សេក គឹមរួន អ្នកប្រដាល់ក្លិបអង្គរមានជ័យខេត្តសៀមរាប ត្រូវគេផ្គូអោយជួបប្រកួតជាមួយអ្នកប្រដាល់ថៃឈ្មោះ Phat Srakeo នៅក្នុងកម្មវិធីប្រដាល់Ganzberg Top Fighter នៅ សង្វៀនទូរទស្សន៍អាស៊ីអាគ្នេយ៍ នាយប់ថ្ងៃសៅរ៍ទី១៦ ខែមិថុនា ឆ្នាំ២០១៨នេះ។ សេក គឹមរួន និង អ្នកប្រដាល់ថៃ Phat Srakeo ប្រកួតគ្នាក្នុងប្រភេទទម្ងន់៦៣,៥០០ គីឡូក្រាម។
Phat Srakeo នេះ ជាអ្នកប្រដាល់ថៃចំណូលថ្មី មិនធ្លាប់មកប្រកួតនៅស្រុកខ្មែរម្តងណាទេកន្លងមក ។ បើតាមលោក ញាណ សុធី អ្នកចាត់ចែងកម្មវិធីប្រដាល់ប្រចាំSEATV អោយដឹងថា អ្នកប្រដាល់ថៃរូបនេះ មានថ្វីដៃល្អនិងវាយខ្លាំងគួរសមដែរ ដោយសារគេជាជើងខ្លាំងនៅស្រុកថៃ ។ លោកថា យើងផ្គូយកថៃខ្លាំងពេក ឬខ្សោយពេក ក៏មិនកើតដែរ គឺមើលសមត្ថភាពប្រដំប្រសងគ្នា ទើបការប្រកួតវាយល្អនិងជក់ចិត្ត ។
បើតាមលោកញាណ សុធី Phat Srakeo មានប្រវត្តិប្រកួតប្រមាណ៥៩លើក ហើយវាយឈ្នះ៥០លើក ចាញ់០៩លើក និងមិនដែលស្មើ ។ អ្នកប្រដាល់ថៃរូបនេះ មានសមត្ថភាពបច្ចេកទេសប្រដាល់កម្រិតខ្ពស់ ដែលសេក គឹមរួន មិនអាចមើលស្រាលបានឡើយ ។
តាមអ្នកផ្គូផ្គងអោយដឹងនោះថា កាលដែលនាំយក Phat Srakeo អោយមកប្រកួតលើកនេះ គឺដើម្បីផ្តល់ឪកាសអោយសេក គឹមរួន ស្តារកេរ្តិ៍ឈ្មោះឡើងវិញបន្ទាប់ពីឡើងប្រកួតជាមួយថៃប៉ុន្មានប្រកួតចុងក្រោយនេះ គឹមរួនវាយចាញ់រហូតនោះ ។
សេក គឹមរួន ជាលើកទី៣១សម្រាប់គេហើយ ដែលត្រូវបានគេផ្គូផ្គងអោយប្រកួតជាមួយអ្នកប្រដាល់ថៃ ។ក្នុងការជួបថៃឡាវប្រមាណ៣០លើកកន្លងមកនេះ គេវាយឈ្នះ១៣លើក និងចាញ់១៨លើក ។ អ្នកប្រដាល់របស់កម្ពុជាយើងរូបនេះ គេវាយខ្លាំងនិងល្អ ពិសេសស្នៀតទាត់ និង កណ្តាប់ដៃ ។ គឹមរួន គេមានចិត្តប្រដាល់ធំ ហើយទិចនិចប្រកួត ក៏សំបូរបែបដែរ។ ដូច្នេះ ចាំមើល សេក គឹមរួន ជួបអ្នកប្រដាល់ថៃ Phat Srakeo លើកនេះ តើគេអាចយកឈ្នះបានដែរឬអត់ ?។
យុគ យក្សគីល អ្នកប្រដាល់ក្លិបកងចក្ររាជសីហ៍មានរិទ្ធ ត្រូវគេផ្គូអោយជួបប្រកួតជាមួយអ្នកប្រដាល់កាណាដាA Lian ។ពួកគេទាំងពីរជួបប្រកួតគ្នាក្នុងទម្ងន់៧១គីឡូក្រាម ។
ជាលើកទី៥ហើយនៅដើមឆ្នាំ២០១៨នេះ បន្ទាប់ពីរូបគេវិលមកកាន់សង្វៀនវិញ ហើយត្រូវគេផ្តល់ឪកាសឲ្យជួបប្រកួតជាមួយបរទេសនោះ។ កាលពីជួបប្រកួតលើកទី១ជាមួយថៃ (២៨មករា ២០១៨) យក្សគីលវាយចាញ់Phiem Sayam ត្រឹមពិន្ទុ ,លើកទី២ ជួបជាមួយរុស្សី Arthur Shushinsky ថ្ងៃទី២៤មីនា២០១៨ គេវាយចាញ់ដោយពិន្ទុទៀត លើកទី៣ ថ្ងៃទី០៨មេសា២០១៨ គេវាយស្មើជាមួយអ្នកប្រដាល់ថៃ Ou Ronou និងលើកទី៤ ជួបអ៊ីស្រអែលEden Alpert ថ្ងៃទី១៣ឧសភា២០១៨ គេផ្តួលអ៊ីស្រាអែលអោយសន្លប់ក្នុងទឹកទី២ ។
យុគ យក្សគីល ជាអ្នកប្រដាល់ជើងចាស់ធ្លាប់ហែលឆ្លងកាត់ប្រកួតជាមួយបរទេស ពិសេសជាមួយថៃ ច្រើនលើកណាស់មកហើយ កាលពីគេនៅមានឈ្មោះបោះសម្លេង ។ តែពេលនេះ គេមិនដូចពីមុននោះទេ ដោយសារគេចាស់ ឡើងទម្ងន់ គួបផ្សំគេស្ទើរកម្ពស់ផង ធ្វើអោយការប្រកួតជាមួយបរទេស ពិបាកសង្ឃឹមឈ្នះ ។
យ៉ាងណា ប៉ះជាមួយអ្នកប្រដាល់កាណាដា ដែលទើបប្រកួតបាន៣៣លើក ឈ្នះ២៥លើក ចាញ់០៨ ប្រហែលជាមិនពិបាកប៉ុន្មានឡើយ ។ តែយ៉ាងណា លើកនេះយក្សគីល ប្រហែលជាប្រឈមការលំបាករឿងចាញ់កម្ពស់ ព្រោះអ្នកប្រដាល់កាណាដាមកលើកនេះ មានកម្ពស់ខ្ពស់ជាង គឺ១,៧៤ម៉ែត្រ ខណះដែលខ្លួនគេកម្ពស់១,៦៨ម៉ែត្រ ។ ដោយសារតែយ៉ាងនេះ គួបផ្សំនឹងគេមានចិត្តប្រដាល់ធំផង សង្ឃឹមថាយក្សគីលនឹងយកឈ្នះអ្នកប្រដាល់កាណាដា Phat Srakeo បានមិនខាន។
យក្សគីល មានកំនត់ត្រាប្រកួតចំនួន១០២លើក ឈ្នះ៧១លើក ចាញ់៣០លើក និងស្មើ០១លើក ។
Phat Srakeo គេមិនធ្លាប់មកប្រកួតនៅកម្ពុជាទេកន្លងមក។ យ៉ាងណា ប៉ះជាមួយយុគយក្សគីល Phat Srakeo ក៏មិនជាស្រួលប៉ុន្មានដែរ ព្រោះថាយក្សគីលគេវាយបុកខ្លាំង កណ្តាប់ដៃខ្លាំង ទម្ងន់ជើងក៏ធ្ងន់ដែរ ។ តែយ៉ាងណា យក្សគីលក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះចាំមើល តើយុគ យក្សគីល អាចយកឈ្នះអ្នកប្រដាល់កាណាដា Phat Srakeo នេះ បានឬអត់ ? ។
ដោយឡែក អ្នកប្រដាល់ង៉ែត្រ រដ្ឋា ក្លិបតាព្រហ្មមានជ័យ នឹងត្រូវជួបប្រកួតជាមួយ ហ៊ឹម សារ៉ាន់ អ្នកប្រដាល់សមាគមកីឡាប្រដាល់ក្រសួងការពារជាតិ ។ ពីរនាក់នេះ ប្រកួតគ្នាក្នុងទម្ងន់៦៥គីឡូក្រាម ។ ពីរនាក់នេះ ពុំធ្លាប់ដែលជួបគ្នាទេពីមុនមក ។ ចំណែក អ៊ុំ វណ្ណេត អ្នកប្រដាល់ក្លិបការិយាល័យទី៥ កងទ័ពជើងគោក ត្រូវជួបប្រកួតជាមួយឈិន ក្វាន់ង៉ុយ អ្នកប្រដាល់ក្លិបមកុដរាជសីហ៍ ក្នុងប្រភេទទម្ងន់៦៥គីឡូក្រាម៕
Source: Kampuchea Thmey Daily
0 Comments