កីឡាករ សុខ ផេង ដែលជាអតីតកីឡាករជម្រើសជាតិកម្ពុជា និងជាខ្សែប្រយុទ្ធនៅក្លិបបឹងកេត បានសម្រេចចិត្តបោះបង់អាជីពបាល់ទាត់មួយរយៈពេល ដោយកំពុងធ្វើការជាចុងភៅនៅភោជនីយដ្ឋានបែបអាហ្វ្រិកមួយកន្លែងនៅរាជធានីភ្នំពេញ បន្ទាប់ពីចប់រដូវកាលឆ្នាំ២០១៧ កន្លងទៅនិងជាពេលដែលរូបគេផុតកិច្ចសន្យាជាមួយក្លិប។
សុខ ផេង ដែលធ្លាប់ជួយឲ្យក្រុមភ្នំពេញក្រោន ឡើងដល់វគ្គផ្តាច់ព្រ័ត្រពានរង្វាន់ AFC President's Cup 2011 បានប្រាប់វិបសាយផ្លូវការ CNCC ថា «ក្រោយចប់លីគ២០១៧ ខ្ញុំសម្រាកពីបាល់ទាត់មួយរយៈ ដើម្បីទៅជួយប្អូនដំណើរការហាងបាយបែបអាហ្វ្រិកមួយ ក្នុងទីក្រុងភ្នំពេញ ហ្នឹង ដោយសារគាត់ទើបបើកដំបូង អញ្ចឹងគាត់ត្រូវការជំនួយច្រើនពីខ្ញុំ។ ដូច្នេះហើយទើបនៅរដូវកាលនេះខ្ញុំអវត្តមានលើទីលាន»។
ខ្សែប្រយុទ្ធដែលធ្លាប់លើពានរង្វាន់លីគកំពូលកម្ពុជា ២សម័យកាលរូបនេះបានបង្ហើបពីការត្រៀមត្រឡប់មកកាន់សមរភូមិវាលស្មៅវិញថា «ខ្ញុំមិនបានបោះបង់អាជីពហ្នឹងទេ ប្រហែលជើងទី២នេះ ឬ ឆ្នាំក្រោយ ខ្ញុំនឹងអាចចូលរួមជាមួយក្លិបតូចៗក្នុងលីគកំពូល ឬ ជាក្លិបលីគលំដាប់២ ដើម្បីបន្តវាឡើងវិញ។ និយាយទៅ ខ្ញុំនឹងជ្រើសក្លិបណាមួយ ដែលអាចឲ្យខ្ញុំមានពេលលេងបាល់ផង និង ជួយធ្វើចុងភៅនៅហាងប្អូនផង»។
ខ្សែប្រយុទ្ធ សុខ ផេង ហៅ នុង រូបគេបានចាប់អាជីពដំបូងជាមួយក្លិបឆ្លាមសមុទ្រ ក្រសួងការពារជាតិ ខេមរាកីឡា និងភ្នំពេញក្រោន ខណៈនៅឆ្នាំ២០១២ រូបគេបានសម្រេចផ្ទេរចេញទៅចូលរួមជាមួយក្លិបគិរីវង់សុខសែនជ័យ ហើយនៅរដូវកាលឆ្នាំ២០១៣ ដល់២០១៦ រូបគេបានចាកចេញទៅចូលរួមជាមួយក្រុមបឹងកេត វិញម្តង។ ដោយសារមិនសូវជាប់ឈ្មោះក្នុងកៅអីជម្រើស១១នាក់ដំបូង នៅរដូវកាលឆ្នាំ២០១៦ រូបគេបានងាកទៅចូលរួមជាមួយក្រុមណាហ្គាវើល ហើយនៅឆ្នាំ២០១៧ រូបបានត្រឡប់ទៅកាន់បឹងកេត វិញ។
ជំនាន់លោក Lee Tae Hoon នៅជាគ្រូបង្វឹកក្រុមជម្រើសជាតិកម្ពុជា លោកធ្លាប់បានកោះហៅកីឡាករ សុខ ផេង ឲ្យក្នុងក្រុមជម្រើសជាតិផងដែរ ខណៈរូបគេធ្លាប់បានលេងលើទីលានក្នុងនាមជាកីឡាករជម្រើសជាតិចំនួន៤លើកផងដែរ។ រូបគេធ្លាប់ឈ្នះពានរង្វាន់លីគកំពូលកម្ពុជា ជាមួយភ្នំពេញក្រោន នៅឆ្នាំ២០១១ និងឈ្នះ១លើកទៀតជាមួយបឹងកេត នៅឆ្នាំ២០១៧។ នៅលើឆាកអន្តរជាតិរូបគេធ្លាប់ឈ្នះជើងឯករងក្នុងពាន AFC President's Cup 2011 ជាមួយភ្នំពេញក្រោនផងដែរ៕
Source: Kampuchea Thmey Daily
0 Comments