បន្ទាយមានជ័យ ៖ ព្រះសង្ឃ១អង្គទៀតហើយ នៅក្រុងសិរីសោភ័ណ កំពុងធ្វើឲ្យល្បី ភ្ញាក់ផ្អើល និងស្ញើបព្រឺខ្លាច រឿងជិះខ្សែរ៉តឡើងកំពូលភ្នំជញ្ជាំង ស្ថិតនៅវត្តបព្វតាបព៍តភ្នំជញ្ជាំង ភូមិភ្នំជញ្ជាំង សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
ព្រះសង្ឃអង្គនោះ មានព្រះនាម Lonh Chhing បានបង្ហោះហ្វេប៊ុកជិះខ្សែរ៉ត ដែលសម្រាប់ដាក់ស៊ីម៉ងត៍ខ្សាច់ ថ្ម សម្រាប់យោងឡើងទៅលើកំពូល យកទៅកសាងតម្កល់ព្រះបរមសារីរិកធាតុព្រះសម្មាសម្ពុទ្ធនោះថា ជិះរ៉តឡើងចុះពីលើភ្នំនេះវាមិនអស់លុយទេ។ ព្រះសង្ឃ Lonh Chhing មានដីកាបន្តថា ប្រសិនបើប្រិយមិត្តចូលចិត្តទេសភាពនៅលើកំពូលភ្នំជញ្ជាំង ដែលជារមណីយដ្ឋានធម្មជាតិ និងវប្បធម៌មួយ ស្ថិតនៅក្នុងស្រុកសិរីសោភ័ណ ខេត្តបន្ទាយមានជ័យ អាចធ្វើដំណើរតាមបណ្ដោយផ្លូវជាតិលេខ៥ មានចម្ងាយ៥គីឡូម៉ែត្រពីទីរួមខេត្ត។
អ្នកគាំទ្រសាទរបានឲ្យយោបល់ថា ដោយសារតែការជិះឡើងភ្នំនេះ អាចមើលឃើញទេសភាពស្រស់ស្អាតពីទីខ្ពស់ និងគួរឲ្យទាក់ទាញ ភ្ញៀវទេសចរ មហាជនណាស់។ អ្នកលេងបណ្តាញសង្គមហ្វេសប៊ុកទាំងឡាយ បានចាប់អារម្មណ៍ និងឲ្យយោបល់ថា ព្រះសង្ឃអង្គនេះអាចព្យាយាមធ្វើឲ្យល្បីក្នុងវិធីវិជ្ជមាន។ អ្នកខ្លះទៀត បានចូលរួមរីករាយជាមួយរមណីយដ្ឋានបែបធម្មជាតិនិងវប្បធម៌នេះថា មានជញ្ជាំងផ្ទាំងថ្មបញ្ឈរធំៗជាច្រើនហើយទៅដូចជាជញ្ជាំងផ្ទះ ដូចឈ្មោះភ្នំជញ្ជាំងមែន ព្រមទាំងមានល្អាង រូងភ្នំ ដើមឈើចម្រុះ រុក្ខជាតិផ្កាជាដើម។
បើមើលពីលើកំពូលភ្នំមកក្រោម គេអាចឃើញទេសភាពនិងទិដ្ឋភាពមកក្រោមឃើញផ្លូវ ផ្ទះ អគារ សំណង់នានា កូនភ្នំ បឹងបួ ស្ទឹងអូរនិងរុក្ខជាតិបៃតងស្រស់។ ប៉ុន្តែ អ្នកខ្លះបានរិះគន់ថា ការបង្ហាញរូបភាពខ្សែរ៉ត ដែលជាងប្រើសម្រាប់ស្ទូចជញ្ជូនសម្ភារៈសំណង់ និងជាងជិះនោះ មកថា សម្រាប់ភ្ញៀវទេសចរ ឬសាធារណជនអាចជិះកម្សាន្តដោយឥតថ្លៃនោះ ជាកំហុសឆ្គងដ៏ធំមួយ វាអាចគ្រោះថ្នាក់ដល់អាយុជីវិតមនុស្ស បើសិនណាវាដាច់ខ្សែរ៉ត ឬ ភ្លាត់ស្នៀតផ្សេងៗ។ រីឯមន្ត្រីអាជ្ញាធរដែនដីនិងជំនាញទេសចរណ៍លើកទឹកចិត្តឲ្យលើកកម្ពស់រមណីយដ្ឋានទេសចរណ៍ ប៉ុន្តែសូមឲ្យប្រុងប្រយ័ត្នទាំងឡើងភ្នំ ចូលល្អាង ទាំងឈរ ឬ ដើរថតរូបនិងទស្សនាទៀតផង៕
Source: Kampuchea Thmey Daily
0 Comments