បាត់ដំបង ៖ បុរសវ័យកណ្តាលម្នាក់ ដែលគ្មានអ្នកណាមួយស្គាល់ពីអត្តសញ្ញាណ បានចង កសម្លាប់ខ្លួន នៅកណ្តាលវាលស្រែខាងក្រោយភូមិអស់រយៈពេលជាច្រើនថ្ងៃ ដែលខ្លួនប្រាណសព ស្ទើរតែរលួយទៅហើយ ទើបមានការភ្ញាក់ផ្អើល ដោយសារតែតំបន់នេះមិនសូវមានអ្នកណាឆ្លងកាត់។
ការភ្ញាក់ផ្អើលនេះ បានកើតឡើងនៅវេលាម៉ោង ១០និង២០នាទី ព្រឹក ថ្ងៃទី ៤ ខែមិថុនា ឆ្នាំ២០១៨ ត្រង់ចំណុច វាលស្រែ ខាងត្បូង ភូមិប៉ោយតាសេក ឃុំ បឹងព្រីង ស្រុកថ្មគោល ខេត្តបាត់ដំបង ចម្ងាយប្រហែល ជាង ១ ០០០ ម៉ែត្រ ដោយមានករណី ធ្វើអត្តឃាត មួយ គឺជនរងគ្រោះមិនស្គាល់សាវតារ។
នៅនឹងកន្លែងកើតហេតុ គឺសមត្ថកិច្ចបានពិនិត្យឃើញថា សពនេះភេទប្រុស អាយុ ប្រហែល ជិត ៣០ ឆ្នាំ សម្បុរខ្មៅ កម្ពស់ប្រហែល១,៦០ម គ្មានសម្លៀកបំពាក់ និងមានស្នាមសាក់រូបធូបមូសនៅលើដៃខាងស្តាំ ដោយជនរងគ្រោះ បានយកខោលីអូយឺត ទៅថ្ពក់ចងក ទៅនឹងមែកដើមថ្កូវបណ្តាលអោយស្លាប់។
តាមការត្រួតពិនិត្យ និងសន្និដ្ឋាន ផ្នែកជំនាញបច្ចេកទេស នៃស្នងការដ្ឋាន នគរបាលខេត្តបាត់ដំបង បានអះអាងបឋមថា សព អាច ស្លាប់រយៈពេល៤ ទៅ ៥ ថ្ងៃ ហើយ ដោយធ្វើអត្តឃាត គឺចង កយ៉ាងពិតប្រាកដ ក្រោយពិនិត្យ សមត្ថកិច្ចក៏បានសុំគោលការណ៍ទៅលោកព្រះរាជអាជ្ញា ដើម្បីកប់នៅនឹងកន្លែងជាបណ្ដោះអាសន្ន។
បើតាមសាក្សីចំនួន២នាក់ ដែលរស់នៅក្នុងភូមិនោះ បាននិយាយថា បុរសម្នាក់នេះ គេបានឃើញដើរនៅតាមវាលស្រែ ដោយស្លៀកតែខោ លីអូ អត់អាវ អត់ស្បែកជើង ហើយមានកាន់ដបទឹកសុទ្ធ១ដប គឺការប្រទះឃើញនេះប្រហែលជា៥ថ្ងៃមុន ដូច្នេះគេអាចសន្និដ្ឋានថា បើមិនបែកថ្នាំ ក៏ជាមនុស្សមិនគ្រប់ដែរ៕
Source: Kampuchea Thmey Daily
0 Comments