ភ្នំពេញ ៖ រថយន្តម៉ាកហ្វតរ៉េនជឺ ពណ៌ទឹកប្រាក់ពាក់ស្លាកលេខភ្នំពេញ2AC5631 បើកបរដោយបុរស ម្នាក់ស្ថិតក្នុងស្ថានភាពស្រវឹង បានជ្រុលទៅបុក រះចូលកន្លែងលក់បាយឆាមីឆាមួយកន្លែង នៅខាងមុខនាយកដ្ឋានតម្រង់ទិសវិជ្ជាជីវៈ និងទល់មុខ ហាងម្លិះ បណ្ដាលឲ្យអ្នកលក់ម្នាក់ និងភ្ញៀវម្នាក់រងរបួស។
គ្រោះថ្នាក់នេះ បានកើតឡើងកាលពី យប់រំលងអធ្រាត្រចូលថ្ងៃទី១៣ ខែមិថុនា ឆ្នាំ២០១៨ ស្ថិតនៅតាមបណ្តោយផ្លូវ ព្រះនរោត្តម កែងផ្លូវ ៣០២ នៅខាងមុខនាយកដ្ឋានតម្រង់ទិសវិជ្ជាជីវៈ និងទល់មុខ ហាងម្លិះ សង្កាត់ បឹងកេងកងទី១ ខណ្ឌចំការមន។
ប្រភពព័ត៌មានបានឲ្យដឹងថា មុនពេលកើតហេតុ គេឃើញបុរសម្នាក់ បើករថយន្ត ម៉ាកហ្វតរ៉េនជឺ ពណ៌ ទឹកប្រាក់ពាក់ស្លាកលេខភ្នំពេញ2AC5631 បើកតាមបណ្តោយផ្លូវព្រះនរោត្តមទិសដៅពីជើងមកត្បូង ក្នុងស្ថានភាពស្រវឹង លុះមកដល់ចំណុចកើតហេតុ មិនដឹងយ៉ាងម៉េចទេ បានជ្រុលចង្កូត ទៅបុករះ ចូលកន្លែងលក់បាយឆាមីឆាមួយកន្លែងនៅខាងមុខនាយកដ្ឋានតម្រង់ទិសវិជ្ជាជីវៈ និងទល់មុខ ហាងម្លិះ បុកសម្ភារៈ លក់ដូរ បង្គោលស្លាក សញ្ញាចរាចរណ៍បង្ហាញផ្លូវអស់១ ប៉ើងខ្ទាតប្រហែល១០ម៉ែត្រ និងម៉ូតូមួយគ្រឿង ព្រមទាំងប៉ើងធុងទឹកស៊ុបគុយទាវជាង១០ម៉ែត្រ។ ចំណែករថយន្ត រងការខូចខាតផ្នែកខាងមុខបាក់បែកយ៉ាងដំណំ។
សាក្សីបន្តថា ក្នុងហេតុការណ៍នោះ បណ្ដាលឲ្យអ្នកលក់ម្នាក់ និងភ្ញៀវម្នាក់ រងរបួស ចំណែកអីវ៉ាន់លក់ដូរនោះស្ទើរតែទាំងស្រុង។ ក្រោយពីកើតហេតុ សមត្ថកិច្ច បានចុះមកដល់កន្លែងកើតហេតុ នាំយករថយន្តទៅកាន់កន្លែងដើម្បីដោះស្រាយតាមផ្លូវច្បាប់៕
Source: Kampuchea Thmey Daily
0 Comments