ភ្នំពេញ ៖ ប្រមុខរាជរដ្ឋាភិបាលកម្ពុជា បានសម្រេចផ្តល់អត្ថប្រយោជន៍បន្ថែមចំនួន ២ទៀត ដើម្បីជួយសម្រួលដល់ជីវភាពរស់នៅរបស់គ្រួសារអតីតយុទ្ធជនដែលបានពលី និងមរណៈ ដើម្បីបុព្វហេតុជាតិ ដោយសម្តេចបានបញ្ជាក់ថា អត្ថប្រយោជន៍ទាំងពីរនេះ រដ្ឋត្រូវចំណាយថវិកាប្រមាណ ២.៥៨០ លានរៀល ក្នុងមួយឆ្នាំ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានប្រកាសផ្តល់អត្ថប្រយោជន៍បន្ថែមដល់គ្រួសារអតីតយុទ្ធជនដែលបានពលីនិងមរណៈដើម្បីបុព្វហេតុជាតិ នេះកាលពីព្រឹកថ្ងៃទី០៤ ខែមិថុនា ឆ្នាំ២០១៨ ក្នុងឳកាសដែលសម្តេចអញ្ជើញជាអធិបតីក្នុងពិធីអបអរសាទរខួបលើកទី១១ឆ្នាំ នៃទិវាអតីតយុទ្ធជនកម្ពុជា។
សម្ដេចតេជោនាយករដ្ឋមន្ត្រី ហ៊ុន សែន បានមានប្រសាសន៍ថា ក្នុងដំណើរឆ្ពោះទៅមុខ រាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា បានកំណត់រួចហើយក្នុងគោលនយោបាយបក្សប្រជាជនកម្ពុជា សម្រាប់កសាងនិងការពារមាតុភូមិកម្ពុជាឆ្នាំ២០១៨-២០២៣ ដោយរួមទាំងអភិវឌ្ឍនិងពង្រឹងប្រព័ន្ធគាំពារសង្គមឲ្យប្រកបដោយប្រសិទ្ធភាព និង ចីរភាពដែលជួយគាំពារប្រជាជនគ្រប់រូបពីហានីភ័យនានា ដោយមិនទុកឲ្យប្រជាជនណាម្នាក់ស្ថិតនៅក្រៅប្រព័ន្ធគាំពារសង្គមឡើយ គណបក្សប្រជាជនកម្ពុជានៅតែរក្សាជំហររួមសុខរួមទុក្ខជាមួយប្រជាជននៅគ្រប់កាលៈទេសៈ។
បចុប្បន្ននេះ អតីតយុទ្ធជនសរុបចំនួន ៨៦.៩០៥ នាក់ ព្រមទាំងអ្នកនៅក្នុងបន្ទុកចំនួន ១២៩.៧១៦ នាក់ កំពុងទទួលប្រាក់របបគោលនយោបាយពីរដ្ឋ ដែលប្រាក់របបនេះត្រូវបានកែសម្រួលជាបន្តបន្ទាប់ស្របតាមកំណើនសេដ្ឋកិច្ចជាតិ និងការដំឡើងប្រាក់បៀវត្សមន្ត្រីរាជការនិងកងកម្លាំងប្រដាប់ឤវុធ។ ចំពោះមុខនេះ រាជរដ្ឋាភិបាលទទួលស្គាល់ថា ក្រុមគ្រួសាររបស់អតីតយុទ្ធជនដែលជាជនពលីនិងមរណៈទទួលរងការលំបាកនិងបញ្ហាប្រឈមហិរញ្ញវត្ថុដោយសារពួកគាត់បាត់បង់ចំណូលដែលជាប្រាក់ឧបត្ថម្ភយោធិនទាំងស្រុង នៅពេលអតីតយុទ្ធជនដែលជាជនបង្គោលទទួលមរណភាព។
