ភ្នំពេញ ៖ រថយន្តដឹកខ្សាច់ ចំនួន ៥គ្រឿង ត្រូវបានអាជ្ញាធរខណ្ឌដង្កោចាប់ឃាត់រក្សាទុកនៅក្នុងបរិវេណសាលាខណ្ឌ ដោយសារដឹកជញ្ជូនខ្សាច់មិនត្រឹមត្រូវតាមស្តង់ដារ។
មន្ត្រីសាលាខណ្ឌដង្កោប្រាប់អោយដឹងថា ដោយសារតែដឹកជញ្ជូនមិនបានត្រឹមត្រូវ រថយន្តដឹកខ្សាច់ ចំនួន ៥គ្រឿង ត្រូវបានអាជ្ញាធរខណ្ឌដង្កោចាប់ឃាត់រក្សាទុកនៅក្នុងបរិវេណសាលាខណ្ឌដង្កោ ដើម្បីអោយអ្នកបើកបររថយន្តលាងសំអាតផ្លូវ ថ្នល់អោយបានស្អាតឡើងវិញ ទើបអនុញ្ញាតអោយយករថយន្តត្រឡប់ទៅវិញ។
ប្រភពព័ត៌មានប្រាប់បន្តថា នៅតាមបណ្តោយផ្លូវ២០បេ ហៅ ផ្លូវ ១០៤ នៃមូលដ្ឋានខណ្ឌដង្កោ ជារឿយៗតែងតែមានកម្ទេចអាចម៍ដី ឬ ខ្សាច់ ក៏ដូចជា កម្ទេចថ្ម ធ្លាក់នៅលើផ្លូវជាបន្តបន្ទាប់ ដោយសារតែការដឹកជញ្ជូន ខ្ពស់ហួសរថយន្ត ហើយព្រមទាំងមិនបានគ្របតង់អោយបានត្រឹមត្រូវថែមទៀត ដូច្នេះហើយជាហេតុ នាំអោយធ្លាក់កម្ទេចថ្ម ខ្សាច់ ឬ អាចម៍ដី ធ្លាក់ទៅលើផ្លូវជាហូរហែ លុះពេលមានភ្លៀងធ្លាក់មកម្តងៗ ធ្វើអោយផ្លូវរអិល បង្កគ្រោះថ្នាក់ទៅដល់បើកបរផ្សេងៗ ជាបន្តបន្ទាប់។ ដោយសារមូលហេតុទាំងអស់នេះហើយ បានជាអាជ្ញាធរខណ្ឌដង្កោ ចាប់ឃាត់រថយន្តដឹងខ្សាច់ទាំង ៥គ្រឿង នោះ យកទៅរក្សាទុក ដើម្បីធ្វើការអប់រំ និងអោយអ្នកបើកបរលាងសំអាតផ្លូវ អោយបានស្អាត ទើបអនុញ្ញាតអោយយករថយន្តត្រឡប់ទៅវិញ។
មន្ត្រីសាលាខណ្ឌដង្កោប្រាប់អោយបន្តទៀតដឹងថា សកម្មភាពចាប់ឃាត់រថយន្តដឹកដី ដឹកខ្សាច់ ក៏ដូចជា រថយន្តដឹកថ្ម ទាំងឡាយណា ដែលដឹកជញ្ជូនមិនត្រឹមត្រូវបែបនេះ អាជ្ញាធរខណ្ឌដង្កោ នឹងធ្វើបន្តទៀត ដើម្បីធ្វើការអប់រំ អោយពួកគេ ដឹកជញ្ជូនអោយបានត្រឹមត្រូវ និងជាពិសេស ដើម្បីចូលរួមសំអាតបរិស្ថាន អោយបានស្អាតជានិច្ច៕
Source: Kampuchea Thmey Daily
0 Comments