លោក ហ៊ុន ម៉ាណែត ៖ កងទ័ព គឺជាតួអង្គប្រតិបត្តិករដ៏សំខាន់របស់មាតុភូមិ ក្នុងចលនាតស៊ូដើម្បីបុព្វហេតុជាតិ

ភ្នំពេញ ៖ លោកឧត្តមសេនីយ៍ឯក ហ៊ុន ម៉ាណែត ថ្លែងបែបនេះ នៅក្នុងពិធីបិទកម្មវិធី “បរិច្ចាគជើងសិប្បនិម្មិតជូនដល់យោធិនពិការ” នៅមជ្ឈមណ្ឌលពាណិជ្ជកម្ម និងពិព័រណ៍កោះពេជ្រ កាលពីព្រឹកថ្ងៃទី១៥ ខែមិថុនា ឆ្នាំ២០១៨។

ថ្លែងទៅកាន់អ្នកចូលរួមលោកឧត្តមសេនីយ៍ឯក ហ៊ុន ម៉ាណែត បាននាំនូវការផ្តាំផ្ញើសាកសួរសុខទុក្ខដ៏ខ្ពង់ខ្ពស់ពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត និងនាំមកនូវការជូនពរសព្វសាធុការពរជ័យពីសំណាក់ សម្តេចទាំងពីរ ជូនចំពោះអុំពូមីងយោធិនពិការ នាយទាហាន និងសមាជិក សមាជិកា អង្គពិធីទាំងអស់ ហើយជំនួសមុខឲ្យសម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា ក៏ដូចជាជំនួសមុខជូនថ្នាក់ដឹកនាំក្រសួងការពារជាតិ អគ្គបញ្ជាការកងយោធពល ខេមរភូមិន្ទ និងក្នុងនាមខ្លួនលោកផ្ទាល់ បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ និងសហការីទាំងអស់ នៃសមាគមចិនត្រកូលលីម-កម្ពុជា ក៏ដូចជាថ្នាក់ដឹកនាំជាដៃគូសហការនៃមូលនិធិជើងសិប្បនិមិ្មតរបស់ម្ចាស់ក្សត្រីនៃព្រះរាជាណាចក្រថៃ ដែលបានឧបត្ថម្ភ និងរៀបចំនូវកម្មវិធីបរិច្ចាគជើងសិប្បនិម្មិតបំពាក់ជូន យោធិនពិការ (ចំនួន១៤០នាក់) ដើម្បីបានប្រើប្រាស់សម្រួលដល់ការរស់នៅរបស់ពួកគាត់។

លោក ហ៊ុន ម៉ាណែត បានលើកឡើងថា ប្រទេសកម្ពុជា បានឆ្លងកាត់នូវដំណាក់កាលជាច្រើនតាំងពីមុនសង្គ្រាម និងដំណាក់កាលប្រទេសជាតិធ្លាក់ក្នុងសង្គ្រាមដ៏រ៉ាំរ៉ៃ រួមទាំងដំណាក់កាលនៃដំណើរការស្វែងរកសន្តិភាព ការកសាងស្ថិរភាពជាតិ ឯកភាពជាតិ និងបានរហូតវិវត្តន៍ឈានមកដល់ក្នុងដំណាក់កាលនៃការអភិវឌ្ឍដូចសព្វថ្ងៃនេះ។ ជាការពិតណាស់ថា គ្រប់ដំណាក់កាល គឺកម្ពុជាមិនអាចខ្វះ បានឡើយនូវវត្តមានរបស់កងទ័ពបានទេ។ ព្រោះកងទ័ព គឺជាតួអង្គប្រតិបត្តិករដ៏សំខាន់របស់មាតុភូមិ និងប្រជាជាតិយើង នៅក្នុងចលនាតស៊ូ និងការធ្វើពលីកម្មគ្រប់បែបយ៉ាង ដើម្បីបុព្វហេតុជាតិរួចចាកផុតពីភ្លើងសង្គ្រាម។

