ម្ចាស់ផ្ទះជួល ត្រូវធ្វើខ្លួនឲ្យដូចជាបងប្រុសបង្កើតរបស់កម្មករ កម្មការិនី និងស្គាល់សុខទុក្ខលំបាករបស់ពួកគាត់

ភ្នំពេញ៖ សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានផ្តល់ជាកញ្ចប់អត្ថប្រយោជន៍យ៉ាងច្រើនរហូតដល់៩ចំណុចដល់បងប្អូនកម្មករ កម្មការិនីរោងចក្រ សហគ្រាសនានានៅទូទាំងប្រទេស រួមទាំងការដំឡើងប្រាក់បៀវត្សរ៍ដល់មន្ត្រីរាជការ កងកម្លាំងប្រដាប់អាវុធ គ្រូបង្រៀនបានសមរម្យក្នុងការលើកកម្ពស់ជីវភាពរស់នៅប្រចាំថ្ងៃរបស់បងប្អូន។

នេះជាការលើកឡើងរបស់លោកឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា ប្រធានគណៈចលនាសហជីពរាជធានីភ្នំពេញ និងជាអភិបាលនៃគណៈអភិបាលរាជធានីភ្នំពេញក្នុងឱកាសជួបសំណេះសំណាលជាមួយថ្នាក់ដឹកនាំសហជីព និងប្រធានសាខាគណបក្សសហជីពមូលដ្ឋាន សហគ្រាស រោងចក្រ គ្រឹះស្ថានកាលពីព្រឹកថ្ងៃអាទិត្យទី១៧ ខែមិថុនានៅទីស្នាក់ការគណបក្សប្រជាជនកម្ពុជារាជធានីភ្នំពេញ។

លោកឃួង ស្រេង ថ្លែងថា ពេលនេះបងប្អូនកម្មករ កម្មការិនីយើងមានការងារធ្វើតាមរោងចក្រ,មានប្រាក់ចំណូលសមរម្យគឺបានមកពីការគិតគូរប្រកបដោយការទទួលខុសត្រូវរបស់សម្តេចតេជោនាយករដ្ឋមន្ត្រី មិនមែនបានមកដោយបាតដៃក្រុមប្រឆាំង ឬពួកអមិត្តណាមួយនោះទេ។

ក្នុងឱកាសសំណេះសំណាល ដែលមានបងប្អូនម្ចាស់ផ្ទះជួលមកពីតាមខណ្ឌនានាក្នុងរាជធានីភ្នំពេញនោះ លោកឃួង ស្រេង បានគូសបញ្ជាក់ថា ម្ចាស់ផ្ទះជួលត្រូវធ្វើខ្លួនឲ្យដូចបងបង្កើតរបស់កម្មករ កម្មការិនី ដែលជួលផ្ទះរបស់ខ្លួន។ ម្ចាស់ផ្ទះជួលមិនមែនបានត្រឹមតែជួលផ្ទះយកលុយដាក់ហោប៉ៅចប់នោះទេ គឺត្រូវផ្សារភ្ជាប់សុខទុក្ខជាមួយបងប្អូនកម្មករ កម្មការិនី និងត្រូវដឹងពីសំណូមពរជាក់ស្តែងរបស់បងប្អូន។

លោកកត់សំគាល់ថា បច្ចុប្បន្ននេះ ទំនាក់ទំនងរវាងកម្មករ និងអាជ្ញាធរក៏ដូចផ្នែកពាក់ព័ន្ធគឺកាន់តែមានភាពជិតស្និទ្ធជាពិសេសទទួលបានភាពកក់ក្ដៅ និងការគិតគូរដ៏មានតម្លៃពីសម្តេចអគ្គមហាសេនាបតីតេជោហ៊ុនសែន ជានាយករដ្ឋមន្ត្រីចំពោះសុខទុក្ខបងប្អូនកម្មករកម្មការិនីរបស់យើងតាមរយៈការជំរុញឲ្យមានប្រាក់ឧបត្ថម្ភកាន់តែច្រើន រៀបចំប្រព័ន្ធជំនួយសង្គម និងប្រព័ន្ធការពារសង្គមដល់បងប្អូន។ អត្ថប្រយោជន៍ទាំងអស់ខាងលើ នឹងបន្តកើតមានតទៅទៀតនៅពេលដែលគណបក្សប្រជាជនកម្ពុជាឈ្នះឆ្នោត ហើយសម្តេចតេជោហ៊ុនសែនបន្តធ្វើជានាយករដ្ឋមន្ត្រី៕