មេ​ចុងភៅ​លំដាប់​ផ្កាយ​ពីរ មកពី​ប្រទេស​បារាំង បង្ហាញ​មុខម្ហូប​៦​មុខ ប្រចាំ​តំបន់ភ្នំ​ប្រទេស​បារាំង​ដល់​ប្រជាពលរដ្ឋ​កម្ពុជា

ភ្នំពេញ ​៖ ​លោក Benoit Vidal មេ​ចុងភៅ​ផ្កាយ​ពីរ​មកពី​ប្រទេស​បារាំង​ ដែល​មាន​កេរ្តិ៍ឈ្មោះ​ក្នុងការ​បញ្ចូល​គ្នា​នៃ​រសជាតិ​ប្រចាំ​តំបន់​ភ្នំ និង​មេឌីទែរ៉ាណេ ​នឹង​បង្ហាញ​មុខម្ហូប​ចំនួន​៦​មុខ​នៅ​ថ្ងៃទី​២១ ខែមិថុនា ឆ្នាំ​២០ ១៨​ នៅ​ភោជនីយដ្ឋាន​តូ​ប៉ា​ហ្ស។

មុខម្ហូប​៦​មុខ​ ដែល​នឹងត្រូវ​បង្ហាញ​រួមមាន​មុខម្ហូប ត្រី​ត្រោ​ត​អាំង ជាមួយ​ម្សៅ​សាគូ​ស្រួយ​, បង្កង​ទន្លេ​ចំ​ហ៊ុយ ជាមួយ​ទឹក​ស៊ុប និង​ស្លឹក​ផ្កា​បារាំង​, សាច់​ត្រី​ចៀន​ជាមួយ​ទឹកជ្រលក់​ធ្វើ​ពី​បន្លែស្រស់ និង​ខ្ញី​, ទ្រូង​ទា​ដុត ជាមួយ​ខ្ញី និង​ដំឡូងឈាមមាន់​, ការ៉េម​គ្រី​ម​ឈី​ស ជាមួយ​សូកូឡា​ពណ៌​ស ស្រាក្រហម និង​នំប៉័ង​ខ្ញី និង​ដំណាប់​ក្រូច ជាមួយ​ការ៉េម ក្រូចឆ្មារ និង​នំ​ពងមាន់​ស។​
​
ថ្លែង​នៅក្នុង​សន្និសីទកាសែត​កាលពី​រសៀល​ថ្ងៃទី​១៩ ខែមិថុនា ឆ្នាំ​២០១៨​លោក​លោក Benoit Vidal បាន​មានប្រសាសន៍ថា តប​តាម​ការអញ្ជើញ​របស់​ភោជនីយដ្ឋាន តូ​ប៉ា​ហ្ស លោក​នឹង​មក​កម្ពុជា​រយៈពេល​មួយ​សប្ដាហ៍ ដើម្បី​ចែករំលែក​នូវ​ចំណេះដឹង​ផ្នែក​អាហារ​បែប​អឺរ៉ុប ដ៏​ល្បី​មួយ​នេះ ជូន​ដល់​ចុងភៅ​កម្ពុជា។

លោក​បានមក​ដល់ទី​ក្រុង​ភ្នំពេញ​ពីរ​ទៅ​បី​ថ្ងៃ មុន​កម្មវិធី​ចាប់ផ្តើម​ដូច្នេះ ហើយ​លោក​នឹង​រៀបចំ កម្មវិធី​បណ្តុះបណ្តាល​ដ​ល់​ក្រុមការងារ​របស់​ភោជនីយដ្ឋាន​តូ​ប៉ា​ហ្ស អំពី​គន្លឹះ​សំខាន់ៗ និង​ជំនាញ​ដែល​ចាំបាច់ ដើម្បី​បង្កើត មុខម្ហូប​របស់លោក​។
​
សូមជម្រាបថា ការអញ្ជើញ​នូវ​មេ​ចុងភៅ​លំដាប់​ផ្កាយ​ដូចជា​លោក Benoit Vidal គឺជា​យុទ្ធសាស្ត្រ មួយ​ដើម្បី​បង្កើន​ចំណេះ​ជំនាញ​ដល់​បុគ្គលិក និង​បង្កើន​កំរិតស្តង់ដារ​ដល់​ភោជនីយដ្ឋាន ហើយ​ការ​ចំណា យ ពេលវេលា​របស់គាត់​នៅទីនេះ នឹង​បង្កើត​នូវ​កេ​រ្ត៍​ដំណែល​មួយ​ដែល​ភោជនីយដ្ឋាន អាច​បន្ត​បំរើ​នូវ រសជាតិ របស់គាត់ បន្ទាប់ពី​គាត់​ត្រលប់​ទៅវិញ​។​
​
លោក Benoit Vidal ជា​ម្ចាស់ និង​ជា​មេ​ចុងភៅ​របស់​ភោជនីយដ្ឋាន Atelier Edmond នៃ​ប្រទេស​បារាំង​, លោក​បានឈ្នះ​ពានរង្វាន់​ជា​មេ​ចុងភៅ​លំដាប់ ផ្កាយ លើកដំបូង​ក្នុង​ឆ្នាំ​២០១២ ហើយបី​ឆ្នាំ​ក្រោយមក លោក​បានឈ្នះ​ពាន​ជា​មេ​ចុងភៅ​លំដាប់​ផ្កាយ​ពីរ គាត់​មានកេរ្តិ៍ឈ្មោះ​ល្បីល្បាញ ដោយសារ​គាត់​ប្រើប្រាស់​គ្រឿងទេស​ក្នុងស្រុក បូករួម​ជាមួយ​សមត្ថ​ភាព របស់គាត់​ដើម្បី​កំណត់​ពី រសជាតិ​ដោយ​ប្រើប្រាស់​នូវ​គ្រឿងផ្សំ​មួយ​ដើម្បី​លើកស្ទួយ​គ្រឿងផ្សំ​ផ្សេងទៀត​។​