តាមលោកឧត្តមសេនីយ៍ឯក ហ៊ុន ម៉ាណែត នៅសល់តែ៥ថ្ងៃទៀតទេ គឺជាថ្ងៃទី២០ មិថុនា គម្រប់ខួប៤១ឆ្នាំ ជាទិវាចងចាំនៃដំណើររឆ្ពោះទៅរកការផ្តួលរំលំរបបប្រល័យពូជសាសន៍ ប៉ុល ពត ដែលសម្តេចតេជោ រួមជាមួយឥស្សរជន និងយុទ្ធជនជាច្រើនរូបទៀតបានចាប់ផ្តើមងើបឡើងតស៊ូ នាថ្ងៃទី២០ ខែមិថុនា ឆ្នាំ១៩៧៧ និងឆ្លងកាត់ជាច្រើនដំណាក់កាលដើម្បីប្រទេសជាតិទទួលបានសុខសន្តិភាព និងវឌ្ឍនភាពដូចសព្វថ្ងៃនេះ។ លោកបន្តថា យោធិនពិការដែលកំពុងអង្គុយនេះ ក៏មិនខុសពីអតីតយុទ្ធជនកម្ពុជា និងយោធិនពិការនៅទូទាំងប្រទេស រួមទាំងសម្តេចតេជោផងដែរ ដែលបានទទួលរងគ្រោះពិការភាព លើរាងកាយដោយសារការតស៊ូនៅក្នុងសង្គ្រាម។

លោក ហ៊ុន ម៉ាណែត លើកឡើងទៀតថា រាជរដ្ឋាភិបាលកម្ពុជា ក៏បានដាក់ចេញនូវគោលនយោបាយចាំបាច់មួយចំនួន ដើម្បីបង្កើនការគិតគូរ និងយកចិត្តទុកដាក់ចំពោះអតីតយុទ្ធជន និងយោធិនពិការរបស់យើង តាមរយៈការលើកស្ទួយនូវកម្រិតជីវភាព ការលើកតម្កើងកិត្តិយសដល់ពួកគាត់ ការដំឡើងប្រាក់បៀវត្ស និងការឧបត្ថម្ភផ្សេងៗ ការបំពាក់គ្រឿងឥស្សរិយយស ការផ្តល់ដីសម្បទាន ការបង្កើតសមាគមអតីតយុទ្ធជនកម្ពុជា ដើម្បីគាំពារបន្ថែមដល់អតីតយុទ្ធជន និងការឧបត្ថម្ភជាក់ស្តែងផ្សេងៗទៀត ដើម្បីរួមគ្នាលើកទឹកចិត្ត និងការគោរពទទួលស្គាល់ចំពោះគុណតម្លៃរបស់នាយទាហានជំនាន់មុន ក្នុងការបំពេញភារកិច្ចបម្រើជាតិមាតុភូមិ និងបានស្វែងរកសន្តិភាពជូនជាតិ និងប្រជាជនឲ្យបានរស់នៅសុខសាន្តរហូតមកដល់បច្ចុប្បន្ននេះ។

ក្រៅពីនេះរាជរដ្ឋាភិបាល ក៏បានផ្តល់សេវាថែទាំសុខភាពសម្រាប់អតីតយុទ្ធជន ក៏ដូចជាយោធិនពិការ ក្នុងការពិនិត្យ និងព្យាបាលជំងឺដោយឥតគិតថ្លៃនៅតាមមន្ទីរពេទ្យរដ្ឋ និងមន្ទីរពេទ្យឯកជននានា ដែលបានចុះកិច្ចព្រមព្រៀងជាមួយ ប.ស.ស ចាប់តាំងពីខែមករា ឆ្នាំ២០១៨ រួមទាំងការទទួលបានជំនួយសង្គ្រោះនានា នៅពេលអតីតយុទ្ធជនយើងជួបការលំបាកផ្សេងៗ ការលើកកម្ពស់វិធានការគ្រប់គ្រងដីសម្បទានសង្គមកិច្ចរបស់រដ្ឋតាមបណ្តាខេត្ត ក្នុងទិសដៅត្រៀមបែងចែក និងផ្តល់ជូន អតីតយុទ្ធជន ដែលខ្វះខាតពិតប្រាកដឲ្យបានអាស្រ័យផលទៅតាមការកំណត់របស់រាជរដ្ឋាភិបាល។ សកម្មភាពមនុស្សធម៌ដ៏ល្អប្រពៃ តាមរយៈកិច្ចសហការរវាងសមាគមចិនត្រកូលលីម-កម្ពុជា ជាមួយមូលនិធិជើង សិប្បនិម្មិតរបស់ម្ចាស់ក្សត្រីប្រទេសថៃ គឺជាការចូលរួមចំណែកមួយដ៏ថ្លៃថ្លាជាមួយរាជរដ្ឋាភិបាល ដើម្បីជួយយោធិនពិការរបស់យើង ហើយលោកសង្ឃឹមផងដែរថា សមាគមនឹងបន្តរៀបចំកម្មវិធីនេះទៀតទៅថ្ងៃអនាគត៕