ភ្នំពេញ ៖ ប្រធានមជ្ឈមណ្ឌលជាតិផ្ដល់ឈាម បានមានប្រសាសន៍ថា នៅក្នុងរយៈពេល ៥ខែ ដើមឆ្នាំ២០១៨នេះ មជ្ឈមណ្ឌលជាតិផ្ដល់ឈាម ទទួលបានអំណោយឈាម ប្រមាណជាង ៣៥០០០ប្លោក នៅទូទាំងប្រទេស។
លោក ហុក គឹមចេង បានថ្លែងនៅក្នុងឱកាសចូលរួមកម្មវិធីទឹកចិត្តមនុស្សធម៌ រៀបចំដោយមន្ទីរពេទ្យជោរៃ ភ្នំពេញកាលពីព្រឹកថ្ងៃទី៥ ខែមិថុនាឲ្យដឹងថា ឆ្នាំ២០១៨នេះ សេចក្ដីត្រូវការឈាមមាន សន្ទុះកើនឡើងជាងឆ្នាំ២០១៧ ក្នុងអា ត្រា ពី១៥ ទៅ២០ភាគរយ។
ពាក់ព័ន្ធនឹងមូលហេតុដែលនាំឲ្យការប្រើប្រាស់ឈាមមានការកើនឡើងលោកវេជ្ជបណ្ឌិតហុកគឹមចេង បានបញ្ជាក់ថា ដោយសារតែតំរូវការឈាមមានចំនួនកាន់តែច្រើនពិសេសជំងឺមួយចំនួនដែលត្រូវការឈាមជាចាំបាច់ដូចជាទាក់ទិននឹងជំងឺ ការហូរឈាមតាមប្រដាប់រំលាយអាហារ ការវះកាត់ជំងឺបេះដូង គ្រោះថ្នាក់ចរាចរណ៍ ករណីនៃការហូរ ឈាមមិនប្រក្រតីនៅមុននិងក្រោយពេលសម្រាលកូន ករណីជំងឺខ្សោយតម្រងនោម និងករណី នៃការព្យាបាលថែទាំ ជំងឺមហារីក។ល។
បច្ចុប្បន្នការបរិច្ចាគឈាមដោយស្ម័គ្រចិត្តមិនគិតកម្រៃមានចំនួនត្រឹម៣៥ភាគរយប៉ុណ្ណោះ ចំណែក៦៥ភាគរយទៀតជាការដោះដូរអំណោយ ឈាម តាមរយៈសាច់ញាតិអ្នកជំងឺបរិច្ចាគជំនួស។
លោកប្រធានមជ្ឈមណ្ឌលជាតិរូបនោះបានមានប្រសាសន៍ថា «ខ្ញុំចង់បានបងប្អូនផ្តល់ឈាមដោយស្ម័គ្រចិត្តមិនចង់បានពេលដែលក្រុមគ្រួសារមានការខ្វះឈាមទើបមកបរិច្ចាគនោះទេ បើក្នុង១គ្រួសារមានម្នាក់មកផ្តល់ឈាមដោយស្ម័គ្រចិត្តនោះជឿជាក់ថា ឈាមមិនមានការខ្វះខាតហើយក៏មិនចាំបាច់ឲ្យសាច់ញាតិផ្តល់ឈាមដែរ»។
លោកបានបន្ថែមថា នៅឆ្នាំខាងមុខមជ្ឈមណ្ឌលនេះនឹងខិតជំរុញអ្នកមកស្ម័គ្រចិត្តបរិច្ចាគឈាម១០០ភាគរយឲ្យបានរហូតដល់៥០ភាគរយហើយ ឈានទៅដល់១០០ភាគ រយនៅមុនឆ្នាំ២០២០ ស្របតាម អនុសាសន៍របស់អង្គការសុខភាពពិភពលោក ដែលតម្រូវឲ្យប្រទេស ដែលកំពុងអភិវឌ្ឍន៍ធានានៃ ការផ្គត់ផ្គង់ឈាម និងផលិតផលឈាមពីអ្នកស្ម័គ្រចិត្តបរិច្ចាគឈាមមិនគិតកម្រៃ១០០ភាគរយ នៅឆ្នាំ២០២០ខាងមុខនេះ។
លោកវេជ្ជបណ្ឌិត ហុក គឹមចេង បានអះអាងថា រាល់ការបរិច្ចាគឈាមរបស់អ្នកស្ម័គ្រចិត្ត គឺមិនមានផលប៉ះពាល់ដល់សុខភាពឡើយ ដោយគ្រាប់ឈាមបន្ទាប់ពីបរិច្ចាគវានឹង កកើតឡើងវិញហើយការបរិច្ចាគឈាមដោយស្ម័គ្រចិត្តនេះ ធានាបានឈាមប្រកបដោយសុវត្ថិភាពខ្ពស់សម្រាប់ជួយសង្គ្រោះ អាយុជីវិតអ្នកជំងឺព្រោះឈាមដែលបាន មកទាំងអស់នោះ ត្រូវយកទៅ វិភាគស្វែងរកមេរោគយ៉ាងត្រឹមត្រូវមុននឹងបញ្ជូនទៅកាន់មន្ទីរពេទ្យ។
សូមរំលឹកថា ឆ្នាំ២០១៧ មជ្ឈមណ្ឌលជាតិផ្តល់ឈាម បានទទួល និងផ្គត់ផ្គង់ ឈាមប្រមាណ ៧៥០ ០០ប្លោក ខណៈ ឆ្នាំ២០១៨នេះ បើតាមការប៉ាន់ស្មាន មជ្ឈមណ្ឌលជាតិផ្ដល់ឈាម ត្រូវការ ឈាមប្រមាណ ៨៥០០០ប្លោក សម្រាប់ជួយដល់អ្នកជំងឺ ក៏ដូចជាប្រជាពលរដ្ឋ ត្រូវការ ឈាម ដែលសម្រាកព្យាបាល នៅគ្រប់មន្ទីរពេទ្យទាំងអស់៕
Source: Kampuchea Thmey Daily
0 Comments