ភ្នំពេញ ៖ ប្រជាពលរដ្ឋក្រីក្រនឹងទទួលបានការឧបត្ថម្ភជាថវិកាពីរាជរដ្ឋាភិបាល ក្នុងពេលមានផ្ទៃពោះ ពេលសម្រាលកូន និងក្រោយពេលសម្រាលកូន ដែលការឧបត្ថម្ភនេះនឹងចាប់អនុវត្តពីឆ្នាំ២០១៩ខាងមុខនេះទៅ។
នេះបើតាមប្រសាសន៍លោក សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជន និងយុវសម្បទា និងជាប្រធានក្រុមប្រឹក្សាភិបាលបេឡាជាតិអតីតយុទ្ធជន និងបេឡាជាតិសន្តិសុខ សង្គម សម្រាប់មន្ត្រីរាជការស៊ីវិល នៅក្នុងសន្និសីទសារព័ត៌មាន ស្តីពីការផ្សព្វផ្សាយគោលនយោបាយថ្មីៗលើវិស័យអតីតយុទ្ធជន និងគាំពារសង្គម នារសៀលថ្ងៃទី ៤ ខែមិថុនានេះ នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា។
អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា លោក សំហេង បុរស បានបញ្ជាក់ តាមអនុសាសន៍នែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅក្នុងឱកាសអបអរសាទរខួបលើកទី១១ ទិវាអតីតយុទ្ធជនកម្ពុជា នៅព្រឹកថ្ងៃចន្ទ ៦រោច ខែជេស្ឋ ឆ្នាំច សំរឹទ្ធិស័ក្តិ ពស ២៥៦២ ត្រូវនឹងថ្ងៃទី៤ ខែមិថុនា ឆ្នាំ២០១៨ នៅកោះពេជ្រ បានប្រកាសដាក់ចេញនូវគោលនយោបាយមួយចំនួន ដល់អតីតយុទ្ធជន និងសាធារណជនទូទៅ។ ពិសេសប្រជាពលរដ្ឋក្រីក្រពេលមានផ្ទៃពោះ ពេលសម្រាលកូន ក្រោយពេលសម្រាលកូននឹងទទួលបានប្រាក់ឧបត្ថម្ភពីរាជរដ្ឋាភិបាល គឺក្នុងពេលអំឡុងមានផ្ទៃពោះទទួលបានការឧបត្ថម្ភសាច់ប្រាក់ចំនួន ៤ដង ដោយក្នុងមួយដងនឹងទទួលបាន ៤០.០០០រៀល នៅពេលសម្រាលកូននឹងទទួលបានការឧបត្ថម្ភសាច់ប្រាក់ចំនួន ២០០.០០០រៀល ហើយក្រោយពេលសម្រាលកូនរួចនឹងទទួលបានការឧបត្ថម្ភសាច់ប្រាក់ចំនួន ១០ដង ដោយក្នុងមួយដងទទួលបាន ៤០.០០០រៀល។ មួយផ្នែកទៀតរាជរដ្ឋាភិបាលបានចេញគោលនយោបាយបន្តការសាងសង់ផ្ទះបន្ថែមឲ្យបានច្រើនថែមទៀតជូនដល់បងប្អូនអតីតយុទ្ធជន ដោយបានដកថវិកាពីមូលនិធិអតីតយុទ្ធជនកម្ពុជាចំនួន ៤០០០លានរៀល ដើម្បីយកមកធ្វើផ្ទះជូនបងប្អូនអតីតយុទ្ធជន។ មួយផ្នែកទៀតរាជរដ្ឋាភិបាលនឹងចូលរួមចូលរួមបង់វិភាគទានជំនួសគ្រួសារពលី មរណៈ ដែលជាសមាជិកសមាគមអតីតយុទ្ធជនកម្ពុជាចំនួន ៥០% ដែលស្មើនឹង ៣.៥០០រៀល ចូលទៅបេឡាមរណៈសង្គ្រោះ ដើម្បីទទួលបាននូវអត្ថប្រយោជន៍ពេលសមាជិកសមាគមបានទទួលមរណភាពនឹងទទួលបានថវិកា ៤លានរៀល សម្រាប់រៀបចំបុណ្យសព។ មួយផ្នែកទៀតរាជរដ្ឋាភិបាលនឹងផ្តល់សេវាថែទាំសុខភាពជូនគ្រួសារពលី មរណៈទាំងអស់ ទាំងគ្រួសារដែលជាសមាជិកសមាគម និងមិនមែនជាសមាជិកសមាគម តាមរយៈមូលនិធិសមធម៌៕
Source: Kampuchea Thmey Daily
0 Comments