនទុកសម្រាប់ជក់ និងបានយកថ្នាំលក់ ឲ្យមិត្តភក្តិបន្តប្រាកដមែន។ ក្រោយពីទទួលបានចម្លើយសារភាពហើយ កម្លាំងជំនាញកំពុងកសាងសំណុំរឿងទៅតុលាការដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments