ត្បូងឃ្មុំ ៖ សម្តេចអគ្គមហាសេនាបតីតេជោហ៊ុន សែន ប្រធានគណបក្សប្រជាជនកម្ពុជាបានមានប្រសាសន៍ថា គណបក្សប្រជាជនកម្ពុជាមិនមែនដឹកនាំរាជរដ្ឋាភិបាលត្រឹមតែរយៈពេល ៣០ ឆ្នាំ ទៅ ៤០ ឆ្នាំប៉ុណ្ណោះទេ តែគណបក្សប្រជាជនកម្ពុជាមានបំណងនឹងកាន់អំណាចរហូតទៅ។
ប្រមុខគណបក្សប្រជាជនកម្ពុជាបានលើកឡើងបែបនេះ នៅក្នុងឱកាសសម្ពោធអគារស្នាក់ការគណបក្សស្រុកត្បូងឃ្មុំ និង សំណេះសំណាលជាមួយសមាជិកគណបក្សប្រជាជនកម្ពុជាខេត្តត្បូងឃ្មុំ កាលពីព្រឹក ថ្ងៃទី២ ខែមិថុនា នេះ នៅទីស្នាក់ការគណបក្សស្រុកត្បូងឃ្មុំ។
សម្តេចតេជោនាយករដ្ឋមន្ត្រីបានបន្តថា “...តាមរយៈស្នាក់ការគណបក្សដ៏ធំមួយនេះគេអាចយល់ថា នេះមិនមែនជាការឆក់កណ្តៀតម្តងម្កាលដូចដែលគណបក្សមួយចំនួនបានធ្វើនោះទេ។
ក៏ប៉ុន្តែមូលដ្ឋាន គណបក្សមិនមែនគ្រាន់តែជាការកាន់អំណាចត្រឹមរយៈពេល ៣០ ឆ្នាំ ទៅ៤០ ឆ្នាំកន្លងទៅនេះទេ តែយើងមានគម្រោងនឹងកាន់អំណាចរហូតទៅបានជានៅគ្រប់ទីកន្លែង ទាំងអស់ថ្នាក់ឃុំ ស្រុក ខេត្ត និង នៅក្នុងក្របខណ្ឌថ្នាក់កណ្តាល គឺមានមូលដ្ឋានគណបក្សយ៉ាងរឹងមាំ”។
សម្តេចតេជោ ហ៊ុន សែន បានអរគុណ លោក ជា សុផារ៉ា ដែលបានខិតខំកសាងនូវសមិទ្ធផលដ៏ធំនេះឡើង ដែលជាគ្រឹះដ៏រឹងមាំរបស់គណបក្សប្រជាជនកម្ពុជា។
លោក ជា សុផារ៉ា អនុប្រធានទី១ក្រុមការងារថ្នាក់កណ្តាលចុះជួយខេត្តត្បូងឃ្មុំបានមានប្រសាសន៍ឲ្យដឹងថា អគារទីស្នាក់ការគណបក្សប្រជាជនកម្ពុជាស្រុកត្បូងឃ្មុំនេះជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះសមាជិកសមាជិកាគណបក្សប្រជាជនកម្ពុជាស្រុកត្បូងឃ្មុំ ក៏ដូចជាខេត្តត្បូងឃ្មុំ។
អគារទីស្នាក់ការគណបក្សប្រជាជនកម្ពុជាស្រុកត្បូងឃ្មុំនេះ មានបណ្តោយ ៨០ម៉ែត្រគុណនឹង ៥៤ ម៉ែត្រ មានកម្ពស់ ២ជាន់។ សំណង់ ធ្វើពីបេតុង ដែក ឥដ្ឋនិងដំបូលប្រក់ក្បឿងស្រកាលេញនិងស័ង្កសីស្ថិតនៅលើផ្ទៃដីសរុប ១៥,២០២ម៉ែត្រការ៉េ។
អគារទីស្នាក់ការគណបក្សប្រជាជនមួយនេះ ជាទីស្នាក់ការធំជាងគេដែលមានសាលប្រជុំអាចដាក់មនុស្សបានជាង២៥០០នាក់។ មានរចនាបថស្ថាបត្យកម្មខ្មែរល្អសមស្រប និងមានការតុបតែងលម្អផ្នែកខាងក្នុងនិងខាងក្រៅប្រកបដោយសោភ័ណភាពនិង គុណភាពល្អប្រណិត ដើម្បីលើកស្ទួយអត្តសញ្ញាណជាតិ។
គម្រោងសាងសង់អគារនេះ បានគោរពតាមបទដ្ឋានបច្ចេកទេសសំណង់កម្រិតខ្ពស់ទាំងគុណភាព សុវត្ថិភាពដោយរៀបចំប្រព័ន្ធពន្លត់អគ្គីភ័យ។ នៅក្នុងបរិវេណផ្នែកខាងមុខអគារមានសួនច្បារបង្ហាញពីក្តីស្រឡាញ់ចំពោះកម្ពុជា(I lOVE CAMBODIA )សម្រាប់លម្អអគារ។ បរិវេណខាងមុខនេះ អាចចតរថយន្តបានជាង ១៥០គ្រឿង, របង និង ក្លោងទ្វារធំទូលាយ សសរក្លោងពីរ កម្ពស់៩ម៉ែត្រ លម្អដោយ ម្កុដទេវតា និងមានក្បាច់រចនាបែបស្ថាបត្យកម្មខ្មែរល្អប្រណិត។
លោក ជា សុផារ៉ា បានមានប្រសាសន៍ឲ្យដឹងថា បច្ចុប្បន្នសមាជិកគណបក្សសរុប ៣០៣.៤៩៥ នាក់ ក្នុងនោះសមាជិកចំនួន ២៩៧.៤៧៨ នាក់ ស្មើនឹង ៩៨,០១ ភាគរយបានចុះឈ្មោះក្នុងបញ្ជីបោះឆ្នោត។ បញ្ជីបោះឆ្នោតផ្លូវការឆ្នាំ២០១៧ មានអ្នកបោះឆ្នោតចំនួន ៤២៧.៤០៨ នាក់ ក្នុងនោះអ្នកបោះឆ្នោតសមាជិកគណបក្សប្រជាជនកម្ពុជា មានចំនួន ៦៩,៦០ ភាគរយ ។ គណបក្សមានទីស្នាក់ការ គណបក្សខេត្ត ១ កន្លែង ទីស្នាក់ការបក្សគណបក្សក្រុង ស្រុក ៧ កន្លែង និង ទីស្នាក់ការគណបក្សមូលដ្ឋានឃុំ សង្កាត់ចំនួន ៥១ កន្លែង លើឃុំ សង្កាត់សរុប ៦៤។
ការបោះឆ្នោតជ្រើសតាំងតំណាងរាស្ត្រនីតិកាលទី ៦ នៅថ្ងៃទី ២៩ ខែ កក្កដា ឆ្នាំ ២០១៨ ខាងមុខ គណៈកម្មាធិការគណបក្សខេត្តប្តេជ្ញាយកឲ្យបាន ៦ លើ ៨ អាសនៈ៕
Source: Kampuchea Thmey Daily
0 Comments