ភ្នំពេញ ៖ មន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានជំរុញឲ្យយុវជនកម្ពុជាទាំងអស់ត្រូវបង្កើន និងអភិវឌ្ឍសមត្ថភាពជំនាញវិជ្ជាជីវៈឲ្យកាន់តែខ្ពស់ថែមទៀតដើម្បីឆ្លើយតបទៅនឹងភាពរីកចម្រើន សេដ្ឋកិច្ចជាតិក៏ដូចជាពិភពលោក។
ថ្លែងនៅក្នុងសន្និសីទសារព័ត៌មានស្តីពីទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈលើកទី១ ឆ្នាំ២០១៨នៅទីស្តីការក្រសួងនៅព្រឹកថ្ងៃទី៤មិថុនា លោក ពេជ សោភ័នបានជំរុញឲ្យយុវជនគួរតែសិក្សាទៅលើជំនាញវិជ្ជាជីវៈមួយចំនួនដែលស្របទៅតាមតម្រូវការរបស់ទីផ្សារបច្ចុប្បន្នដូចជាជំនាញគ្រឿងយន្ត អគ្គិសនី អេឡិចត្រូនិក ជំនាញសំណង់និងវិស្វករជាដើម។
លោកបណ្ឌិតពេជ សោភ័នបានណែនាំដល់សិស្សនិស្សិត និងយុវជនកម្ពុជាទាំងអស់ទាំងអ្នកមានការងារធ្វើ និងអ្នកដែលមិនទាន់មានការងារធ្វើ ត្រូវខិតខំប្រឹងប្រែងសិក្សាជំនាញវិជ្ជាជីវៈខ្ពស់ថ្មីៗនិងមានបច្ចេកវិទ្យាទំនើបៗដើម្បីបង្កើនប្រាក់ចំណូលដល់សេដ្ឋកិច្ចគ្រួសារឲ្យកាន់តែប្រសើរឡើង។
លោករដ្ឋលេខាធិការបានបន្ថែមថា «ខ្ញុំគិតថាប្អូនៗដែលមិនទាន់មានជំនាញឬបោះបង់សិក្សាគួរតែប្រញាប់ប្រញាល់ទៅចុះឈ្មោះចូលរៀននៅតាមសាលាបណ្តុះបណ្តាលវិជ្ជាជីវៈ ព្រោះថានៅពេលបានសិក្សាពេលចេញមកវិញទទួលបានជំនាញមួយច្បាស់លាស់ និងមានការងារធ្វើ។ ចំពោះអ្នកមានការងារធ្វើហើយដូចជាកម្មករសំណង់គួរតែឆ្លៀតពេលវេលារៀនជំនាញដើម្បីទទួលបានប្រាក់ចំណូលខ្ពស់»។
ជាមួយគ្នានេះដែរលោកបណ្ឌិតពេជ សោភ័ន បានជំរុញឲ្យមន្ត្រីរាជការបន្តខិតខំបង្កើននិងអភិវឌ្ឍជំនាញបន្ថែមដើម្បីដើរឲ្យទាន់ភាពរីកចម្រើនរបស់ប្រទេសជាតិ និងពិភពលោក។
លោកបណ្ឌិតបានបន្ថែមទៀតថា ដើម្បីបំផុសឲ្យសិស្សនិស្សិតនិងយុវជនចាប់អារម្មណ៍សិក្សាលើជំនាញវិជ្ជាជីវៈទំនើបៗទាំងនេះក្រសួងបានរៀបចំធ្វើការផ្លាស់ប្តូរការអប់រំបណ្តុះបណ្តាលវិជ្ជាជីវៈដើម្បីផលិតសិស្សនិស្សិតឲ្យមានគុណភាព និងសមត្ថភាព រៀបចំពិព័រណ៍ការងារ និងវេទិកាការងារផ្សេងៗ ដោយមានវាគ្មិនជំនាញល្បីៗមកធ្វើបទបង្ហាញដល់យុវជនសិស្សនិស្សិតបានយល់ដឹងក៏ដូចជាធ្វើការសម្រេចចិត្តជ្រើសរើសជំនាញ ឬឯកទេសបន្តការសិក្សាឲ្យបានត្រឹមត្រូវបន្ទាប់ពីបញ្ចប់ថ្នាក់សាលាចំណេះទូទៅ។
