ស្ត្រី​វេជ្ជបណ្ឌិត​ចិន រង​ការ​ផ្តន្ទាទោស​ជាប់ពន្ធនាគារ បន្ទាប់ពី​អ្នកជំងឺ​៥​នាក់​ឆ្លង​វីរុស​ហ៊ី​វ

ស្ត្រី​វេជ្ជបណ្ឌិត​ម្នាក់ មកពី​ខេត្ត Zhejiang ប្រទេស​ចិន រង​ការផ្តន្ទាទោស​ជាប់ពន្ធនាគារ​២​ឆ្នាំ​និង​៦​ខែ បន្ទាប់ពី​អ្នកជំងឺ​៥​នាក់​ឆ្លង​វីរុស​ហ៊ី​វ​ដោយសារតែ​ការខុសឆ្គង​ផ្នែក​វេជ្ជសាស្ត្រ​របស់​ពេទ្យ​។ នេះ​បើ​យោងតាម​សាលក្រម​មួយ​ចេញផ្សាយ​កាលពី​ចុងខែ​ឧសភា​។

អ្នកស្រី Zhao Jinfang អាយុ​៣៣​ឆ្នាំ​ជា​វេជ្ជបណ្ឌិត​ម្នាក់​បម្រើការ​នៅ​មន្ទីរពេទ្យ The Zhejiang Provincical Hospital TCM បានទទួល​ការផ្តន្ទាទោស​ពី​បទឧក្រិដ្ឋ​បង្ក​គ្រោះថ្នាក់​ផ្នែក​វេជ្ជសាស្ត្រ​កាលពី​ថ្ងៃទី​១២ ខែធ្នូ ឆ្នាំទៅ​មិញ។ នេះ​ជាការ​លើកឡើង​នៅក្នុង​សេចក្តីសម្រេច​វិនិច្ឆ័យ​ទោស​ពី​តុលាការ​ប្រជាជន​សង្កាត់ Shangcheng ក្នុង​ក្រុង Hangzhou នៃ​ខេត្ត​ខាងលើ​។

​ការ​សម្រេច​សេចក្តី​លើកឡើងថា អ្នកស្រី Zhao មិនបាន​គោរព​ទៅតាម​តួនាទី​ដ៏​សំខាន់​របស់ខ្លួន​ក្នុង​សភាព​ធ្ងន់ធ្ងរ ដោយសារ​ម្ជុល​ដែល​ចាក់​ថ្នាំ​ព្រមទាំង​ស៊ឺ​រាំង មិនបាន​បោះចោល​ពេល​ប្រើ​ម្តង​រួចហើយ ពេល​ដែល​អ្នកស្រី​ធ្វើការ​ប្រមូលយក Lymphocytes នៅក្នុង​មន្ទីរពេទ្យ​កាលពី​ថ្ងៃទី​៣០ ខែធ្នូ ឆ្នាំ​២០១៦​។



​ការ​សម្រេចសេចក្តី​បាន​កត់ត្រា​ថា អ្នកស្រី​ជា​វេជ្ជបណ្ឌិត​រូបនេះ​ប្រើ​ម្ជុលចាក់​បូម​តែមួយ​ពី​អ្នកជំងឺ​មួយក្រុម ហើយ​ក្រោយមក​បាន​បញ្ជូន Lymphocytes ទាំងនោះ​ទៅហើយ សមាជិក​បុគ្គលិក​ពេទ្យ​ផ្សេងទៀត​យកទៅ​ចាក់​ឲ្យ​អ្នកជំងឺ​ផ្សេង​នៅក្នុង​ថ្ងៃ​តែមួយ​ដដែល​។

​កាលពី​ខែមករា ឆ្នាំទៅ​មិញ ពេលដែល​អ្នកស្រី Zhao ដឹងថា មាន​អ្នកជំងឺ​ម្នាក់​នៅក្នុង​ក្រុម​អ្នកជំងឺ​ទាំងនោះ​រង​ការឆ្លង​វីរុស​ហ៊ី​វ មុនពេល​ធ្វើការ​ចាក់​បូ​ម​ប្រមូល​យក Lymphocyte នោះ​ទើបបានជា​អ្នកស្រី​រាយការណ៍​អំពី​កំហុសឆ្គង​របស់ខ្លួន​ប្រាប់​ទៅ​មន្ទីរពេទ្យ។

នៅក្នុង​ខែកុម្ភៈ មាន​ស្ត្រី​៥​នាក់​នៅក្នុង​ក្រុម​អ្នកជំងឺ​ទាំងនោះ​ក្នុងនោះ​ក៏​មាន​ស្ត្រី​២​នាក់​មាន​ផ្ទៃពោះ​ទៅទៀត​ក៏ត្រូវ​បាន​រកឃើញ​ផងដែរ​ថា ឆ្លង​វីរុស​ហ៊ី​វ​។ អ្នកស្រី​ត្រូវ​ទទួលរង​ការឃុំ​ខ្លួន​នៅ​ថ្ងៃទី​៨ ខែវិច្ឆិកា​។

យោង​តាម​ការ​សវនាការ​របស់​តុលាការ រយៈពេល​ទទួលទោស​ព​ន្ធ​នាគារ​របស់​អ្នកស្រី Zhao ចាប់ផ្តើម​នៅ​ថ្ងៃទី​៨ ខែកុម្ភៈ ឆ្នាំ​២០១៧ ហើយ​ត្រូវ​បញ្ចប់​នៅ​ថ្ងៃទី​៧ ខែសីហា ឆ្នាំ​២០១៩៕
អេ​.​អិន​.​អិន

 

Source: Kampuchea Thmey Daily