ភ្នំពេញ ៖ លោកអូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី បាននាំយកអំណោយ សប្បុរសធម៌ ជាគ្រឿងឧបភោគ បរិភោគមួយចំនួន ប្រគល់ជូន លោកតា លោក យាយ និងប្រជាពលរដ្ឋខ្មែរអ៊ីស្លាមចំនួន ៧០០គ្រួសារ នៅសង្កាត់ច្រាំងចំរេះ១ និង ច្រាំងចំរេះ២ ខណ្ឌឫស្សីកែវ រាជធានីភ្នំពេញ ដោយក្នុងនោះ ៥០០ គ្រួសារ ជាអំណោយរបស់លោកផ្ទាល់ និង២០០គ្រួសារ ជាអំណោយ សប្បុរសធម៌របស់អង្គការដៃគូរមកពីប្រទេសម៉ាឡេស៊ី ដែល ក្នុងកញ្ចប់អំណោយ នីមួយៗ មានតម្លៃ២០ ដុល្លារ។
អំណោយទាំងនេះ សម្រាប់បងប្អូនពលរដ្ឋខ្មែរអ៊ីស្លាម យកទៅដោះស្រាយក្នុងជីវភាពបានមួយកំរិតតូច ក្នុងខែបួសរ៉ាម៉ាឌន។ ពិធីចែកអំណោយសប្បុរសធម៌នេះ បានប្រព្រឹត្តទៅកាលពីថ្ងៃ អង្គារ ៧រោច ខែជេស្ឋ ឆ្នាំចសំរឹទ្ធិស័កព.ស២៥៦២ ត្រូវនឹងថ្ងៃទី៥ មិថុនា ឆ្នាំ២០១៨ នៅវិហារអ៊ីស្លាមគីឡូម៉ែត្រលេខ៨ ឫស្សីកែវ។
លោក អូស្មាន ហាស្សាន់ បានលើកឡើងថា ការចែករម្លែក អំណោយនិងម្ហូបអាហារគឺជាអំពើកុសលផលបុណ្យមួយយ៉ាងសំខាន់ និងចាំបាច់ ដល់បុគ្គលមុស្លិមគ្រប់រូប ជាពិសេសនៅក្នុងខែបួសរ៉ាម៉ាឌន គឺជាឱកាសដ៏ប្រពៃ អ្នកកាន់សាសនា អ៊ីស្លាមប្រកួតប្រជែងសាងអំពើល្អ ការបរិច្ចាគទាន តាមលទ្ធភាព សូម្បីតែការចែករំលែកសម្លមួយចាន ដល់អ្នកជិតខាងក៏មានន័យបំផុត ហើយក៏បានក្លាយទៅជាប្រពៃណីល្អមួយ នៅតាមសហគមន៍ខ្មែរអ៊ីស្លាម រួមទាំងសហគមន៍អ៊ីស្លាមលើសកលលោកផងដែរ។
លោករដ្ឋមន្ត្រីប្រតិភូអមនាយករដ្ឋមន្ត្រី ក៏បានរំលឹក ដល់បងប្អូន ប្រជាពលរដ្ឋ គ្រប់រូបកុំភ្លេច ត្រៀមខ្លួនទៅ ចូលរួមបំពេញកាតព្វកិច្ច នៅថ្ងៃ២៩ ខែកក្កដា ឆ្នាំ២០១៨ ដែលជាថ្ងៃបោះឆ្នោតជ្រើសតាំងតំណាងរាស្ត្រនីតិកាលទី៦ ដែលនៅមិនយូរទៀតទេ គឺនៅសល់តែ ៥៤ថ្ងៃប៉ុណ្ណោះ ហេតុនេះ ការចូលរួមទៅបោះឆ្នោត គឺជាកាតព្វកិច្ចរបស់យើងទាំងអស់គ្នា ហើយសន្លឹកឆ្នោត១សន្លឹក របស់បងប្អូន គឺជាដើមទុន យ៉ាងសំខាន់ ក្នុងការរួមចំណែករក្សាសុខសន្តិភាព បងប្អូនរស់នៅដោយសុខដុមរមនា ជូនខ្លួនឯង សហគមន៍ និង ប្រជាជាតិកម្ពុជាទាំងមូល៕
Source: Kampuchea Thmey Daily
0 Comments