កណ្តាល ៖ បុរសម្នាក់និងស្ត្រីម្នាក់ជាឈ្មួញលក់ដូរថ្នាំញៀន ត្រូវបានសមត្ថកិច្ចនគរបាល ស្រុកពញាឮ បង្ក្រាបបានកាលពីថ្ងៃទី១ ខែមិថុនា ឆ្នាំ២០១៨ នៅភូមិដំណាក់ព្រីង ឃុំទំនប់ធំ ស្រុកពញាឮ ខេត្តកណ្តាល ដោយជាប់សង្ស័យពីបទជួញដូរថ្នាំញៀនខុសច្បាប់។
ជនសង្ស័យទាំង២នាក់ខាងលើ១.ឈ្មោះ ពូន ស៊ីណា ហៅញ៉ាញ់ ភេទប្រុស អាយុ២២ឆ្នាំ ជនជាតិខ្មែរ មុខរបរកម្មករ មានទីលំនៅភូមិដំណាក់ព្រីង ឃុំទំនប់ធំ ស្រុកពញាឮ ខេត្តកណ្តាល។ ២. ឈ្មោះ ប្រេស ស្រីមុំ ភេទស្រី អាយុ៣៤ឆ្នាំ ជនជាតិខ្មែរ គ្មានមុខរបរ មានទីលំនៅភូមិអង្គ្រង ឃុំព្រះស្រែ ស្រុកឧត្តុង ខេត្តកំពង់ស្ពឺ។
នៅថ្ងៃកើតហេតុកម្លាំងផ្នែកជំនាញប្រឆាំងគ្រឿងញៀន និងកម្លាំងផ្នែកនគរបាលយុត្តិធម៌ បានយាមល្បាតតាមបណ្តោយផ្លូវ៥១ លុះដល់ចំណុចកើតហេតុ មានប្រជាពលរដ្ឋ រាយការណ៍ថា ជនសង្ស័យខាងលើ កំពុងលក់ថ្នាំញៀន នៅកន្លែងកើតហេតុ។
ក្រោយពីទទួលព័ត៌មានភ្លាម កម្លាំងផ្នែកជំនាញ សហការជាមួយកម្លាំងនគរបាលប៉ុស្តិ៍រដ្ឋបាលទំនប់ធំ ចុះមកដល់ចំណុចកើតហេតុ បានប្រទះឃើញជនសង្ស័យខាងលើ ដែលជាមុខសញ្ញាជួញដូរគ្រឿងញៀន ក៏បានបង្ក្រាបឃាត់ឆែកឆេរ រកឃើញសារធាតុញៀនចំនួន០៣កញ្ចប់ និងបន្តការឆែកឆេរ កន្លែងដេករបស់ជនសង្ស័យ បានរកឃើញវត្ថុតាងមួយចំនួនបន្ថែមទៀត មានដូចជាជញ្ជីងសម្រាប់ថ្លឹងថ្នាំញៀន និងសម្ភារះសម្រាប់វេចខ្ចប់មួយចំនួន។
នៅចំពោះមុខសមត្ថកិច្ចជនសង្ស័យឈ្មោះ ពូន ស៊ីណា ហៅញ៉ាញ់ បានសារភាពថា ថ្នាំញៀន ដែលខ្លួនយកមកធ្វើសកម្មភាពរាល់ថ្ងៃគឺឈ្មោះ មុំ ភេទ ស្រី ប្រើទូរស័ព្ទលេខ ០៩៦ ៤០ ៤៤ ៩០៩ នៅភូមិអង្គ្រង ឃុំព្រះស្រែ ស្រុកឧដុង្គ ខេត្តកំពង់ស្ពឺបីថ្ងៃទៅយកម្តង ក្នុងតម្លៃ៤០០០០០៛ (សែសិបម៉ឺនរៀល) ដើម្បីយកមកចែកចាយលក់បន្ត។
តាមរយៈចម្លើយសារភាព របស់ជនសង្សយ័ឈ្មោះ ពូន ស៊ីណា ហៅញ៉ាញ់ កម្លាំងជំនាញស្រុកពញាឮ បានសហការជាមួយអធិការដ្ឋាននគរបាលស្រុកឧដុង្គ ស្រាវជ្រាវ តាមឃាត់ខ្លួនជនសង្ស័យឈ្មោះប្រេស ស្រីមុំ នៅម៉ោង១៧កន្លះថ្ងៃដដែលយកមកសួរនាំបន្តមុនពេលបញ្ជូនទៅតុលាការ៕
Source: Kampuchea Thmey Daily
0 Comments