រដ្ឋមន្ត្រីក្រសួងការពារជាតិអាមេរិកលោក Jim Mattis បាននិយាយនៅថ្ងៃសៅរ៍ថា ការបង្កើនយោធារបស់ចិននៅក្នុងសមុទ្រចិនខាងត្បូង និងការដាក់ពង្រាយប្រព័ន្ធសព្វាវុធកម្រិតខ្ពស់នៅក្នុងផ្លូវទឹកមានជម្លោះ ត្រូវបានរៀបចំឡើងដើម្បីបំភិតបំភ័យ និងគំរាមកំហែងអ្នកជិតខាង។
ថ្លែងក្នុងកិច្ចប្រជុំសន្តិសុខកម្រិតកំពូលមួយនៅប្រទេសសិង្ហបុរី ប្រមុខមន្ទីរបញ្ចកោណរូបនេះក៏បាននិយាយផងដែរថា យោធាអាមេរិកនៅតែបន្តគាំទ្រដល់ការជំរុញផ្នែកការទូតចំពោះ “ការរំសាយអាវុធនុយក្លេអ៊ែរពេញលេញចេញពីឧបទ្វីបកូរ៉េ”។
លោក Mattis បាននិយាយថា ក្រុងប៉េកាំងបានដាក់ពង្រាយឧបករណ៍យោធាជាច្រើនរួមទាំងមីស៊ីលប្រឆាំងនាវា មីស៊ីលបាញ់ពីដីទៅអាកាសនិងឧបករណ៍អេឡិចត្រូនិកផងដែរនៅទូទាំងសមុទ្រចិនខាងត្បូងដែលជាកន្លែងខ្លួនបានសាងសង់កូនកោះនិងប្រែក្លាយទីតាំងដទៃទៀតទៅជាមូលដ្ឋានយោធាដ៏រឹងមាំ។
ក្រុងប៉េកាំងក៏បានចុះចតយន្តហោះទម្លាក់គ្រាប់បែកនៅលើកោះ Woody និងប្រជុំកោះ Paracel ផងដែរ។
លោក Mattis បានប្រាប់កិច្ចប្រជុំ Shangri-La Dialogue ថា “ថ្វីបើការអះអាងរបស់ចិនផ្ទុយគ្នាក៏ដោយ ការដាក់ប្រព័ន្ធអាវុធទាំងនេះត្រូវបានផ្សារភ្ជាប់ដោយផ្ទាល់ទៅនឹងការប្រើប្រាស់របស់យោធាដើម្បីបំភិតបំភ័យនិងគំរាមកំហែង”។
លោកក៏បានអំពាវនាវផងដែរឲ្យប្រធានាធិបតីចិន Xi Jinping ធ្វើតាមការសន្យាក្នុងឆ្នាំ២០១៥ដែលធ្វើឡើងនៅសេតវិមានថា ក្រុងប៉េកាំងនឹងមិនធ្វើយោធាភាវូនីយកម្មនៅកោះក្នុងសមុទ្រចិនខាងត្បូងនោះទេ។
គួរបញ្ជាក់ថា សុន្ទរកថារបស់លោក Mattis នៅប្រទេសសិង្ហបុរីនេះគឺជាលើកទី២ហើយដែលគាត់បានចូលរួមក្នុងកិច្ចប្រជុំកំពូលនេះចាប់តាំងពីគាត់បានក្លាយជាប្រធានមន្ទីរបញ្ចកោណ។
រដ្ឋមន្ត្រីរូបនេះបាននិយាយថា សហរដ្ឋអាមេរិកគាំទ្រការដោះស្រាយជម្លោះដោយសន្តិវិធី ការធ្វើពាណិជ្ជកម្មនិងការវិនិយោគដោយយុត្តិធម៌និងសមធម៌និងការប្រកាន់ខ្ជាប់នូវច្បាប់និងបទដ្ឋានអន្តរជាតិ៕ AFP
Source: Kampuchea Thmey Daily
0 Comments