ភ្នំពេញ ៖ ក្រសួងអប់រំយុវជន និងកីឡាបានសម្ភារៈបរិក្ខារ សម្រាប់ការងាររដ្ឋបាលសាលារៀន ជូនដល់គ្រឹះស្ថានសិក្សា ចំនួន១២ ក្នុងក្រុងកំពង់ចាមសម្រាប់សម្រួលការងារដល់មន្ត្រីរដ្ឋបាលសាលាក្នុងការបំពេញការងារឲ្យកាន់តែមានប្រសិទ្ធភាពលើការរៀបចំមេរៀន និងរក្សាឯកសារផ្សេងៗរបស់គ្រូដើម្បីលើកកម្ពស់វិស័យអប់រំនៅក្រុងកំពង់ចាមឲ្យកាន់តែប្រសើរឡើងផងដែរ។
សម្ភារៈបរិក្ខា សម្រាប់ការងាររដ្ឋបាលសាលារៀន រួមមាន៖ម៉ាស៊ីនថតចម្លង ០២គ្រឿង ម៉ាស៊ីនព្រីនធ័រ ចំនួន០៣គ្រឿង ម៉ាស៊ីនកុំព្យូទ័រ ចំនួន១២គ្រឿង និងទូដាក់ឯកសារ ចំនួន១២គ្រឿង។
លោក អាប់ ឃៀង ប្រធាននាយកដ្ឋានសម្ភារៈនិងទ្រព្យសម្បត្តិរដ្ឋ បានឲ្យដឹងនៅក្នុងពិធីប្រគល់សម្ភារៈទាំងនោះ កាលពីចុងសប្តាហ៍នេះឲ្យដឹងថា ក្រោយពីការចុះពិនិត្យនិងសិក្សាស្វែងយល់នៅតាមបណ្ដា គ្រឹះស្ថានសិក្សាទាំង១២ ក្នុងក្រុងកំពង់ចាមដោយផ្អែកទៅលើការវិនិច្ឆ័យត្រឹមត្រូវតាមស្តង់ដារលក្ខណៈ៣ចំណុចរួមមាន សមត្ថភាពកុំព្យូទ័រ អគ្គិសនី និងសមត្ថភាពទុកដាក់ឯកសារ។
លោកបានបន្តថា ដោយមើលឃើញពីការខ្វះខាតនោះក្រសួងក៏បានសម្រេចផ្ដល់សម្ភារៈបរិក្ខារគ្រប់ស្តង់ដារអប្បបរមា ជូនដល់គ្រឹះស្ថានសិក្សាទាំង១២ ក្នុងក្រុងកំពង់ចាម នោះ សម្រាប់សម្រួលការងារដល់មន្ត្រីរដ្ឋបាលសាលា ក្នុងការបំពេញការងារឲ្យកាន់តែមានប្រសិទ្ធភាពលើការរៀបចំមេរៀន និងរក្សាឯកសារផ្សេងៗរបស់គ្រូ ក្នុងគោលបំណងលើកកម្ពស់ និងវិស័យអប់រំនៅក្រុងកំពង់ចាម ក៏ដូចទូទាំងប្រទេស ផងដែរ។
មានប្រសាសន៍សំណេះសំណាលក្នុងពិធីនោះ លោក បណ្ឌិតសភាចារ្យ ហង់ ជួន ណារ៉ុន បានសម្តែងការពេញចិត្តក្នុងការប្រគល់សម្ភារៈបរិក្ខារស្តង់ដាអប្បបរមាសម្រាប់ការងាររដ្ឋបាលសាលារៀនទាំង១២នេះ គឺជាអត្ថប្រយោជន៍របស់ការងាររដ្ឋបាលសាលារៀន ដែលគាំទ្រដល់គោលនយោបាយគ្រូបង្រៀន និងបង្រៀននៅតាមគ្រឹះស្ថានសិក្សាដើម្បីលើកកម្ពស់ការរៀន និងការបង្រៀននៅទូទាំងប្រទេស ជាមួយគ្នានេះក្រសួងកំពុងអនុវត្តកម្មវិធីសាលារៀនជំនាន់ថ្មីដែលផ្តល់គុណភាពអប់រំ កាន់តែប្រសើរ ថែម ទៀតដល់សិស្សានុសិស្សក្នុងការប្រកួតប្រជែងក្នុងតំបន់ក៏ដូចជាសាកលលោក។
លោករដ្ឋមន្ត្រីបានលើកឡើងបន្ថែមទៀតថា «បើយើងចង់សម្រេចបាននូវភាពជោគជ័យខាងលើនោះ សូមឲ្យលោក លោកស្រី នាយក នាយិកា និងលោកគ្រូ អ្នកគ្រូ ត្រូវខិតខំថែមទៀតក្នុងការសិក្សាជ្រាសជ្រាវ ស្វែងរកចំណេះដឹងបន្ថែមទៀតដើម្បីលើកកម្ពស់សមត្ថភាពរបស់ខ្លួនផ្ដល់ការចែករំលែកដល់សិស្សានុសិស្សរបស់យើង ឲ្យបានយល់ដឹងពីព័ត៌មានបច្ចេកវិទ្យាថ្មីៗក្នុងសង្គមជឿនលឿនកម្ពុជាយើងនាពេលបច្ចុប្បន្ននេះ ឲ្យបានដឹងគ្រប់ៗគ្នា នៅពេលនោះហើយសង្គមយើងនិងរឹតតែទទួលបាននូវមោទនភាពថែមទៀត»៕
Source: Kampuchea Thmey Daily
0 Comments