លោក Benoit Vidal បាន​ឲ្យ​ដឹងថា ​កត្ដា​សំខាន់ និង​ភាពរឹងមាំ នៃ​ការ​ចម្អិន​មុខម្ហូប ក្នុងពេល​បច្ចុប្បន្ន គឺ​ផ្សារភ្ជាប់​ជាមួយ​ក្លិន និង​រសជាតិ ហើយ​អាហារ​គ្រប់​ចាន​ទាំងអស់ ត្រូវបាន​រចនា​យ៉ាង​ស្រស់ស្អាត ហើយ​អ្នក​ស្ទើរ​តែ​មិន​ហ៊ាន​នឹង​ទទួលទាន​វា ព្រោះតែ​ស្ដាយ​នូវ​រូបភាព​ដ៏​ស្រស់ស្អាត​នៅលើ​ចាន​នោះ ហើយ​ថ្ងៃទី​២១​មិថុនា ខាងមុខនេះ ខ្ញុំ​នឹង​ចម្អិនម្ហូប​ចំនួន​៦​មុខ​ជូន​បងប្អូន​កម្ពុ​ជា​ពិសា​។ លើសពីនោះ ក្នុង​មុខម្ហូប​ទាំងនេះ គឺជា​រសជាតិ​ដើម​ប្រចាំ​តំបន់​របស់ខ្ញុំ​តែម្ដង ហើយ​មុខម្ហូប​នីមួយ​គឺ​ទទួលបាន​ភាពល្បីល្បាញ និង​ទទួលបាន​គាំទ្រ​ខ្ពស់ ទាំង​ភ្ញៀវ​ក្នុង និង​ក្រៅ​ស្រុក ។​
​
លោក Vidal បាន​បន្តទៀតថា ក្នុងចំណោម​មុខម្ហូប​ទាំង​ប្រាំមួយ​មុខ​នៃ​ការទទួល​ទាន​អាហារ​ពេល​ល្ងាច លោកអ្នក​នឹង​អាច​រីករាយ ជាមួយ​ត្រី Trout អាំង​ជាមួយ​ទឹក​ខ្យង​បំពង​, Enlivened ជាមួយ​ទឹកខ្មេះ​បាយ​, ខ្ញី​ជាមួយ វ៉ា​សា​បី​, ទា​ដុត​ជាមួយ Beetroot, ទឹក​លម្អងផ្កា​ជាមួយ​ខ្ញី​, និង​មុខម្ហូប​ពិសេសៗ​ជាច្រើន​ទៀត​។​
​
ចំពោះ​តម្លៃ​សំបុត្រ​ក្នុងការ​ចូលរួម​ទទួលទាន​អាហារ​ពេល​ល្ងាច ជាមួយ​មេ​ចុងភៅ​លំដាប់​ផ្កាយ​ពីរ​នេះ មានតម្លៃ​ត្រឹមតែ​១២៥​ដុល្លារ ក្នុង​ម្នាក់ ឬ​១៨០​ដុល្លារ​ក្នុង​ម្នាក់ រួមបញ្ចូល​ជាមួយ​ជម្រើស​ស្រា​ជាច្រើន​ប្រភេទ៕

​

Source: Kampuchea Thmey Daily