ដូច្នេះដើម្បីជួយសម្រួលដល់ជីវភាពរស់នៅរបស់គ្រួសារអតីតយុទ្ធជនដែលបានពលី និងមរណៈ ដើម្បីបុព្វហេតុជាតិ សម្តេចតេជោនាយករដ្ឋមន្ត្រីបានណែនាំឲ្យក្រសួងសេដ្ឋកិច្ច និងហិរញ្ញវត្ថុ ពិនិត្យលទ្ធភាពដោះស្រាយបញ្ហាលំបាកនេះ ហើយជាលទ្ធផលសម្តេចតេជោនាយករដ្ឋមន្ត្រីសម្រេចផ្តល់ជូនអត្ថប្រយោជន៍បន្ថែមចំនួន ២ ប្រភេទគឺ ៖ ទី១-ក្នុងការបង់វិភាគទាន ៧.០០០ រៀលក្នុង ១ខែ ដែលគ្រួសារអតីតយុទ្ធជនពលីនិងមរណៈ ចំនួន ២៣.៣២២ នាក់កំពុងបង់ជាប្រចាំដល់សមាគមអតីតយុទ្ធជន រាជរដ្ឋាភិបាលនឹងចូលរួមជួយបង់ ៥០ភាគរយដែលស្មើនឹង ៣.៥០០ រៀល។ ការបង់វិភាគទាននេះគឺដើម្បីទទួលបានអត្ថប្រយោជន៍នានាពីសមាគមដែលរួមមាន ការទទួលបានថវិកាចំនួន ៤លានរៀលសម្រាប់រៀបចំបុណ្យសពនិងសេវាគាំទ្រ។ ជារួម រាជរដ្ឋាភិបាលនឹងចំណាយថវិកាចំនួនប្រមាណ៩៨០លានរៀល ក្នុង១ ឆ្នាំ បន្ថែមទៀតដើម្បីជួយសម្រាលបន្ទុកជីវភាពរស់នៅរបស់គ្រួសារជនពលីនិងមរណៈនេះ។
ទី២-រាជរដ្ឋាភិបាល សម្រេចចំណាយថវិកាប្រមាណ ១.៦០០ លានរៀល ក្នុង ១ឆ្នាំ បន្ថែមទៀត ដើម្បីផ្តល់សេវាថែទាំសុខភាពដោយឥតគិតថ្លៃជូនគ្រួសារជនពលីនិងមរណៈទាំងអស់ទាំងក្រុមគ្រួសារឥតគិតថ្លៃជូនគ្រួសារជនពលីនិងមរណៈទាំងអស់ទាំងក្រុមគ្រួសារដែលជាសមាជិកនិងមិនមែនសមាជិករបស់សមាគមអតីតយុទ្ធជនដែលមានចំននួនសរុបប្រមាណ ៥៦.៧០០នាក់ តាមរយៈមូលនិធិសមធម៌។
គួររំលឹកថា កន្លងមករាជរដ្ឋាភិបាលបានផ្ដោតការយកចិត្តទុកដាក់ខ្ពស់ក្នុងការលើកកម្ពស់ជីវភាពរស់នៅរបស់អតីតយុទ្ធជន ជានីតិជន ជាជនបាត់បង់សមត្ថភាពការងារ និងជនពិការតាមរយៈ ៖ ទី១-ការទទួលប្រាក់វិភាជន៍គ្រួសារ ប្រាក់បំណាច់ឧបត្ថម្ភគ្រួសារ និងកូនប្រចាំខែដូចប្រាក់វិភាជន៍គ្រួសារប្រចាំខែរបស់មន្ត្រីរាជការស៊ីវិល កងកម្លាំងប្រដាប់អាវុធ ត្រូវបានអនុវត្តចាប់ពីថ្ងៃទី១ ខែមករា ឆ្នាំ២០១៧ មក។ ទី២-ការផ្ដល់ប្រាក់ឧបត្ថម្ភក្នុងឱកាសបុណ្យចូលឆ្នាំប្រពៃណីជាតិខ្មែរចំនួន ៥ម៉ឺនរៀល ។ ទី៣-ការកែប្រែដំឡើងរបបសន្តិសុខសង្គមប្រចាំខែជូនដល់អតីតយុទ្ធជនជាបន្តបន្ទាប់ ជាក់ស្តែង ប្រាក់របបសន្តិសុខសង្គម ប្រចាំខែទាបបំផុតត្រូវបានដំឡើងពី ៤២ ម៉ឺនរៀលក្នុងឆ្នាំ២០១៧ ដល់ ៤៨ ម៉ឺនរៀលចាប់ពីខែមេសា ឆ្នាំ២០១៨។ ទី៤-ការដាក់ឲ្យដំណើរការប្រើប្រាស់សេវាកាតអេធីអឹម តាមប្រព័ន្ធធនាគារទូទាំង ២៥ រាជធានី ខេត្ត ចាប់ពីឆ្នាំ២០១៧ មកដើម្បីបង្កើនភាពងាយស្រួលដល់ការបើកប្រាក់របបសន្តិសុខសង្គមប្រចាំខែ។ ទី៥-ការផ្ដល់សេវាថែទាំសុខភាពសម្រាប់អតីតយុទ្ធជនក្នុងការពិនិត្យនិង ព្យាបាលជំងឺដោយមិនបង់ប្រាក់នៅតាមមន្ទីរពេទ្យសាធារណៈនិងមន្ទីរពេទ្យឯកជនដែលបានចុះកិច្ចព្រមព្រៀងជាមួយ បេឡាជាតិរបបសន្តិសុខសង្គមចាប់តាំងពីខែមករា ឆ្នាំ២០១៨ មក។ ទី៦-ដាក់ចេញនិងអនុវត្តគោលនយោបាយស្ដីពីការផ្ដល់សម្បទានដីសង្គមកិច្ច ដល់អតីតយុទ្ធជននិងគ្រួសារអតីតយុទ្ធជន ដោយបានកសាងភូមិអភិវឌ្ឍយោធិនពិកា ៣១៧ នៅតាកែនកោះស្លា ស្រុកឈូក ខេត្តកំពត ,មណ្ឌលអភិវឌ្ឍយោធិនពិការ ៣១៧ គូលែនខេត្តសៀមរាបនិងមណ្ឌលអភិវឌ្ឍយោធិនពិការ ៣១៧ ភ្នំឆ័ត្រ នៅខេត្តបន្ទាយមានជ័យ។
នៅក្នុងឱកាសនោះដែរ ប្រមុខរាជរដ្ឋាភិបាលកម្ពុជាក៏បានសម្រេចបង្វែរថវិកាចំនួន១ លានដុល្លារ ពីថវិកាសម្រាប់កសាងបន្ទាយកងពលលេខ១២៨ ជូនដល់សមាគមអតីតយុទ្ធជន សម្រាប់កសាងផ្ទះជូនគ្រួសារអតីតយុទ្ធជន បូកជាមួយថវិកាជាតិប្រមាណ ២០០០ លានរៀលទៀតនោះ សមាគមមានលុយនៅក្នុងដៃប្រមាណ ៦០០០ លានរៀល ដើម្បីកសាងផ្ទះជូនអតីតគ្រួសារអតីតយុទ្ធជន។
ជាមួយនេះ សម្តេចតេជោនាយករដ្ឋមន្ត្រី ក៏បានអំពាវនាវឲ្យសប្បុរសជនបន្តជួយដល់សមាគមតាមរយៈការផ្តល់ថវិកាឬក៏ការផ្តល់ជាការសាងសង់លំនៅដ្ឋានជូនក៏បាន។
នាយឧត្តមសេនីយ៍ គន់ គីម អគ្គលេខាធិការសមាគមអតីតយុទ្ធជន បានឲ្យដឹងថា គិតត្រឹមខែឧសភា ឆ្នាំ២០១៨ នេះ សមាគមអតីតយុទ្ធជនមានសមាជិកសរុបចំនួន ៧៣.៩០៦ នាក់ ក្នុងនោះ និវត្តន៍ជនចំនួន ២៣.១៧៦នាក់ ជនបាត់បង់សមត្ថភាពការងារចំនួន១.៤៩៧នាក់ ជនពិការចំនួន ២៥.៩១១នាក់ គ្រួសារ ជនពលីចំនួន ២០.១៤៣នាក់ ,គ្រួសារជនមរណៈចំនួន៣.១៧៩នាក់ដែលមានអ្នកនៅក្នុងបន្ទុកប្រមាណ ១០៨.៨៧១នាក់ ។
ក្នុងនោះសមាគមអតីតយុទ្ធជនកម្ពុជាបានពង្រឹងនិងពង្រីកការងារចាត់តាំងតាមរាជធានី ខេត្ត ទាំង ២៥ យ៉ាងរឹងមាំ ក្នុងនោះមានគណៈកម្មាធិការ ស.អ.ក. ក្រុង ស្រុក ខណ្ឌចំនួន ១៨៩ សាខា ស.អ.ក. ឃុំ សង្កាត់ ចំនួន ១.៥៥៣ និងមានមន្ត្រីប្រតិបត្តិសរុបចំនួន ១៨.៨៨៨ នាក់។
