ក្រុមសិទិ្ធមនុស្សបានធ្វើការតវ៉ាតាមផែនការនៅក្នុងទីក្រុងរាប់សិបនៅទូទាំងសហរដ្ឋអាមេរិកប្រឆាំងនឹងគោលនយោបាយរបស់រដ្ឋបាលលោក Trump ដែលបំបែកកុមារជនអន្តោប្រវេសន៍អាមេរិកកណ្តាលពីឪពុកម្តាយរបស់ពួកគេ។
សេតវិមានកំពុងរងនូវការចោទប្រកាន់អំពីការរំលោភបំពានសិទ្ធិមនុស្សដោយសារតែគោលនយោបាយមួយដែលរដ្ឋាភិបាលមើលឃើញថា ជាការរារាំងដ៏ចាំបាច់ដល់ការធ្វើអន្តោប្រវេសន៍ខុសច្បាប់ ប៉ុន្តែក្រុមអ្នករិះគន់និយាយថា វាឃោរឃៅណាស់ចំពោះជនអន្តោប្រវេសន៍ដែលរត់គេចចេញពីអំពើហិង្សានៅអាមេរិកកណ្តាល។
សមាជិកសភារដ្ឋកាលីហ្វ័រនីញ៉ាលោក Jimmy Gomez បាននិយាយក្នុងការជួបជុំមួយកាលពីថ្ងៃព្រហស្បតិ៍នៅទីក្រុងឡូសអេនជឺឡេសថា “គ្រួសារទាំងនេះមិនមែនព្យាយាមជ្រៀតចូលទេ ពួកគេមកព្រំដែន បង្ហាញខ្លួនហើយសុំជំនួយពីយើង”។
ប្រតិកម្មប្រឆាំងបានដាក់ទៅលើលោកប្រធានាធិបតី Donald Trump ដែលបានសន្យាថានឹងបញ្ឈប់ការធ្វើអន្តោប្រវេសន៍ខុសច្បាប់។ យ៉ាងណាក្តី លោកបានបន្ទោសដល់រដ្ឋបាលមុនរបស់លោកប្រធានាធិបតី Barack Obama ចំពោះគោលនយោបាយបំបែកបំបាក់នេះក៏ដូចជាអ្នកប្រជាធិបតេយ្យនៅក្នុងសភាផងដែរថ្វីបើគណបក្សសាធារណរដ្ឋមានសំឡេងភាគច្រើនក៏ដោយ។
អង្គការ American Civil Liberties Union ដែលបានប្តឹងឲ្យបញ្ឈប់ការអនុវត្តនេះបាននិយាយថា “ការបំបែកបំបាក់ក្រុមគ្រួសារគឺខ្លាំងជាងអំពើឃោរឃៅនិងមិនចាំបាច់។ វាគឺជាការធ្វើទារុណកម្ម”។
គួរបញ្ជាក់ថា កាលពីដើមឆ្នាំមុន រដ្ឋបាលរបស់លោក Trump បានចាប់ផ្តើមបំបែកអ្នកឆ្លងកាត់ព្រំដែនខុសច្បាប់ចេញពីកូនៗរបស់ពួកគេដោយបញ្ជូនក្មេងៗទៅកាន់កន្លែងនានាជាច្រើនសប្ដាហ៍មុននឹងផ្ទេរពួកគេទៅឪពុកម្តាយវិញឬសាច់ញាតិដែលរស់នៅសហរដ្ឋអាមេរិករួចទៅហើយ។ ចាប់ពីខែតុលាដល់ខែមេសា កុមារប្រហែល៧០០នាក់ត្រូវបានបំបែកចេញពីឪពុកម្តាយរបស់ពួកគេ៕ AFP
Source: Kampuchea Thmey Daily
0 Comments