លោកបណ្ឌិតបានបញ្ជាក់ថា ជាក់ស្តែងគិតត្រឹមឆមាសទី១ឆ្នាំ២០១៨ នេះក្រសួងបានធ្វើការចុះផ្សព្វផ្សាយ ដល់សិស្សានុសិស្សសាលាចំណេះទូទៅ និងគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈមួយចំនួនទៀតបានចំនួនសរុបជិត៥៨០០នាក់នៅតាមអនុវិទ្យាល័យ និងវិទ្យាល័យចំនួន ៣៣ ខណៈឆ្នាំ២០១៧កន្លងទៅផ្សព្វផ្សាយបានចំនួនសរុប ៤៨ ៦៩៣នាក់។
លោកបណ្ឌិត ពេជ សោភ័នបានអំពាវនាវដល់សិស្សានុសិស្សយុវជនយុវនារីចូលរួមនៅក្នុងទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈឲ្យបានច្រើនកុះករដើម្បីទទួលបាននូវចំណេះដឹង និងបទពិសោធន៍ថ្មីៗស្ដីពីគន្លឹះនៃការសិក្សាជំនាញវិជ្ជាជីវៈដើម្បីឈានទៅចាប់យកអាជីពនាពេលអនាគត។
លោកបណ្ឌិតបានបន្តថា «នៅថ្ងៃ១៦ខែមិថុនាក្រោយនេះ យើងនឹងរៀបចំទិវាជាតិអប់រំបណ្តុះបណ្តាលបច្ចេកទេសនិងវិជ្ជាជីវៈសូមឲ្យក្មួយៗទៅចូលរួមនៅកោះពេជ្រទាំងអស់គ្នាដើម្បីទទួលបាននូវព័ត៌មានការអប់រំបណ្តុះបណ្តាលវិជ្ជាជីវៈដើម្បីចូលរួមអភិវឌ្ឍន៍ប្រទេសកម្ពុជាឲ្យឈានទៅសម្រេចបានទិសដៅប្រទេសកម្ពុជាពីប្រទេសមានប្រាក់ចំណូលមធ្យមកម្រិតទាបទៅជាប្រទេសមានប្រាក់ចំណូលមធ្យមកំរិតខ្ពស់នៅឆ្នាំ២០៣០ខាងមុខ»។
លោកបណ្ឌិតសង្ឃឹមថាក្មួយៗនឹងចូលរួមឲ្យបានច្រើនទាំងអស់គ្នាព្រោះថាអនាគតស្ថិតនៅក្នុងដៃរបស់ក្មួយៗទាំងអស់គ្នាហើយ។ ដូចនេះត្រូវប្រឹងប្រែងទាំងអស់គ្នា។
ចំណែកលោក ជាង សុខា នាយកប្រតិបត្តិអង្គការកម្មវិធីអភិវឌ្ឍធនធានយុវជន បានស្នើឲ្យរាជរដ្ឋាភិបាលគួរតែរៀបចំជាទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ពិព័រណ៍ និង វេទិកាការងារឲ្យ បានច្រើនថែមទៀតដើម្បីឲ្យយុវជនទទួលបាននូវព័ត៌មានស្តីពីការសិក្សាជំនាញវិជ្ជាជីវៈឲ្យបានគ្រប់ជ្រុងជ្រោយ មុននឹងសម្រេចចិត្តចាប់យកជំនាញអ្វីមួយ មុនបន្តទៅសិក្សានៅតាមមហាវិទ្យានានា៕
Source: Kampuchea Thmey Daily
0 Comments