ក្រសួង​ប្រកាស​ពី តម្លៃ​លក់រាយ​ប្រេងឥន្ធនៈ សម្រាប់​១០​ថ្ងៃ នៅ​ទូទាំងប្រទេស ដែល កំណត់ដោយ​អន្តរក្រសួង

ភ្នំពេញ ​៖​ នៅ​ថ្ងៃ​៤ ​ខែ​មិថុនា​ ឆ្នាំ​២០១៨ ក្រសួងពាណិជ្ជកម្ម បានចេញ សេចក្តី​ប្រកាស​ព័ត៌មាន​ ពី​តម្លៃ​លក់​ប្រេងឥន្ធនៈ​នៅ​តាម​ស្ថានីយ​ នានា ដែល​កំណត់​ដោយ អន្តរ​ក្រសួង​រយៈពេល​១០​ថ្ងៃ​ម្តង ដោយ​មិន​អនុញាត ឲ្យ​តាម​ស្ថា​នី​យ លក់​លើសពី​តម្លៃ​ដែល​ក្រសួង​បានកំណត់​ឡើយ។​

ក្រសួង បាន​ឲ្យ​ដឹង​ថា តម្លៃ​ប្រេង និង​ម៉ាស៊ូត ​ដែល​ក្រសួង កំណត់​ឲ្យ​លក់ គឺ ប្រេង សាំង ធម្មតា មួយ​លីត្រ តម្លៃ ៤៣០០រៀល និង​ប្រេង​ម៉ាស៊ូត​ ៤១០០ រៀល​។ ក្រសួង​បាន​ឲ្យ​ដឹង​ថា ការកំណត់​នោះ គឺធ្វើឡើង​តាម​ការឡើង​ចុះ​តាម​ទីផ្សារ​អន្តរជាតិ មាន​រយៈពេល ១០​ថ្ងៃ ម្តង រាងរាល់ខែ គឺ​បន្ត ចាប់ ពីថ្ងៃ​ទី ០២ ដល់​ថ្ងៃទី​១១ មិថុនា ឆ្នាំ​២០១៨ ដោយ តម្រូវ​ឲ្យ ស្ថា​នី​យ ​ក៏ដូចជា​ដេប៉ូ លក់ ប្រេង សាំង ធម្មតា លក់​ទៅតាម​ការកំណត់ របស់ ក្រសួង មិន​អនុញាត​ឲ្យ លក់ លើសពី តម្លៃ​ដែល​បានកំណត់​នោះឡើយ លើក លែង​តែ តម្លៃ​សាំង ស៊ុប​ព៊ែ គឺ ឡើង​ចុះ​តាម​ទីផ្សារ​អន្តរជាតិ​។​

សូម​បញ្ជាក់ថា កាលពី​រសៀល​ថ្ងៃទី​២៧ ខែកញ្ញា ឆ្នាំ​២០១៧​នេះ​នៅ​ទីស្តីការក្រសួង​ពាណិជ្ជកម្ម មាន​រៀបចំ​កិច្ចប្រជុំ​ផ្សព្វផ្សាយ​ស្តីពី​“​ការកែសម្រួល​តម្លៃ​សម្រាប់​ការ​លក់​ផលិតផល​ប្រេងឥន្ធនៈ​នៅ​កម្ពុជា​” ដោយ​កំណត់ថា​ការកំណត់​តម្លៃ​សម្រាប់​ប្រេងសាំង​ស៊ុប​ពែរ (EA95)​នឹង​ពុំមាន​តទៅទៀត​ឡើយ គឺមាន​តែ សាំង​ធម្មតា​និង ប្រេង ម៉ា​ស៊ូ​ត តែប៉ុណ្ណោះ​។​

សេចក្តីប្រកាស​អន្តរក្រសួង​ថ្មី​នេះ ត្រូវបាន​ចុះហត្ថលេខា​រួមគ្នា​ដោយ​រដ្ឋមន្ត្រី នៃ​ស្ថាប័ន​សំខាន់ៗ​ចំនួន​បី​គឺ​៖ ក្រសួង​សេដ្ឋកិច្ច និង​ហិរញ្ញវត្ថុ​, ក្រសួងពាណិជ្ជកម្ម និង​ក្រសួង​រ៉ែ និង​ថាមពល ដែលមាន​ខ្លឹមសារ​ផ្តោត​សំខាន់​លើ​ការកំណត់​តម្លៃ​សម្រាប់​ការលក់​ផលិតផល​ប្រេងសាំង​ស៊ុប​ពែរ (EA95), ប្រេងសាំង​ធម្មតា (EA92) និង​ប្រេងម៉ាស៊ូត ឲ្យ​មាន​លក្ខណៈ​ប្រសើរ​ជាង​មុន​។​

សេចក្តីប្រកាស​បានសម្រេច​ថា ចាប់តាំងពី​ថ្ងៃទី​០១ ខែតុលា ឆ្នាំ​២០១៧ ការកំណត់​តម្លៃ​សម្រាប់​ប្រេងសាំង​ស៊ុប​ពែរ (EA95)​នឹង​ពុំមាន​តទៅទៀត​ឡើយ​។ ស្របគ្នា​នេះ តម្លៃ​សម្រាប់​ប្រេងសាំង​ធម្មតា (EA92) នឹងត្រូវ​បញ្ចុះ​ពី 0,23 ដុល្លារ​/​លីត្រ មក​នៅត្រឹម​0,22 ដុល្លារ​/​លីត្រ​, តម្លៃ​សម្រាប់​ប្រេងម៉ាស៊ូត នឹងត្រូវ​បញ្ចុះ​ពី 0,27 ដុល្លារ​/​លីត្រ មក​នៅត្រឹម 0,25 ដុល្លារ​/​លីត្រ ផងដែរ៕

Source: Kampuchea Thmey Daily