សម្រាប់ការបើកផ្តល់ប្រាក់បេឡាមរណសង្គ្រោះវិញ នាយឧត្តមសេនីយ៍ គន់ គីម បានឲ្យដឹងថា បានដំណើរកាន់តែល្អប្រសើរជាលំដាប់ ពិសេសការចុះប្រគល់ប្រាក់ដល់ដៃគ្រួសារសពបានទាន់ថ្ងៃបុណ្យតែម្តង។ លើការជាក់ស្តែងឃើញថា នៅក្នុងខែនីមួយៗមានសមាជិកសមាគមទទួលមរណភាពគឺប្រមាណពី១២០ សព ទៅ ១៦០សព ដោយមូលហេតុរើមុខរបួស មានជំងឺប្រចាំកាយ ចាស់ជរា មានសុខភាពចាស់ទ្រុឌទ្រោម និង គ្រោះថ្នាក់ជាយថហេតុផ្សេងៗ ដែលជាមូលហេតុនៃការកើនឡើងជាបន្តបន្ទាប់។
លោកអគ្គលេខាធិការសមាគមបានឲ្យដឹងថា រយៈពេល៤ខែ ដើមឆ្នាំ២០១៨ នេះ សមាជិកទទួលមរណភាពមានចំនួន៥៧២សព បើប្រៀបទៅនឹងរយៈពេលដូចគ្នាឆ្នាំ២០១៧ កន្លងទៅកើនឡើង៨១សព។ ក្នុងចន្លោះខួបទី១០ មកខួបទី១១ នេះ សមាគមអតីតយុទ្ធជនកម្ពុជាតាមរាជធានីខេត្ត បានបើកផ្តល់ប្រាក់បេឡាមរណសង្គ្រោះជូនដល់គ្រួសារសពសមាជិកសរុបបានចំនួន ១.៥៣២ សព ក្នុងនោះ ថវិការបស់សម្តេចតេជោប្រធានមានចំនួន ២៩៧ សព។
បើតាមនាយឧត្តមសេនីយ៍ គន់ គីម តាមរយៈនៃការធ្វើបច្ចុប្បន្នភាពកន្លងទៅបានរកឃើញអតីតយុទ្ធជនជាសមាជិកសមាគមដែលបានទទួលរបបឧបត្ថម្ភគោលនយោបាយពីរដ្ឋមានចំនួនសរុប ៧៣.៩០៦ នាក់ និងមានសាច់ញាតិនៃក្រុមគ្រួសារគាត់សរុបមានចំនួន ២៣១.៩៣៨ នាក់ ក្នុងនោះកូនដែលមានអាយុ ១៨ ឆ្នាំឡើងចំនួន ២. ២៤០នាក់ ។ សមាគមបានរកឃើញដែរថា អតីតយុទ្ធជន ដែលមានដីអត់ផ្ទះ ឬ មានផ្ទះមិនសមរម្យចំនួន ៣.០៥៧ គ្រួសារ, អតីតយុទ្ធជនដែលលំបាកខ្លាំងជាងគេ កំពុងរស់នៅជាមួយសាច់ញាតិបងប្អូនគ្មានទាំងដី គ្មានទាំងផ្ទះ មានចំនួន ៤.២៦១ គ្រួសារ, អតីតយុទ្ធជនរស់នៅលើដីសាធារណៈមានចំនួន ៦០៣ គ្រួសារ។
ឆ្លើយតបទៅនឹងគុណបំណាច់ដ៏ធំធេងរបស់វីរអតីតយុទ្ធជន សម្តេចតេជោ និង សម្តេចកិត្តិព្រឹទ្ធបណ្ឌិត តែងបានគិតគូរយកចិត្តទុកដាក់ជាប្រចាំដល់សុខទុក្ខ និង ការលំបាករបស់បងប្អូន។ ជាក់ស្តែងជារៀងរាល់ឆ្នាំ សម្តេចតេជោ តែងបានអញ្ជើញដោយផ្ទាល់ ឬ ចាត់តំណាងចុះជួបបងប្អូនអតីតយុទ្ធជន និងគ្រួសារ នៅភូមិអភិវឌ្ឍន៍ទាំង ៣ កន្លែង (កោះស្លា គូលែន និងភ្នំឆ័ត្រ)។ ក្នុងឆ្នាំ២០១៧-២០១៨ នេះ សម្តេចតេជោប្រធាន បានសាងសង់ផ្ទះជូនអតីតយុទ្ធជនក្រីក្រនិងគ្រួសារ បានសរុបចំនួន ៦៩៩ខ្នង៕
Source: Kampuchea Thmey Daily
0 Comments